¹ Roboam ioca cádanaco Jerosalén ricojle, lriwaketa pjiomi njaji Judá poco njite njaji Benjamín poco tsacja; niini pia ciento ochenta mil atsianai tsolrodaonai njenitaji inoacacapeo, nainoca carro Iraelnai ikjoete, nadietá carro njaji iraelitanai Roboam irso tsenakja. ² Mitsa caacoca Dio Semaia inomalricjoite, ape atsia Dio irsodalri, lriaco cayoji: ³ Picaite Roboam irso, Salomón irrí, Juda italricanaa, narso tsakja njaji Iraelnai Judá lricoperri, njite njaji Benjamín poco cayoji: ⁴ Cayo lriaco jliaji wa Minalri: ''Corrín pitaita pinoaca cawa nakjoete njaji ikitsiñape Iraelnai. Idiawa iipana lricojle icoana, ima pjiomi njaji jiyapalrio, Njoatsa icada cayo.'' Niini njaji inaiki njemica jliaji iacoti Dio njité dalri, icaamitsa nadiacawa njapodamrsewa, corrinatsa nainoacawa Jeroboam ikjoete. ⁵ Roboam iofawa Jerosalén lrico njite lrinaitja yaaclre Judá lrico lrinadanaataca shopao. ⁶ Lrinaitja Belén, etam, Tecoa, ⁷ Bet Sur, Soco, Adulam, ⁸ Gat, Maresa, Zif, ⁹ Adoraim, Laquis, Azeca, ¹⁰ Zora, Ajalón, njite Hebrón. Icatsa yacaalre taimí perrica Judá lrico njite Benjamín lrico tsakja. ¹¹ Lrinaitja taimí pjaa njaji yacaalre taimi perri, njite lricadaa comandantenai nawapá carro, ima lricadaaca niini injaodati, aceite, njite jaico tjeda iana. ¹² Lricadaa nadanaita nanacodalri njite molroco nerricoda njaji yacaalre kjaidáa carrona. Niini lriyapeca njaji judá poco njite Benjamín poco tsakja. ¹³ Njite njaji sacerdotenai, levitanai iofacapewa Irael lrico, oopi naawa Judá lricojle. ¹⁴ Njaji levitanai, namaca njepaite nataoñacawa maaficalri, nanaani naa carro Judá lricojle njite Jerosalén lricojle tsakja, ima Jeroboam njite nja lrienipe namotoita-cana, niini corrinatsa nataita pienatsa nadenjica jliaji nadenjicalre Dio irso. ¹⁵ Jeroboam icadaa sacerdotenai lriyape nadenjicarro nanaco njaji yenondalripe idolonai irso, irsocape cabra njite baken jinapjiami lrinaitjajitsa narso. ¹⁶ Njaji inaiki Irael poco inakjoitepe, njaji iomacape Dio nacaolre rikjoite, na Diote njaji Iraelnai; oopi naawa Jerosalén lricojle nainó carro maaficalri Dio irso, njanirrinaipemi iDiote. ¹⁷ Niini nakjaidataca Judá italricanaa, njite nacadaa kjaidáa carro Roboam, David irri madalriwalria, niini madalriwalria icoa nanaitja cayoji David njite Salomón inaitja capisho. ¹⁸ Njite Roboam jita inoa rsoaji Mahalat, Jerimot iito, David irri Abigail iapiya, Eliab iito njite José. ¹⁹ Keenipe lrirsono: Jeús, Semaías njite Zaham. ²⁰ Mahalat jiapodam, Roboam jita inoa Maaca, Absalón iito; keenipe lrirsono: Abias, Atai, Ziza, njite Selomit. ²¹ Roboam ipeyo pja rsoaji Maaca, Absalón iito naoya nja paana lrininai njite njaji inaitjepe iwapacapeni. Lrirsopia dieciocho lrini njite nai njite sesenta inaitjepe iwapacapeni; lrirsopia ventiocho lrienipe atsianai, njite sesenta lritonaipe. ²² Roboam icadaa Abías, Maaca irri, njewidapo, naapiyawalrio njaji lriwenaipe; lriowaopia pia lrinaco jliá carro talricanaati. ²³ Roboam italricanaata pia cayekja shotsa; lricadaa naofawa njaji lrienipe pjiomi Judá njite Benjamín lrico, nerricoda njaji yacaalre taimí perri. Lriá narso aima injaodati njite lrioma pia narso naninaiwa pjiomi.