¹ jliapodamjite njai jiyapalrio, David itatja jimio wa-Minalri iinai, lriaco: ''¿Capja norsocatsa noacawa pacoa yacaalre ricojle Judá lricoperri?'' Njite Dio icaite lrirso: ''Aja, David, pirsotsa piacaw.'' David iaco: ''¿Coandalri yacaalre lricojle norsotsa noacawa?'' Dio iaco lrirso: ''Hebrón lricojle.'' ² Ikena David iacawa naapiya njaji yamamade lrininai, Ahinoham Jezreel lricodarro, njite Abigail, Carmel darro, Nabal iinom. ³ David idee pjiomi njaji atsianai lrinaiperri, njite nadee nacoanami nakitsiñape Hebrón lricojle, naacarro naofa nirse. ⁴ Niini nanoca njaji inaiki Judá lricoperri nacadaa-carro Judá italricanao David. Naaco David irso: ''Njaji atsianai Jabes Galaad lricoperri opina nadawa Saul idadami.'' ⁵ Niini David imeenaca atsianai ideecaperri iacoti narso njaji atsianai Jabes Galaat lricoperri, lriaco narso: ''Matsiaperrica shaa Dio nakjoite, ima icañjata ajadalriperrica shaa yoma piaca jliaji iminalri Saul idawa capoani matsia. ⁶ Niini panaya, Dio watsa icañjata icapa yaacoti ajádalri corricaotsa lrimaca-cá shaa. Njite matsiá tsakjaotsa nocapaca irso jlrikjaote jliaji inaitjalri. ⁷ Kjaidenaotsa shaa, ikjaidataacawa ima oopica mayami jliaji iminalri Saul, njite njaji Judá poco naniwanaca njoa natalricanao-carro njoa nanaco.'' ⁸ Mitsa Abner, Ner irri, jliaji Saul itsolrodaonai icomandanteni, jlipa lridee Isboset, Saul irri Mahanaim ikjaolre. ⁹ Lricadaa Isboset-carro talricanaati Galaad nacó, Gesuri, Jezreel, Efraín, Benjamín njite nanaco pjiomi njaji Iraelnai. ¹⁰ Isboset, Saul irri, lrirso piakena coarenta oonia lriniita caojli lritalricanaataca Irael nacó,yamawalria lritalricanaataca nanaco. Mitsa njaji Judá poco naawa David shapodamtsa. ¹¹ Siete oonia njite sei keerri pja lrinacojle, talricanaati cawa David nanaco njaji Judá poco Hebrón lrico. ¹² Abner, Ner irri, njite njaji Isboset, Saul irri irsoperri, naawa Mahanaim lrikjoite Gabaón lricojle. ¹³ Njite Joab, Sarvia irri, njite njaji David irsoperri naatsakjawa njite naoketana nadanatacawa lrico ooni Gabaón lrico. Icatsa naaca naofa niinio, apapoco yoofawa pema lrirso jliaji ooni nadanatanda njite njaji apapoco nacoemjetetsa. ¹⁴ Abner iaco Joab irso: ''Picadaa njaji atsianai yempetipe toa njamaacá-carro wakjoete.'' Niini Joab iaco: ''Jinicoa shaa yempetipe toa.'' ¹⁵ Niini njenicocao njaji atsianai yempetipe toa njite nawacaacawa, Doce Benjamín poco irso Isboset iapiya, jliaji saul irri, njite doce narso njaji David irsoperri. ¹⁶ Nacoamitsa njaji atsianai njepaca nacoema jiwida naco njite pada itoda lricoema iparrema naco matseeta sho, niini yamadape mayamicana. Nini nacadaaca lriipitanai niini hebreonai yaaco lrikjoite: ''Helcat Hazurim,'' o ''Nainoaca cawa matseeta sho.'' Pacapacani Gabaón lrico. ¹⁷ Matsinaa pia nainoacacawa pia jliadaa njite Abner njite njaji atsianai nIrael lricoperri corrica nataita nakjoete njaji David irsoperri. ¹⁸ Niini pia nainai njaji madalridadee Sarvia yenipe: Joab, Abisai, njite Asael. Kjeya-dalri cadaana jliecocawa jliaji Asael neerri sheeco capisho awacada lrico. ¹⁹ Asael ipineeta tsoomipe Abner njite corrin jlienaca lrioya. ²⁰ Abner icaboco icapa jliapodamrse njite lriaco: ''¿Capja Asael-ca pjia?'' Njite jliepani. ''Aja, njoatsa.'' ²¹ Abner iaco Asael irso: ''Picapa piyekemajle naco o pipatojliemajle naco, pjipa pada nanakjoite njaji yempetipe toa njite pidee lrinoacashopawa.'' Mitsa corrin Asael ioya jienaca lrioya. ²² Abner iaco tsenakja Asael irso: ''Ajena pipineetajica njoa. ¿Cotsa nomjenca noinoca pjia? Noino cadantja pjia, ¿Corrinatsantja notaita carroca nocapaca jliekjoete jliaji pipjerri Joab?'' ²³ Mitsa corrin yaami Asael ipineetacani, nini Aber itodacani lrimolricon mjetacodalrim sho lridaki naco njite lrimotowa pemajle. Niinitsa Asael jiwa mayamini. Njite pjiomi njaji jiyapacapewa ninio njite nacapa Asael jiwacarromwa, neema toa mananitsa niini nacapá carro. ²⁴ Mitsa Joab njite Abisai napineta Abner. Mitsa dainoma ketsa naicawa naoca cádanacoa jiipana Amma ipocoda nacojle, jliaji tsoomi-dalritsa Gia ioya lri-ricoda jliaji inipo yaacadawa jalrapocolri ricojle Gabaón lricoda. ²⁵ Pjiomi njaji atsianai Benjamínai nadaanata Abner njite njenico neemao jiipana ipocoda naco. ²⁶ Njite abner iwanaca Joab, lriaco lrirso: ''Corrinatsa wataita wainoacacawa wakjoete-wacatsa matseta sho. Ima caimi cadatsa wanaitjaca piajintsa coanca maatsi catsaotsa feyapacawa. Picaite njaji pinaiperri yami carroena napineetaca fa ikitsiñapetsa.'' ²⁷ Njite Joab sheepani, lriaco: ''¡Caafidalrica jliaji wa-Diote, corri cadantja picaite cayoji picaite capisho, njaji notsolrodaonai corrintja yaami napineetaca njaji nakitsiñapetsa jaalretsantja naicao!'' ²⁸ Ikena Joiab ipjiaca lri-trompeta niini njaji lrinaikite yaamica napineetaca njaji Iraelnai, corrinatsa nainoacawa. ²⁹ Abner njite njaji lrinaikite naawa depjite Arabá lricó. Nayoeta jliaji Jordán njite naapjawa tjewaijlena piyompinacojle, naocá carroenawa Mahanaim lricojle. ³⁰ Joab idiawa Abner ioya lripineeta cayamini. Lriwaketa pjiomi njai lrinaikite icaamitsa canacaica Asael njite diecinueve tsolrodaonai David iyape. ³¹ Mitsa njaji David itsolrodaonai naino pia treciento sesenta atsianai Benjamín poco inaikite Abner iapiya. ³² Nepa Asael idakimi nadawá carroni jlinirrim irrirriapjirre lricotsa, Belén lrico. Joab yaawa naapiya njaji lrinaikite depjite, jaalre naicawa Hebrón lrico.