¹ Madalriwalria naco talricanati Dario italricanaca lrico, Judá italricana, jliaji Nabucodonosor, Babilonia italricana, lrino Jerosalén lricojle njite lridanataca pjiomi jliaji yacaalre wadee nadeeca iñjaodati narso nirse. ² Jliaji Iminalriti icadaa Nabucodonosor shamaca jliaji Judá italricanaa Joacim, njite jlipa tsakja padapena nanakjoite njaji nadejishopa Dio ipanalricope. Lridena Babilonia jipaite lricojle, lri-diote ipana lricojle, njite lricadaa pjiomi njaji cacoadaperri lrideji lri-diote iipana lrico. ³ Caaco jliaji talricanati Nabucodonosor Aspenas irso, caconaite idenjicada lrirso, lridé-carro lrirso apepena inaiki nanakjoite njaji talricanati iipaneta lrikjoitepe njite nanakjoite njaji caconaperri nirseperri, ⁴ atsianai yempetiapape toa marsocapetsa imatsica, matsiapalripe icapacana, canjikjeperri, pakjami-perri ianjikjeti sho, nayekjetaji, njite itaitacaperri idejica talricanati dapana lrico. Lricanantá-carro paperra naco njite naaco njaji babilonionai. ⁵ Jliaji talricanati lricaite narso cocacaotsa njaji naiñjalri cayotsa lriñjacaji sho, njite nanakjoite njaji lrirraope tsakja. Madalriwalria icoantja nacanantaca njaji walriapalripe toa, njite dekjena nataitenantja nadejica talricanati irso. ⁶ Njite nanakjoite njaji yempetipe toa niini piaca naiani Daniel, Anania, Misael, njite Asaría tsakja, padapena nadeji nakjoite Judá lrikjoite-perri. ⁷ Jliaji caconaite lricada tecojle nakja neepitanawa: Lricadaa nakja Daniel ipitanawa Beltasar; Asaria ipitanawa lricadaa Sadrac, Misael ipitanawa lricadaa Mesac, njite Azaria ipitanawa lricadaa Abed Nego. ⁸ Mitsa Daniel icaiteca lricaolre lrikjoite corricaotsa lrimatsicacawa nasho njaji iñjaodati iñjalri njite lrirralri tsakja. Niini lritatjacawa lriinai jliaji caconaite wadee lriaca lriñjawa njaji iñjaodati. ⁹ Diotsa icadaa matsiá-carro caconaite icapaca Daniel irso. ¹⁰ Jliaji caconaite iaco Daniel irso: ''Nofiocawa notalricana iiwana. Ima lrinaca fa wacarro irso iñjawa njite irrawa tsakja. ¿Coadao ioma lricapaca ewapalripeca icapacana naoya njaji apjetsida? Jliaji talricanata lritaita lrinaaca nainoca njoa ikjaote.'' ¹¹ Njite caacoca Daniel lrirso jliaji yajicaita nanaco, lricadalri jliaji caconaite lriajícarro Daniel naco, Anania naco, Misael naco njite Azaria naco tsakja. ¹² Daniel iaco lrirso: ''Pinaitja matsiacalri, piwi toatsa wanaco die jalredaoca icoa pia cawa waiñjao tsiatsipje njite wairrao ooni tsa. ¹³ Njite watsa picapatjaotsa coajica wacapacana naapiya njaji apjetsida yempetipe toa iñjacaperri nanakjoite njaji talricanati iñjalri, njitenaotsa pinaitjaotsa warso cayoji pioma capisho pinaitjaca wapiya coaji cadaotsa picapaca fa.'' ¹⁴ Njite jliaji iwapacaitana jliepa lrinaitjacarro napiya cayoji Daniel icaite capisho lrirso, die jalredaoca icoa. ¹⁵ Die jalredaoca shapodam lricapa neecoa njaji matsia pja naoya njaji apjetsida, njite kjaidaperri pjaca naoya njaji yempetipe toa iñjacaperri talricanati iñjaope nakjoite. ¹⁶ Niini jliaji iwapacadana idee naoya njaji naiñjaope, nairraoda tsakja njite lriaca naiñjao tsiatsipje tsa. ¹⁷ Njite njaji coatrodee yempetipe toa, Dio icadaa narso yajikjeti njite najícarro coajica nacanantaca pjiomi paperra naco njite cajikje carrona, niini Daniel itaita pia yajica icapaca pjiomi cocacatsa nawaopiakjeti naco njite jitaponti naco tsakja. ¹⁸ Njite njena iocakenawa talricanati icadanda narso njewa carroenawa, jliaji caconaite jiwidapo idena Nabocodonosor ipeyajle. ¹⁹ Caaco jliaji talricanaati naapiya, njhite napecolrico pjiomi njaji apjetsida corrin pacapa apada nanakjoite Daiel, Anania, Misael njite Azaria icayosho. Nemacawa talricanati ipeyajle lricapá carrona, nawapaketsa nadejícarro lrirso. ²⁰ Pjiomi nanaco njaji yajikjeti, iyekati talricanati itatjalri jlimiona inaco, die piape pja matsia pjaca naoya njaji yanjicaperri jiwirsida irrocawa naco, njite naoya njaji icaitecape nataitaca caacocana mayamiperri iapiya, njaji iofacapewa lritalricanatacawa lrico. ²¹ Daniel iofa pia niiniwa a kjrreca talricanati Dario inita pia italricanataca.