¹ Njite njaji inaiki njepa njeeta Josia irri, Joacaz, natalricanaawan jlinirri iarrontacao, lritalricanaatá-carro Jerosalén lrico. ² Joacaz irsopiakena ventitre walria lripekirrica lriniita caojli lritalricanaataca, madalripitsa keerri lritalricanaata Jerosalén lrico. ³ Egipto italricanaa ideeni Jerosalén lrikjoite, njite lrinaa nacaoñacani tre mil treciento kilo sho palraata njite trenta y tre kilo sho owirro. ⁴ Egipto italricanaa icadaa Joacaznjite Jerosalén nacó tsakja, Naco icadaa Joacim nakja Eliaquim iipitanawa. Njite Necao idee Eliaquin ipjerri Egipto lricojle. ⁵ Joacim irso piakena venticinco walria lriniita caojli pia lri talricanaataca. Once walria lritalricanaataca Jerosalén lrico. Joacin inaitja maatsi Dio ipeyajle. ⁶ Njite Nabocodonosor, Babilonia italricanaa, inoacawa lrikjoete njite jlípa lripapini cadena sho lridee-carroni Babilonia lricojle. ⁷ Nabucodonosor idee padapena nanakjoite njaji cacoada perri Dio iipana lricope Babilonia lricojle, njite lricadaa talricanaati dapana lrico Babilonia lricoda. ⁸ Nanaco nja paana Joacim inacoapanaperri, njaji dofenaaperri lrinaitjalri, njaji naoketalri lrikjoete, pacapacana lri-ricoda jliaji paperra nanacoapanaperri njaji talricanaatinai Judá lricope njite Iraelnai tsakja. Njite nacadaa lrirri Joaquin talricanaati-carroni jliapodam. ⁹ Joaquin irsopiakena ocho walria lripekirrica lriniita caojli pia lritalricanaataca. Lritalricanaata pia madalripi keerri njite die jalredaoca pja lrinacojle Jerosalén lrico. Lrinaitja maatsi Dio ipeyajle. ¹⁰ Camoy iniita cádanaco, jliaji talricanaati Nabocodonosor imeenaca atsianai tsolrodaonai nadee-carroni Babilonia lricojle, nadee tsakja njite njaji cacoadperri Dio iipana lricoperri, njite lricadaa Sedequia, lrikitsinda, jliá-carro Judá italricanaa njite Jerosalén. ¹¹ Ventiuno walria piakena lripekirrica jliaji Sedequia lrinita caojli pia lritalricanaataca; once walria lritalricanaata Jderosalén lrico. ¹² Lrinaitja maatsi Dio ipeyajle. Corrin kjenaa lricapaacawa lricapa cádanaco jliaji profeta Jeremia, jliaji caacolri pia Dio naco. ¹³ Sedequia iema tsakja talricanaati Nabocodonosor ikjoete, jliaji icaiterri pia Dio ipeyajle matsia caotsa lrirso. Mitsa Sedequia itarrata lriwaopiakje, lricaolre wa-Minalri ikjoete, naDiote njaji Iraelnai. ¹⁴ Njite tsakja, pjiomi njaji sacerdotenai iapiyawalrenai njite pjiomi njaji inaiki corrin matsiacana Dio irso, nanaitja pjiomi njaji dofenaperrimi nanaitjalri njaji apaana inaiki. Nanaitja maatsi Dio iipana irso lrisho jliaji nanaitjalri, jliaji jlienitanda pia lrirsowawa Jerosalén lrico. ¹⁵ Jliaji na-Minalri, naferrinaipemi iDiote, imeenaca iacoti narso aimawalria nanakjoite njaji jiyapetacaperri lriaco, ima kjenaa piaca Lricapaca lrinaikite irso njite lrikjaote jliaji panti Lriipitana iofalri pia niinio. ¹⁶ Mitsa njaji inaiki necaacatsa naicao njaji ideecaperri Dio iaco, namenata naoyao Lriaco, necaa naicao njaji profetanai, atee kjerreca Dio irroa jinico nakjoete, njite corrinatsa coca itaita ikitsindatana. ¹⁷ Niini Dio imeenaca naikjaolre Caldeonai italricanaa, icatsa jliaji iinolrica njaji iempetipetoa matsetasho santuario lrico, corrin kjena lricapaca narso njaji walriapalripetoa, coshoca njaji inaitjepe walriaparropetoa, njite njaji pekipenai, njaji jaalré-perrina itsicolre, Dio icadaana talricanaati icaapi ricona. ¹⁸ Pjiomi njaji inaaniti Dio iipana lricope, njaji tsodalripe njite macadalripe, njaji cacoadaperri Dio iipana lricope tsakja, njaji cacoadaperri talricanaati iyarroaji naapiya njaji lrirsoperri caconaaperri tsakja, pjiomi njaji lriniwalri oopi lrideena Babilonia lricojle. ¹⁹ Namjaita jliaji DIo iipana, najolronta Jerosalén iwaimi, namjaita pjiomi talricanaati-dapana, namatsiketa pjiomi njaji matsiaperri nimperri pia. ²⁰ Babilonia italricanaa idee pjiomi njaji yomjeperri piatoa lrimatsetani ioya. Lricadaa lrirsoperricana naapiya njaji lrienipe Persia italricanaaca nacojle. ²¹ Cayotsa jiyapacawa lrioca carrotsa jlinaana jliaji wa-Minalri icaitenta Jeremia inoma lrikjoite, cayotsa lriwafetacawa jliaji jiipai lriwafeeta carrodáa lrico. Lriwafeta jliaji jiipai pjiomi jliwica maminalri cádanaconi, setenta walria oonia maminalricani. ²² Njite, Ciro, Persia italricanaa, lriniitacarro walria lritalricanaataca, lrioca carrotsa jlinaana jliaji wa-Minalri icaitenda pia Jeremia inomalrikjoite, wa-Minalritsa ipomenata Ciro icaolre rico, Persia italricanaa, lricadaa-carro pjiomi iajii lriwapacawa lrico jiipai, njite lridaná-carro tsakja njaji lricaiterri paperra lrico. Cayo lriacoji: ²³ ''Cayo nocaiteca, njoa Ciro, Persia italricanaa: ''Jliaji WAMINALRI, jliaji Dio eenolricojlé-dalri, lricadaa norso pjiomi njaji talricanaaticoape jalredaoca lricoperri. Lrinaaca njoa nonaitjá-carro padapana panti Lrirso Jerosalén lricojle, jliaji Judá lricoda. Coandalri cadaa inakjoite Lrinaikitecani, idiawa jipaite ricojle, njite iMinalri Dio ikitsindatawatsani.''