¹ Mayami Abia lriferrinaipemi iinai, njite nadawani David iyacalre ricó. Njite lrirri Asa italricanata jliapodam. Naofa pia namaodaca njaji inaiki jlia caojli pia talricanaati, die walria oonia. ² Asa inaitja njaji matsiaperritsa wa-Minalri Dio ipeyajle. ³ Lripeeco pjiomi njaji altar nanaitjaji na cayosho nja apaana inaiki yenondalripe naco. Lripeeco njaji njerretanda jiipada, njite njaji topji Asera iema carrona. ⁴ Lricaite narso njaji Judánai naoma carro Dio, na-Diote njaji naferrinaipemi, njeepá carro njaji yacoti kjaidaperri coanca Dio inaaca panaitjaca. ⁵ Lripeeco pjiomi njaji altar yenondalripe nacope, namjaitacawa incienso nerricoda njaji yacaalre judá lricope. Namaodaca pia naofacawa njaji judanai Asa caojli pia talricanaati. ⁶ Lrinaitja yacaalre taimí perri Judá lrico, ima corri piatsa coca ima nacapaca, corri piatsa lrinaitjaca oowi jliawaji, ima Dio icadaaca narso imawadaca kjeti. ⁷ Asa iaco narso njaji Judá lricoperri: ''Warsaotsa wanaitja njaji yacaalre, njiteotsa ferreta nawaiwa, njerra carrona yeenon, lripananomao, njite pantinoma idanawa tsakja; wayadaca jliaji jiipai waoma capoa wa-Minalri Dio. Waomani, njite Lricadaa warso imawadaca kjeti yamemape.'' Niini nadenjica njite lrimoto narso matsia. ⁸ Asa irso pia aima tsolrodaonai idenjicape escodo njite matseta; Judá lricope, treciento mil atsianai, Benjamín lricope, dociento ochenta mil atsianai idenjicape escodo njite nayawitjiapo, pjiomi njaji atsianai kjaida perri, mafio capetsa. ⁹ Zera, Etiopia njite dalri, lrino lrinoacá carro Asa ikjoete un millon tsolrodaonai iapiya, njite treciento caballo sho irsocaperri carrofiape Maresa lricojle. ¹⁰ Njite Asa imoto lrikjoete lrioketaacá carro lriapiya, njite neemacawa nakjoetewaaca nainoacá carroa, pacoa caita cawa lrico jiipai Sefata lrico Merasa lricoda. ¹¹ Asa iwana kjaida lri-Minalri Dio iinai, lriaco lrirso: ''No-Minalri, corrin pacapa pada pja pioya, icaamitsa Pjia ikitsindatacada pada corridalritsa itaita iemaca nakjoete njaji aimadan. Pikitsindata fa, Pjia wa-Minalri Dio, ima Pinakjoitetsa wawapa pjiomi, Piipitana naco wano nakjoete njaji aimadani. No-Minalri, icatsa wa-Dioteca pjia; macadatsa atsianai jiametaca pjia.'' ¹² Cayotsa wa-Minalri jiametaca njaji etiopenai Asa njite Judá ipeyajle. Icaamitsa napitocawa njai etiopenai. ¹³ Asa ipinietana lri-tsolrodaoperre iapiya Gerar lricojle. Aima nanakjoite njaji etiopenai corri capishoetsa nataita nakjaidatacawa, ima mjaidaketsana Dio ipeyajle njite lri-tsolrodaoperre ipeyajle tsakja. Njaji tsolrodaonai aimadan Judá lricope nadee aima nanaanipem njaji etiopenai. ¹⁴ Judánai imatsiketa pjiomi njaji yacaalrewape Gerar iwaida nacope, ima aima nafiocawa njaji inaiki niniperri Dio ipeyajle. Njaji tsolrodaonai Judá lricope njewa njeta pjiomi njaji nanaanipem, njite aima naniwaca nanakjoite. ¹⁵ Namatsieketa tsakja naofacawape njaji ianjicape iwapa naapirra; nadee aima oveja nayapem, coshoca nja camello njitena nadiawa Jerosalén lricojle.