¹ Wajatujjanenü barü kuaikuaijai Moisés pe barü najumetaya biobi boota petusatota Sinaí. Ma jjua raja itsije penamata jjainai matakabi juametota najjua waibeje kujinae Israel ira pewekua pitsajava Egipto. Waja tujjanenü jumeitsi. ² "Pa wünü jukare dajjita pebi jiviIsrael pijivi kae bitsauto kana kujitsia, piaja monae wiria pajja jivi. Pa namata üjure kae pebi kanakujitsia. Kaenü tsaponae. ³ Be wü pena were tsinüanü. Panamata ujüre dajjita pamonae kuene kajupatsi pe barü nabejawa piaja wajübitsaü kuenia Israel. Jjamü yajawa Aarón be paruta ponamü beje pa pebi beje pa niaja waja bitsaü monaeta. ⁴ Kae pebi tsaponae kae tomara kanakujitsia, kae matabokoto tsaponae kae bitsaüto kato jjanepanaejitispa pe kato namata kanukae nejja kae tomarayo jawa, kae pemanata kanukaenü kanakujitsia be ya eweta pebi jivi peya bara nabenejja piaja tomara. ⁵ Maraje pewüanü penamata kanübenaewi peka barü nabiwi nejja. ⁶ Piaja tomara Rubén, Elizur,pejjünato Sedeur; Piaja tomara Simeón, Selumiel, pejjünato Zurisadai, ⁷ Piaja tomara Judá, Naasón, pejjünato Aminadab; ⁸ Piaja tomara Isacar, Natanael, pejjünato Zuar; ⁹ Piaja tomara Zabulón, Eliab, pejjünato Helón; ¹⁰ Piaja tomara Efraín, pejjünato José, Elisama, pejjünato Amiud; Manasés pijivi, Gamaliel, pejjünato Pedazur; ¹¹ Piaja tomara Benjamín, Abidán, pejjünato Gedeoni; ¹² Piaja tomara Dan, Ahiezer, pejjünato Amisadai; ¹³ Piaja tomara Aser, Pagiel pejjünato Ocrán; ¹⁴ Piaja tomara Gad, Eliasaf, pejjünato Deuel; ¹⁵ Piaja tomara Neftali, Ahira pejjünato Enán." ¹⁶ Maraje pepebi jivi jutatsi tomara pijivi. Bajara pamonae mata kapona peruju tomarajji. Bajara pamonae Ikani namata kanubena Israel tomarata. ¹⁷ Moisés, Aarón tacka pa pebijivi, pamonae wünü rubatsi, ¹⁸ Najjua pa pebi jivi, pamonae barü najumetane dajjita pebi jivi Israel tomara jivi kopiaya matakabi penamata jjainae juameto kujinae. Jjukujinae, kae pebi kanakujitsia pena weretsi pebianü itsajume jupayaba peru jivi. Bajara ponü ikani jjaina pe wünü junatsi tomarajji piajamonae yajunavi bajayatamüpijivi. ¹⁹ Bajara jjuata Moisés wünü yakina wayapjo Sinaí nakuata, pekuenia waja tujjanenü to najume kopata. ²⁰ Piaja monee wiria Rubén, kae penamata jjainainü Israel tomara pijinü, namata üjüta dajjita wünü kae pebi kana kujitsia pena weretsi pewüjuavi pekuene bitsajinaevi peponae nejja penabe jawabelia, pewünü rube naijawata tomarajji piaja peruju monae. ²¹ Namata üjüta 46.500 pa pebi jivibeje Rubén piaja tomarata. ²² Piaja monae wiria Simeón namata üjüta dajjita wünü kae pebi kana kujitsia pewüjüavi naweretsivi pe kuene kujupae bitsi pe barü nabe nejja, pe wünü rubenae bajjutota tomarajji yajawa piaja monae wiria winü. ²³ Bajara pamonae namata üjüta 59.300 pa pebi jivi beje piaja tomara yota Simeón. ²⁴ Piaja wiria Gad namata üjüta dajjita wünü kai pebi kanakujitsia pekuene bitsojinaenü penabe nejja, pewünü rubenaebi piaja. Tomara jawa yajawa piaja monaevimü. ²⁵ Bajara pamonae namata üjüta 45.650 pa pebi jivi beje Gad piajivi. ²⁶ Pe pitsa paevi Judá wiriata namata üjüta dajjita pevi jivi 20 pa waibeje pejjanaivi pekuene bitso jinaevi peponaebi nejja penabe jawabelia, pe wünü rubenaevi piaja tomarata bajayatamü piaja monaevita. ²⁷ Bajara pamonae namata üjüta 74.600 pa pebi beje Judá piajivi. ²⁸ Pe pitsa paebi Isacarty namata üjüta dajjita pe wünú kae pebi kanakujitsia 20 pa webeje pejjainanaivi pekuene bitso jinaevi pebarü nabe nejja, pe wünü rubenaivi piaja tomarata bajayatamü piaja jivita. ²⁹ Bajara pamonae namata üjüta 54.400 pa pebi beje Isacar tomara piajivi. ³⁰ Pe pitsa paebi Zabulónta namata üjüta dajjita pebi jivi pe wünü 20 pa waibeje pejjainaivi pekuene bitso jinaivi penabe nejja, pe wünü rubenaivi piaja tomara jawa bajayatamü piajivita. ³¹ Bajara pamonae namara üjüta 57,400 pa pebi beje Zabulón tomara piajivi. ³² Pe pitsa paebi Efrainta, pejjünata José, namata üjüta dajjita wünü anü kae pebi jivi kanakujitsia 20 pa waibeje pejjainaevi pekuene bitsojinavi pebarü nabejava, pe wünü rubenaevi piaja tomara jawa bajayatamü piajivita. ³³ Bajara pamonae namata üjüta 40,500 pa pebi beje Efraín piaja tomara pijivi. ³⁴ Pe pitsa paebi Manasésta, pejjünato José namata üjüta dajjita pebi jivi pewünü 20 pa waibeje pejjainaivi pekuene bitso jinaivi pebarü nabejava, pe wünü rubenaevi piaja tomara jawa bajayatamü piajivita. ³⁵ Bajara pamonae namata üjüta 32,200 Manasés piaja pebi beje. ³⁶ Pe pitsa paebi Benjaminta namata üjüta dajjita pebi jivi pe wünü kae pebi kanakujitsia 20 pa waibeje pejjainaivi pekuene bitso jinaivi penabe nejja, pe wünü rubenaevi piaja tomara jawa bajayatamü piajivita. ³⁷ Bajara pamonae namata üjüta 35,400 pa pebi beje Benjamín piaja tomarata. ³⁸ Pe pitsa paebi Dan tavita namata üjüta dajjita wünü anü kai pebi kanakujitsia 20 pa waibeje pejjainaivi pekuene bitsojinaivi penabe jawa, pe wünü rubenaivi piaja tomara jawa yajawa piaja monae wiriavinü. ³⁹ Bajara pamonae namata üjüta 62,700 Dan piaja tomara. ⁴⁰ Pe pitsapaivi Aserta namata üjüta dajjita wünü anü kae kai pebi kanakujjitsia 20 pa weibeje pejjainaivi pekuene bitsojinaivi penabe jawa, pe wünü rubenaivi piaja tomara yajawa piaja monae wiriavimü. ⁴¹ Bajara pamonae namta üjüta 41,500 pa pebi beje Aser piaja tomarata. ⁴² Pe pitsa paevi Neftalita namata üjüta dajjita wünü anü kai pebi kanakujjitsia 20 pa waibeje pejjainaivi pekuene bitsojinaivi penabe jawa, pe wünü rubenaivi piaja tomara jawa yajawa piaja monae wiriavimü. ⁴³ Bajara pamonae namata üjüta 53,400 Neftali piaja tomarata. ⁴⁵ Moisés, Aarón beje namata üjüta beje dajjita pa pebi jivi beje, kai bitsauto naijjana yajawa 12 pa pebi beje pamonae 12 israel piaja tomara beje eveta jinavenapa. ⁴⁴ Nejjata, dajjita Israel pa pebi beje 20 pa waibeje o be biliyo pejjainaivi, dajjita pekuene kajüpaibitsi pe barü nabejawa piaja wajübitsaü, namata üjütatsi kae piaja monaejawa. ⁴⁶ Bajara pamonae namata üjüta 603,500 pa pebi beje. ⁴⁷ Itsiata baitsi jane pebi jivi pe pitsa paebi Levi wirieta apo namta üjütsitsi, ⁴⁸ Tsipaji waja tujjanenü jumeitsi Moisés jawabelia: ⁴⁹ Jjanü apo be namata üjütsimü Levi tomara apo be kajone atomü Israel tomara berena. ⁵⁰ Ne kowüta, Levitavi nubare pe ewetsivi nejja pe najume liwaisi jaitsiboo, be ewetsi nejja dajjita pe enai jawanüta nejja pena jumetai boota. Ewetsiona jivi penakaituatsi boo ejjanaina boojji pemujjunania bajara pa boo. ⁵¹ Pakuajinae bajara pa boo tijjitsiana itsa jawabelia, Levitavi be kaituata. Baja pakuajinae jjatabijitsia pena jumetaya biabi boo, Levitavi be matakota. Itsa nakua pi jivi imojjoyota bajara pa boo wü pe tüpaenajja. ⁵² Pakuajinae Israel tomara matakotsiana piaja boo, kae pebi kanakujitsia be matakota imojjoyo bandera piaja pane wajabitsaü. ⁵³ Itsiata, Levitavi be matakota piaja boo pemujjünania pena kaituatsibiabi boo jawata jumetejema tanae panae jawa petsi jopaiyanibaitsi Israel tomara. Levitavi be eweta pena wajukabiabi boo. ⁵⁴ Israel tomara dajjita jjüa ejjana. Bajara pamonae dajjita ejjana jjüa waja tujjanenü to najume kopatatsi Moisésta.