Capítulo 7 (Aarón ipjeco ipadamawa ápiwa)
1
Wa-Minalri iaco moise irso: ''Nocadaca dio capisho pjia Faraón irso. Njite pipjerri Aarón, Nocadacani inoparrotacaita sho.
2
Picaiteotsa pjiomi njaji nonaalri Picaiteca. Njite pipjerri Faraón, lricaiteotsa Faraón irso lricadá-carro naawa jlipaite ioya njuaji Iraelnai.
3
Mitsa Notarrata caotsa Faraón icaolre ricó niní Nocada caotsa nacapa aima manaitja canaaperri nonaitjanda Njoida shó Egipto jipaite ricó.
4
Corriotsa Faraón jimí-carroca irso, niniotsa nocadaa nacapaca njoida njaji Egipto lricope, njerrapita caotsa lrikjaote. Cayoatsa njotáca papocope njapodawaca njaji nonaikite aimadan kjaidá-perri, njaji Irael inakjoite-perri, naacarro Egipto lrikjoite.
5
Njaji Egipto lricoperri nanjí watsa Dio-ca Njoa nacapa capoa Njoida njite njoida shó njotaca njaji iraelitanai naoya.''
6
Moise njite Aarón nanaitja cayó; cayoji Dio inaa capisho nanaitjaca.
7
Moise irso pia ochenta walria lri-pekirrica naco njite Aarón irso pia ochenta tre walria lri-pekirrica naco naa caojli pia caacona Faraón irso.
8
WaMinalri iaco Moise njite Aarón:
9
''Faraón inaa cadaa shá inaitjá-carro manaitja canaadalri, picaiteotsa Aarón irso: ''Pjipa pipeeco pjipajico lripadamá-carro apiwa Faraón icapá-carro.''
10
Ikena Moise njite Aarón naawa Faraón iderse, njite nanaitja cayoji Dio inaa capisho nanaitjaca. Aarón ipeeco jlipajico Faraón icapá-carro njite njaji lrirsoperri, njite jliaji Aarón jipajico ipadamawa apiwa.
11
Njite Faraón inaa nawanaca lrikjaolrewa njaji atsianai lrirsoperri canjikje-perri njite njaji malrirrinai. Njite nanaitja tsakja namalrirrica sho cayotsa Arón inaitja capisho.
12
Nacoamitsa njaji atsianai napeeco njepajico, njite napadamawa apiwa. Mitsa jliaji Aarón jipajico injaca nayarrona njaji malrirrinai.
13
Mitsa tarraca Faraón lricaolre naoya, corrin jlimica narso, cayotsa wa-Minalri icaite capisho narso.
14
Wa-Minalri iaco Moise njite Aarón irso: ''Tarraca Faraón icaolre ricó, niini corrin lricadaa naawa njaji inaiki aimadan.
15
Pia watsa tjewa piyompinaco Faraón iderse lria cadanacoatsawa oni canjerse. Piema watsa onicanje ricó picapaaca carroatsa lriapiya, pjipaotsa picaapi ricó jliaji pjiecote ipadamalri apiwa.
16
Picaiteotsa lrirso: jliaji NOMINALRI, na-Diote njaji hebreonai, lrimeenaca njoa piderse nocaité-carro pirso jliaji yacoti: ''Picadaa naawa njaji nonaikite, ná-carro naa matsadalri Norso jalrapocolri ricojle. Mitsa corrin pioma pjiepaca jliaji yaacoti.''
17
Njite cayo Lricaiteca jliaji wa-Minalri: ''Lrikjaote jliaji picapalriotsa piajíwatsa Dio-ca Njoa. Noñá watsa Ooni Nilo nacó lrisho jliaji jaicoapo norsolri nocaapi ricó, njite lripadamacaotsa írranatiwa jliaji ooni.
18
Mayamiotsa njaji copje ooni ricope niini éco caotsa jliaji ooni namá. Corriotsa nataitá carroca nairra jliaji ooni lrinakjoite njaji egipcionai.''
19
Njite Dio icaite Moise irso: ''Picaite Aarón irso cayoji: Pjipa jliaji pjipajico njite pipiajleta picaapi lrisho Egipto ionite cawa nacojle, ooni macapeki nacó, onipaokja nacó, nadanatacawa naco ooni, pjiomi nacadaacawa lrico ooni, napadama carroatsa írranatiwa. Pinaitjaotsa cayó niini carraotsa írranati pjiomi Egipto jipaite ricó, írranati tsakjaotsa nairra carroapa lrico nanaitjanda jaico shó njite nanaitjanda jiipada shó tsakja.
20
Moise njite Aarón nanaitja cayoji Dio inaa capisho nanaitjaca. Aarón jirreta lrijaicoapote njite lriñáca ooni naco, Faraón icapa cadanatsa njite njaji lrirsoperri. Niini lripadamacawa írranatiwa jliaji ooni.
21
Mayami pjiomi njaji copje ooni ricope, ikena eecoca jliaji ooni. Corrin kjerre nairra ooni njaji egipcionai njite írranati minitsa pjiomi Egipto jipaite ricó.
22
Mitsa njaji malrirrinai Egipto lricope nanaitja tsakja cayó namalrirrica shó, niini tarraca Faraón lricaolre naoya, corrin jlimica Moise njite Aarón irso, cayotsa wa-Minalri icaite capisho narso coaji caotsani.
23
Njite Faraón idiawa lriipana lricojle. Corrin coadaca lrirso jliaji lricapalri.
24
Njaji egipcionai njecaca oniapji tsoomi ooni macapeki ioya nataitá-carro nairraca ooni, ima corrica nataita nairraca ooni lrioya jliaji macapeki.
25
Siete jalredaoca jiyapawa waMinalri imatsiketa cayami naoya jliaji ooni.