Capítulo 22 (Yácoti kjaidá-perri caikjaolrenaa cadaa pjaa)
1
Ape iñaito cadaa apana buey o apana oveja, njite lriinoni o lriwendeni, niniotsa lrirsotsa lridietaca cincona buey apana icoada njite coatrona oveja apana oveja ocoadao.
2
Naoketa cadaa pada keñaitedalri lrimatsiketaca jliewá-carro, njite nañaacani o nainoni lrikjaote jliaji lrinaitjalri, corriotsa camatsicanaa carroca jliaji iinocadani.
3
Mitsa jaalrecadaa lriicao, niini dekja narsotsa njerrapiteetaca jliaji iinocada jliaji keñaitedalri. Njite jliaji keñaitedalri lrirsotsa lricaoñaca jliaji lriñaitolri, njite corricadaa lrirso lricaoñashopa, narsotsa nawendeecani coshoca nacoada njaji lriñaitolri.
4
A cada jliaji maaficalri caafitsa lriipana lrico, buey cadaa, borro cadaa, oveja cadaa, lrirsotsa lricaoñaca yamapiape lricoadawa.
5
Ape idee cadaa njaji lrivacan naiñjá-carro paapji malritsiapji ricó o lrikinkerre ricó, mitsa corrin lriwapaca njaji lrivacan njite naiñjaca ape ivacaapjirre lricotsa, jliaji vaaca iminalri lrirsotsa lrimatsietaca lricoadawa nasho njaji matsiaperripja lrirsolri lrivacaapjirre ricó o lrinikerre ricó.
6
Pada iwaca cadaa tiyé njite jliaji tiyé lriawa njite lrimjaita paniati iinaca, paniata ipananaa, paniapji walriapjipe o lrimjaita pjiomina, jliaji imjaitacada lrirsotsa lricaoñaca jliaji lrinaitjalri.
7
Ape icadaa cadaa lripalraatani o lriyarroaji lricodapidalri iwapá-carro lrirsonjite nañaito lrioya lriipana lrikjoite, njite naoketa cadaa jliaji inaitocadan, jliaji keñaitedalri lrirsotsa lricaoñaca yamapiape lricoadawa jliaji lriñaitolri.
8
Corri cadaa naoketa jliaji keñaitedalri, jliaji panti iminalri irsotsa iacawa naikjaolre njaji icaite caperri naacona nacapá-carro jliacatsa iñaito lricodapí dalri iyárro.
9
Coadalri catsa imatsicanaati ikjaote, buey cadaa, borro cadaa, ovejacadaa, tsaaya cadaa o coandalri catsa iñaawa njite pada icaite lriljaote: ''Noyadaca jliaji.'' Yamadape narsotsa naacawa naikjaolre njaji icaitecape naacona. Coca cadaa naokjeta imatsicanaa njaji icaitecape naacona, lrirsotsa lricaoñaca yamapiape lricodapidalri irso.
10
Ape atsia icada cadaa lricodapidalri irso apana borro, apana buy, apana oveja o coajidalricatsa maaficalri lriwapá-carrotoa lrirsoni, njite jliaji maaficalri lriá mayamini o pokjoncani o nañaitocani njite corrin coca icapan,
11
yamadape narsotsa nanaitjaca yácoti ajádalri shó Dio ipeyajle, nacaitecawa corricatsa coca nanakjoite iñaito jliaji nacodapidalri iyárro nacó. Jliaji naminalri corriotsa lriomá-carro nacoadawa lriinai, njite jliaji nañaitolri ioya corriotsa lridietá carroca nacoadawa.
12
Mitsa nañaito cadaa lrikjaolrena, lrirsotsa lricaoñaca lricoadao lrirso.
13
Njite caiñjacana cadaa lrikjaolrena jliaji maaficalri, njite lrirso pada icapacada lriinai. Corriotsa lricaoña carroca lrikjaote jliaji cañjacanaalri.
14
Ape jita cadatoa lricodapidalri iinai ípirra njite pokjoncani lrikjaolrena njite mayamini corri cadanatsa lriminalri icapan, jliaji caikjaolrenalri lrirsotsa lridietaca lricoadawa.
15
Mitsa lriminalri jliaji maaficalri icapacadaatsa, corriotsa lricaoñá-carroca lricoadao; lridee cadaa piani lridejicalre icoadawa, icaamitsa lricaoñaca lridejicalre nacó.
16
Ape atsia ipeyoaca cadaa apama ínarro corri-darro toa jiyapawa ape iapiya, njite lridakita roapiya, lrirsotsa jlitaca lrinoano njite lrirsotsa lricaoñaca rocoadawa cayji nacaite capisho.
17
Mitsa corri cadaa rsonirri ioma lriacano lrirso jliaji iomacadano, lriaji atsia lrirsotsa lricaoñaca palraata sho coshoca lricoada jliaji rodaki corridalri piatoa yají atsia.
18
Corriotsa icadaacarroca caafi rsoaji malrirri.
19
Coca cadaa idakita maaficalri iapiya, lrirsotsa mayamican.
20
Coca cadaa iino maaficalri padatairritsa dio lrioya jliaji wa-Minalri, narsotsa mainocani.
21
Corriotsa itaita imatsiketaca jliaji pada jiipai nacoda, corrin tsakja itaita jirrapitetaca, ima cayo pia tsakja shá njepaite ricojle njaji Egipto lricope.
22
Manaitjatsa maatsi madoiyoanaipe, corrin tsakja njaji mjanirrinaipemi.
23
Jirrapiteeta cadanana njite natatja noinai Njoa, JLIAJI IMINALRITI, Njomiotsa narso.
24
Kerroatsa Njoa pekirritsa njite nonoatsani matseta shó, niniotsa madoiyoa naninai njite mjanirri neenipe.
25
Yá cadatoa ipalrantan pada nonaikite aimadan inakjoitedalri kjenaadalritsa, mjeta tjaotsa lrioya lrinacopja jliaji palraata cayoji nanaitja capisho njaji yaacape toa palraata.
26
Lricadaa cadatoa pirso lritsayanalre lricaiteshopa lricaoña caotsa pjia, pidietaotsa lrirsoni deepi ipjeya toa,
27
Ima corri cadaa lrirso lritsayanalre japerri ioyadalri, corriotsa cocashoca lridanataacawa japerri ioya lrimaa cádanacoena. Njite lritatja cádanacoatsa Noinai Nokitsindatá carroni, Njomiotsa lrirso ima kjenaadalrica icapa pada irso Njoa.
28
Macaitetsa yácoti maatsidalri Dio nacó, corrin tsakja njaji talricanaati iwapacape shá.
29
Iniwa cádanacoatsa ipia iinaca yáwatsa Norso njaji initanda iniwaca, njite njaji initanda jitaca jaico tjedaa yáana tsakja. Wadeotsa iwapa catoa. Yá watsa norso njaji yénipe pjerritinaipe.
30
Cayo tsakjaotsa njaji ípirra buey njite njaji oveja. Siete jalredaoca watsa najicatoa njadoa iinai, njite ocho jalredaoca nacó irsotsa iaca Norsona.
31
Nonaikite aimadanca shá shenitaaca capeo Norso. Corriotsa itaita iñjaca maaficalri caiñjacanaadalri; icadaotsa tsiino iñjaona.