¹ Josafat, Asa irri italricanata jlinirri jiapodam. Josafat ikjaidatacawa matsia lriema carro Irael ikjoete. ² Lricadaa aima tsolrodaonai nerricoda njaji yacaalre taimí perri Judá lrico, lricadaa tsakja naofacawa njaji tsolrodaonai iwapacaope pjiomi judá lrico njite Efraín tsakja, njaji yacaalre jlinirri jitaji lrirsowao. ³ Wa-Minalri ikitsindata pia Josafat ima lrinaitjaca cayoji jlinirri David inaitja capisho pia lriinita, corri cantja lrioma njaji baalnai. ⁴ Lricadaa lricaolre jlinirri iDiote naco, lrinaitja cayoji lriaco icaite capisho, corrin lricapaca lriicawa njaji iraelitanai. ⁵ Niini Diio ikjaidataca talricanaatiapani Josafat icaapi rico, pjiomi njaji inaiki Judá lricoperri nacaoña piaca Josafat. Lrisopiaca aima lrinaani cacoadaperri, njite matsia nacapaca lrirso pekirritsa. ⁶ Lricadaa lricaolre ajádalri Dio naco niini lrinaitja cayoji lrioma capisho. Lripeeco tskja njaji yenondalripe njite Asera iemacarronape Judá ioya. ⁷ Madalriwalria kena lritalricanaataca, lrimeenaca njaji lrirsoperri caconaaperri: Ben Hail, Abdia, Zacaria, Natanael, njite Micaia tsakja naa carro nacananta nerricoda njaji yacaalre Judá lricope. ⁸ Nainai tsakja njaji levitanai: Semaia, Netania, Zebadia, Asael, Semiramot, Jonatan, Adonia, Tobia, njite Tobadonia, njite nainai njaji sacerdotenai: Elisama Joram iapiya. ⁹ Nacananta Judá lrico, ima narsoca jliaji paperra nadanacawa njaji Dio iaco kjaidaperri. Nacananta pjiomi yacaalre rico Judá lricoperri njite nacananta pjiomi njaji inaiki. ¹⁰ Njite pjiomi njaji pacoa lricope talricanaatinai iofacappe Judá iwaida naco, nafiowa pekirritsa Dio iiwana, niini corrin nanaitjaca oowi Josafat ikjoete. ¹¹ Padapena nanakjoite njaji filisteonai nadee inaaniti macoatsa Josafat irso, naa lrirso palraata cayoji nacaoña capisho lrirso. Njaji árabenai, nadee tsakja lrirso aima maaficalri, siete mil seteciento carnero, njite siete mil seteciento tsakja cabra. ¹² Corritsa coca itaita Josafat ikjoete. Lrinaitja aima panti njite yacaalre taimí perri Judá lrico lrimatsieta carroda pjiomi, ¹³ Lriwaketa aima injaodati nerricoda njaji yacaalre Judá lricope. Njite njaji tsolrodaonai, atsianai kjaidaperri, mafiocapetsa lricadaana Jerosalén lrico. ¹⁴ Icatsa neepitanaca njaji, cayotsa nadanaca coan piaca nanoca njaji njanirrinaipemi iipaneta: Njaji comandatenai irsocaperri mil ipeyajle narsoperri Judá lricope; comandante Adna, lrirsopia treciento mil tsolrodaonai oowi icaona; ¹⁵ lriinaitsa jliaji comandante Jonahán, njite dociento ochenta mil tsolrodaonai; ¹⁶ lriinaitsa, Amasia, Zicri irri, lriwaopiakje shotsa lricadaacawa lridenjíi carro Dio irso, njite lrirso pia dociento mil tsolrodaonai oowi icaona. ¹⁷ Nanakjoite njaji Benjamín poco: Eliada, pada atsia kjaidadalri pacapanda paicawa, lrirso njaji lriinaiperri tsolrodaonai, dociento mil namaimaca, irsocape nayawitashopa njite narso tsakja nadanaita; ¹⁸ njite lriinaitsa, Jozabad, njite ciento ochenta mil lrirsoperri tsolrodaonai, iwapacapenatsa naacarro oowi rico. ¹⁹ Icatsa njaji idejirri lrirso jliaji talricanaati, naoya tsakja njaji lricadaaji nerricoda njaji yacaalre taimí perri pjiomi Judá lrico.