¹ Ocho kperri nacó yamawalria shopa lritalricanaca nacó jliaji talricanati Dario, caaco jliaji IMINALRITI lrinoma lrikjoite jliaji inoparrotacaita Zacaría, Berequía irri, Iddo irri, lriaco cayoji: ² ''¡Matsina kerroaca Jliaji IMINALRITI naapiya njaji jinirrinaipe! ³ Picaite narso cayoji: ''Cayo lricaiteca jliaji tsolrodaonai aimadan Italricanaa: ''¡Idia Noikjaolre!, njite Nodia watsa ikjaolre'', Cayo lricaiteca jliaji tsolrodaonai aimadan Italricanaa ⁴ Manaitjatsa nacayosho njaji jinirrinaipe, nacaiteji irso njaji inoparrotacaperri coajicaotsana, lricaite cádanaco narso jliaji tsolrodaonai aimadan Italricanaa: ''¡Shenawa imatsicana ioya njite pjiomi njaji inaitjaji maatsi!'' Mitsa corrin njemica Norso. Icatsa Lricaiteca narso Jliaji IMINALRITI''. ⁵ Oopi mayami njaji jinirrinaipemi, oopi tsakja mayami njaji inoparrotacaperri. ⁶ Mitsa Noaco njite njaji lrinacoapanaperri, Nonalri nanaitjaca njaji norsoperri inoparrotacaperri, njaji yácoti jipa kjeya njaji jinirrinaipe niini njepaca njaji yácoti. Niini napadameta nawaopiakje njite naaco: ''Cayotsaji lriwaopia capisho pia wakjoete lrinaitjaca warso jliaji tsolrodaonai aimadan Italricanaa, nama njaji wanaitjaji, cayotsa Lrinaitjaca warso'' ⁷ Venticuatro jalredaoca naco once kérri naco, Sabat ikerrina naco, yamawalria naco talricanati Dario italricanaca naco, caaco jliaji IMINALRITI lrinoma lrikjoite jliaji inoparrotacaita Zacaría, Berequía irri, Iddo irri, lriaco cayoji: ⁸ ''Deepi ricó nocapa, njite, ¡Nocapaca! Ape atsia iofawa apana caballo irraini naco, njite lriemacawa napecolrico njaji jaico lrima mirto pacoaca cawa lrico jiipai; njite jliapodamjite niini tsakja njaji caballo irrainipe, kerramaperri, irsainipe, njite jalrenepe. ⁹ Njite Noaco: ''¿IMINALRITI, cocao njaji?'' Njite jliaji IMINALRITI i-angele cacolri noapiya lriaco norso: ''Njoa watsa icañjata picapa cocaca njaji picapalri.'' ¹⁰ Njite jliaji atsia yemalriwa jaicolrima mirto ipecolrico, jliepani cayoji: ''Icatsa njaji Dio imenacalri nanjícarro macadatsa jalredaoca lrico.'' ¹¹ Njite naaco njepaca jliaji IMINALRITI i-angele yemalriwa jaicolrima mirto ipecolrico: ''Wajicawa macadatsa jalredaoca lrico; picapa, namaodacatsa naofacawa njaji jalredaoca lricoperri njite nawafeta catoa.'' ¹² Njite jliaji IMINALRITI i-angele lriaco jliepacana: ''Pjia IMINALRITI, natalricanaa njaji tsolrodaonai aimadan, ¿Coancaojli pjenaotsa kjena watsa picapaca narso njaji Jerosalén lricoperri njite nanaco njaji yacaalre judá lricoperri?'' ¹³ Jliaji IMINALRITI shepa jliaji angele caacolri noapiya, yácoti matsiaperri iapiya, yácoti imaiyaketacaperri pja. ¹⁴ Njitedalri, jliaji angele caacolri noapiya iaco noirso: ''Pjiemata njite picaite: Cayo Lricaiteca Jliaji Tsolrodaonai aimadan italricanaa: ¡Matsinaa pia nowapaca nocaolre rikjoite jliaji Jerosalén njite cayo tsakja Sión nacó! ¹⁵ Matsina kerroaca njoa naapiya njaji jalredaoca lricoperri imaodacacaperri. Corri cadana kerroa cantja matsina Njoa naapiya, ima aima nanaitjaca namatsicanawa matsinaperri. ¹⁶ Cayoshopa Lricaiteca cayoji, Jliaji IMINALRITI natalricana njaji tsolrodaonai aimadan: Nodiaca tsenakja Jerosalén lricojle njite kjena watsa Nocapaca narso. Icatsa Lricaiterrica cayoji Jliaji tsolrodaonai aimadan italricana. Njorsa caotsa jliaji pawishopa Jerosalén nacó lripjeya toa nanaitjaca!'' ¹⁷ Pipieta tsenakja piwanaca kjaida, piaco cayoji: ''Cayo lricaiteca Jliaji tsolrodaonai aimadan italricana: Aima matsiaperri tsenakjaotsa narsoca njaji Noyacalre, njite jliaji IMINALRITI icatimataca tsenakjaotsa Sión, njite lriniwana tsenakjaotsa Jerosalén. ¹⁸ Ikena ¡Njorreta nocapa niini nocapaca cuatrona itsowati! ¹⁹ Njite caacoca njoa lrirso jliaji angele caacolri noapiya cayoji: ''¿Cocao njaji?'' Njite jliepaca njoa: ''Icatsa njaji itsowati imalri njenacawa njaji Judánai, Iraelnai njite Jerosalén lricoperri.'' ²⁰ Njite jliaji IMINALRITI icañjata nocapa cuatro cayecaperri. ²¹ Njite noaco: ''¿Cocao nano nadeji njaji inaiki?'' Njite jliepaca njoa, lriaco: Icatsa njaji itsowati imalri njenacawa njaji Judánai, wadee pada atsia jirreta cantja jliwida. Mitsa njaji inaiki canjaji nanoca njetana, napecó carroatsa njewao njaji itsowati nanakjoité-érri njaji apacoa jiipai macacoepe njaji jinicolriwa itsowati sho nakjoete njaji Judá lricoperri napocotá carrona njepaite ioya.''