¹ Mayami Josafat nainai njaji lriferrinaipemi, nadawani nacodapitsa David iyacalre rico. Njite lrirri Joram jimao talricanaatica jliapodam. ² Joram irso pia lriwenaipe, Josafat ienipenaipe: Azaria, Jehiel, Zacaria, Azaryahu, Micael, Njite Sefatia. Icatsa pjiomica njaji Josafat ienipe piaca, Irael italricanaa. ³ Josafat iáa pia narso macaoña canaatsa aima palraata, owirro, inaaniti cacoadaperri matsiaerri, lrinaitja tsakja narso yacaalre taimí perri Judá lrico, mitsa jliaji talricanaatiapani lricadaani Joram irso jlia capoa lrienipe pjerriti. ⁴ Njite Joram iofa cádanacoena matsia talricanaati sho jlinirri jiapodam corriketsa coca jita njiteni, lriino pjiomi njaji lriwenaipe matseta sho, lriino tsakja aima Iraelnai iapiyawanai. ⁵ Joram irsopiakena trenta oscho walria lrinita caojli pia lritalricanaataca, ocho walria lritalricanaataca Jerosalén lrico. ⁶ Lrinaitja cayoji nananitja capisho njaji talricanaatinai Irael lricope, nanaitja capisho njaji Acab iipaneta, ima jlita piaca lriinowa Acab iito. Lrinaitja maatsi Dio ipeyajle. ⁷ Mitsa caicayatsa, corrin Dio ioma iwayaketaca njaji David inakjoite perri, lrikjaote jlaji iacoti lrinaitjalri pia lriapiya; Dio icaite piaca David irso lrienipe inakjoite perri catsaotsa njaji italricanaatalriotsa jliapodam. ⁸ Joram jiawalri pia, Edom yeema lrikjoete jliaji Judá italricanaa, ima nacadaaca narsowao njawaacatsa pada natalricanaawa. ⁹ Njite, Joram iawa naapiya njaji lricomandantenai, njite lridee tsakja pjiomi njaji lri-caballon cacarretanpe. Njite njaji Edom lrikope na-korrarrata Joram, lri-comandantenai njite njaji lri-caballon cacarretanperri, mitsa deepi rikotsa njenico napitó carro naoya. cayotsa napitocawa njaji Joram inaikite naapana lrikojle. ¹⁰ Cayo pienatsa Edon iemacawa Judá iajicawa nanaco atee panajiete. Cayo tsacja njaji Libna lrikoperri, corrinatsa Judá iajica nanaco, ima Joram imacaca na-Minalri, lriferrinaipe iDiote. ¹¹ Njite Joram inaitja pja njaji yenondalripe awacada naco Judá lrico, njite lricadaa njaji inaiki Jerosalén lricope nanaitja carro macadatsa nadada sho nacayosho njaji inaitjepe cawilreperrimi, lricadaa nanaitjaca maatsi njaji Judá lricope. ¹² Elía idananda paperra iocawa Joram irso lricaitecawa cayoji: ''Cayo lricaiteca jliaji wa-Minalri, pi ferrim David iDiote: ''Corri capoa pinaitja cayoji pjinirri Josafat icayosho, corrin tskja Asa inaitja capisho, Judá italricanaa, ¹³ 13icaamitsa pinaitjaca nacayosho njaji talricanaatinai Irael lricope, picadaa Judánai inaitjaca imatsicanaawa, njite picadaa cawilre perrin shoca njaji Jerosalén lricoperri, nanaitja capisho njaji Acab iipaneta, njite piinio capoa njaji piweenaipe pjinirri iipaneta matseta sho, atsianai matsiaperritsa pioya, ¹⁴ niini wa-Minalri icadaacaotsa aima ipírrao pinaikite naco, pienipe naco, pininai naco njite nanaco njaji pirsompe. ¹⁵ Aimaotsa pjirrapitaca icaiyati naco pada irrenati ikjaote pishapi ricoda, aima capoa jalredaoca pjirrapitaca jliaji ipoati, pishapi imotocaotsa pioya.'' ¹⁶ Dio cadaa Joram ikjoete natsiketá-carroni nacaolremi njaji filisteonai njite njaji árabenai , njaji iofalri tsoomi etiopenai ioya. ¹⁷ Nainoacawa Judá ikjoete, njeewa lri-ricoda, njite nadee pjiomi njaji cacoada perri naoketaji talricanaati dapana lrico. Nadee tsakja lrioya nja lrienipe, lrininai. icaamitsa namacalrica lrienipe nakjoite jliaji Joacaz, lrirri iwerriti. ¹⁸ Njitedalrina Dio icadaa jlirrapita pada irrenati matapenadalritsa lrishapi rico. ¹⁹ Njitena, yamawalria jiapodami, jlinaana ioca cádanacoena, lrishapi imotokenawa lrikjaote jliaji irrenati lrirsolri, mayamini icaiyati pekirridalri rico. Njaji lrinaikite corrin nawaca tiyee lrikjaote, cayoji nanaitja capisho mana naferrinaipemi ikjaote. ²⁰ Lriniita pia lritalricanaataca lrirso caojli pia trenta do walria lripekirrica; lritalricanaata Jerosalén lrico ocho walria. Corrin coadaca narso njaji inaiki mayami cádanacon. Nadawani David iyacalre rico, mits teecojletsa nadawacawa njaji talricanaatinai.