¹ Vente walria jiapodam, Salomón inaitja caami Dio iipanawa njite lriipanao catsa, ² lripieta jlirretaca njaji yacalrewape Hiram iaji Salomón irso lricadaa carro naofawa njaji Iraelnai nirse. ³ Salomón inoacawa Hamat ikjoete njite jliametani. ⁴ Lrinaitja jliaji yacaalre Tadmor jalrapocolri rico, nja tsakja njaji yacaalre namatsieta carroda nanaani, lrinaitja pjiomina Hamat rico. ⁵ Lrinaitja tsakja Bet Horón jiipana nao njite Bet Horón tjewacajlerse, yacaalre taimí perri idana, irsocape pantinoma njite pantinoma idanaita pja. ⁶ Lrinaitja tsakja jliaji yacaalre Baalat njite pjiomi njaji yacaalre lrimatsietacawa nja lrinaani lrisompe, lrimatsietacawa nja carreta jiape, njite naofacawa njaji inaiki jiecocape caballo naco, njite pjiomi njaji lriomaji pia lrinaitjaca Jerosalén lrico, Líbano njite pjiomi lriricoda jliaji jiipai jliacawa ianjíi ianco. ⁷ Njite njaji inaiki namacaji nanakjoite njaji hititanai, amorreonai, fereseonai, heveonai njite njaji jeboseonai, njaji corriperritsa Iraelnaica, ⁸ njaji namacaji njaapodam njepaite rico, njaji coirri perripiatsa naino njaji Iraelnai, Salomón icadaa nadenjí carro jiidati rico, caimicatsana panajiete. ⁹ Mitsa, corrin Salomón icadaa nadenjí-carro jiidati rico njaji iraelitanai, iacamitsa lricadaacana tsolrodao carrona lrirso, comandante carrona, caconaaperri, njite comandante carrona nanco njaji caballo irsocape carreta fiape njite nanacom njaji jiecojicape nanaco. ¹⁰ Caconaperri tsakja, ianjicaperri, icapaapenjaji idenjicape talricanaati Salomón irsoperri, dociento cincoenta namaimaca njaji icapacape njaji idenjicape. ¹¹ Salomón idee pia Faraón iito teecotsa lrioya jliaji David iyacalre lri-ricoda jliaji panti lrinaitjanda rorso, ima lricaite cayoji: ''Rsoaji noino, corrin rotaita rofacawa David iipana lrico, Irael italricanaa, ima kjerrecawa catsa lriofawa jliaji Dio ipatowani paafe corricawatsa pacapa maatsidalri.'' ¹² Njite Salomón imjaita maaficalri Dio irso lrinaco jliaji altar lrinanda nanaitjaca lripananoma icoemjete. ¹³ Lriino maaficalri cayotsa nanaitja capisho jalredaoca icoami; lrinaitjatsa cayoji lrinaa capisho njaji iacoti icaitecape coanca panaitjaca cayoji Moisé idana capisho sabado lrico, keerri walripi naco, njite nanaco njaji nacatimatacawa lrico nanaitjalri madalripia pawalria naco: nainjacawa peetje meewidalritsa, nawacaacacawa panja semana, njite nacatimatacawa Tabernaculo iipitana naco. ¹⁴ Lrinaitjatsa cayoji lridana capisho jlinirri David, niini Salomón icadaa nadenjí carro njaji sacerdotenai papocope, cayo tsakja njaji levitanai, naa carro matsiadalri dio irso, njite nadenjí carro narso njaji sacerdotenai, cayotsa nadenji capisho jalredaoca icoam. Lricadaa tsakja nadenji carro papocope njaji iwapacape pantinoma, pantinoma icoami, ima jliaji atsia Dio irsodalri, David, inaa pia tsakja nanaitja carro cayo. ¹⁵ Njaji inaiki corrin nanaitja teecojle lrioya jliaji talricanaati inaa capisho nanaitjaca njaji sacerdotenai njite njaji levitanai coandalri naco catsa, njite nanaco njaji namatsietaji. ¹⁶ Pjiomi njaji idenjikjeti Salomón inaalri nanaitjaca, oopi nanaitja pjiomi, Nainita caojli napeecoca jliipoco jliaji Dio iipana atee kjerreca nataitani. Cayotsa nataita jliaji Dio iipana pjiomi. ¹⁷ Njite dalri Salomón iawa Ezión Geber njite Elot lricojle, lrinomapiana naco jliaji jiipai Edom lricoda. ¹⁸ Hiram imeenaca iita macafianipe najimpe inaco njaji caconaperri ianjicape ianjicawa manoa lrico. Naawa nainai njaji Salomón irsoperri Ofir ricojle. Nadee njite dieci sei mil kilo rico owirro nacadaji talricanaati Salomón irso.