Capítulo 29 (Cayo njenitaca Aarón njite njaji lrienipe Dio irso)
1
Cayoatsa pinaitjaca pjienitá carrona Norsowao nadejí-carro Norso sacerdotenai shó. Pjipaotsa apana toro pamoyoani toa, yaamana carnero mamatsikepetsa,
2
petje mewipetsa njite peetje jipandape meewipe tsakja njite ikefietaotsana aceite ricó. Pjipa tsakjaotsa petje jalritaperritsa mewipetsa piñjetanda aceite shó. Pinaitjaotsa njaji petjetape trigope shó nawititaji matsia.
3
Picadaotsana pada lricotsa tseeto pjiomi, pideotsana tseeto fiena picadaa carrona toro icodapi njite njaji carnero.
4
Pikepitanataotsa Aarón njite njaji lrienipe iwacaaca carroda ipananoma lrico. Picotsoatsa Aarón njite njaji lrienipe ooni shó.
5
Pjipaotsa njaji tsaaya sacerdote carroda Aarón, pjietaotsa lrinacó jliaji tsaaya jalripadalri matsiadalri, tsayana nacodalri jipolremaca, Lricoda nacodalri yapjiteda njite lricoda nacódalri. Pipapi lrinomakja naco joplre kjai maca shó namatsietanda matsia.
6
Picadaotsa lribonen jliwida nacó njite jliaji kerrete lrinacodalri jliaji lribonen.
7
Pjipaotsa jliaji aceite iñjetashopa njite piarroatsa jliwida nacó, cayoatsa piniwanaca Norsoni.
8
Pideotsa njaji lrienipe njite pjietaotsa nanaco natsayanalrewa.
9
Pipapiotsa naawalrekja Aarón nacó njite nanaco njaji lrienipe, njite picalrapi njewida nacó nabonewa. Cayotsaotsa pjienitacana sacerdote carrona caidalriwtsa, ima cayoca lricaiteca nanaco jliaji yácoti kjaidadalri. Cayoatsa pjienitaca Aarón njite njaji lrienipe nadejí-carro Norso.
10
Njite pideotsa jliaji toro iwacaaca carrodawa ipananoma lrico, njite Aarón njite njaji lrienipe nacadaotsa nacaapi toro jiwida nacó.
11
Njite lripananoma lricotsa jliaji iwacaaca carrodawa pinoatsa jliaji toro, Nocapacawa, Njoa IMINALRI.
12
Njte pjipaotsa toro irrana nakjoite njite piñjetaotsa picapjiwida shó altar itsowa nacó, njite njaji lriitepem piarroatsa altar itajida nacó.
13
Njite pjitaotsa pjiomi jliaji írranati lrishapi ricope, lrishopana iiti, njite njaji lritepe nacope, pjiomi njaji lriiti lriwawalricope, njite pimjaitaotsa altar nacó.
14
Mitsa njaji lriipe, lriyam, lriisha pimjaitaotsana pemajle lrioya jliaji iofacawa lricotoa. Icatsa ofrendaca imatsicanaa ikjaotedalri.
15
Pjipa tsakjaotsa apana carnero njite Aarón njite njaji lrienipe nacadaotsa nacaapi jliwida nacó.
16
Pinoatsa jliaji carnero, njite pjipaotsa lrírrana piwitsicá-carro lrinaco jliaji altar.
17
Picadowaotsa jliaji carnero pawajlepe, picotsoatsa njaji lrishapipe njite njaji lricotsipa, njite pjipaotsana jliwida fie picadaa carroatsa altar nacó.
18
Niniotsa pimjaita pjiomi jliaji carnero. Icatsa pada ofrenda Norsodalri, Njoa IMINALRI. Matsia watsa lriitan jirracawa Norso. Pada ofrenda imjaitanda tiyee ricó Norso.
19
Njite pjipaotsa jliaji apana carnero, njite jliaji Aarón njite njaji lrienipe nacadaotsa nacaapi lrinaco.
20
Pinoatsa jliaji carnero, njite pjipaotsa lrírrana nakjoite. Njite pñjetaotsa jlieni nacó atsialriema nacó, njite njeeni naco tsakja njaji lrienipe atsialriemjete tsakja. Njite piñeta tsakjaotsa lricaapi makjewi nacó njite jlipjewida makjewi naco tsakja atsiakriemaperri. Njite njaji lritepem piwitsicaotsa altar yecoa nacó nacoanatsa.
21
Pjitaotsa njaji írranati altar nacope njite jliaji aceite naijeta shopa njite piarroatsa pjiomini Aarón nacó, lritsayan nacó, lrienipe nacó njite natsayan nacó. Cayoatsa pjienitaca Aarón Norsó, cayo tsakja njaji lritsayan njite njaji lrienipe njite lrienipe itayan tsakja cayo lricayoshó.
22
Pjipaotsa lriiti jliaji carnero lriitipi nacope, lrishapi ricope, lrishopa nacope, lritepe nacope, pjiomi njaji irrocape nanacó njite lricotsipa atsialriemadalri, ima icacatsa carneroca njoenitsahopa jliaji sacerdote Norsowao.
23
Njite pjitaotsa tseeto lrikjoite jliaji pideji Dio ipeyajle paita peetje meewidalritsa, paita peetje jipandane trigope njite paita peetje jalritadalritsa meewidalritsa.
24
Picadaotsa pjiomi Aarón irso njite narso njaji lrienipe, pinaotsa nañocotacani ofrenda sho Nopeyajle, njoa IMINALRI.
25
Njite pjipaotsa napjeya pimjaitá carroatsa altar nacó ima ifrendacani imjaitanda. Pomení-dalri caotsa iitan Norso; pada ofrenda inaitjanda tiyé ricó Norso.
26
Pjipaotsa jliaji carnero icóda Aarón iyarrona ioya ikepitanata cádanconi, njite iñocota caotsani Nopeyajle ima ofrendacani Norsódalri, Njoa IMINALRI. Njite icatsaotsa jliaji piyarrowajleca, piñá-carro.
27
Pjienitaotsa Norso lricóda njite lricotsipa jliaji carnero piñocotaji Nopeyajle pikepitanata cádanaco sacerdotewa Aarón njite njaji lrienipe, njite picadaotsa narso naiñjá-carro.
28
Caidalri matsaotsa naaca Aarón irso, lrinakjoite jliaji maaficalri nainolri mana Dio irso matsoa shopana Lriapiya. Icatsa njaji Iraelitanai yaalrica nakitsindata shopa Aarón njite njaji lrienipe.
29
Njaji Aarón itjayani matsiaperri, imatsieta-catsaotsana narso njaji jliapodamperrimi. Nakepitanata cádanacoatsana Norsowaona sacerdote carrona, narsotsa njeetaca jliaji tsaaya nanacoa.
30
Coandalricatsa jimao irsoca jliaji tsaya nanakjoite njaji lrienipe, njite jlewa cadaotsa Noopana lrico, lridejí-carro Norso niiní, lri-ricowajle jliaji njoenitanada Norso, lrirsotsa jlietaca lrinacoa siete jalredaoca.
31
Pjipaotsa jliaji carnero ikepitanata shopami njaji sacerdotenai Norsowalre iyaná carroatsani Noyarrowajle ricó.
32
Njiteotsa Aarón njite njaji lrienipe naiñjacaotsani peetje fie nacadalri tseeto lricó lripananoma lrico jliaji nawacaaca carrodawa.
33
Nañjaotsa njaji iñjaodati nacadaji ofrenda shó naikjaote napíyo shopa naoya namatsicana, matsiaperri carrona njite njenitá-carrona sacerdote carrona. Corriotsa coca pja itaita iñacana ima matsiaperri iñjaopecana.
34
Niini cada pjatoa lriitemi tjewaijle, pirsotsa pimjaitacani. Corrin itaita iñjaca lrinakjoite ima matsiadalri cani.
35
Picadaotsa Aarón njite njaji lrienipe nanaitjá-carro cayotsaji Nocaite capishoi pirso. Siete jalredaoca watsa lriwiaca jliaji inaitjalri shenitá carrona sacerdotewa.
36
Inoatsa apana toro jalredaoca icoam Aarón njite njaji lrienipe imatsicana ikjaote. Njite piio tsakjaotsa apana maaficalri pimatsietá-carro jliaji altar imatsicanaati ioya. Njite piarrowatsa aceite lrinacó pjienitá-carro Norsowaoni.
37
Siete jalredaoca watsa piinoca maaficalri lrinaco jliaji altar imatsicanaai ikjaote, cayoatsa pinaitjaca pjienitá-carroni Norson. Niini, coca cada inota jliaji altar, icaamitsaotsa jlienitaacacawa Dio irso.
38
Jalredaoca icoam, corrin itaita imatadaca, inoatsa Norso yaamana cordero pawalriaperri ipekirrica.
39
Inoatsa apana piyompinacó njite apana dainomajle.
40
Lriinaitsa jliaji apana cordero initana iinoca, picadaotsa yamada kilo harina matsiadalri pikewitanda apjeco litro aceite olivope ricó, njite piarroatsa lrinaco ofrenda shó apjeco litro yaicotjeda yánaa.
41
Njite jiaji apana cordero, pinoatsani dainomajle. Cayotsa pinaitjacani pinaitja capisho jliaji apana piyompinaco, jlia minitsa harina, njite jaico tjedaa yánaa. Ofrenda imjaitanda tiyé ricó Norsoni, pomení-perri iitan Norsó.
42
Caidalritsaotsa jalredaoca icoam inaitja caotsa jliaji ofrenda imjaitanda Norso, cayo tsakjaotsa nanaitjacaotsa njaji walricomanai. Awatsa inaitjani pjewacawa lricó lrirso jliaji iwacaaca carrodawa lrico, Nopeyajle, njoa IMINALRI, noketaacalriotsa yaapiya caacó-carro Njoa irsó.
43
Icatsaotsa nirse Noketaacacawa naapiya njaji iraelitanai, lri-ricowajle jliaji Njoenitanda Norsowao Nomatsia ikjaote.
44
Njoenitaca Norsowao jliaji Noyarrowajle njite jliaji altar naofá-carro noinai fawacatsa. Njoenita tsakja Norsowao Aarón njite njaji lrienipe nadejí-carro Norso sacerdotenai shó.
45
Nofawatsa napecolrico njaji iraelitanai njite na-Diote caotsa Njoa.
46
Najíwatsa na-MINALRI Dioca Njoa, jliaji jitalrina Egipto lrikjoite, notaitá-carro Nofaca napecolrico. Icatsa Njoa IMINALRI Dio.