¹ Bajara pamatakabi Israeñ jawata rey ajibi. Danwiria ira jeita pe jinonopaenejja, tsipaji itsakuenejawayo apo na rajutsitsi petsanae matakabi Israel tomara pijiwi. ² Dan tomra pjiwi itoroba cinco (5) papebeje dajjita wiria jawata, peto nabewitsi peyaputaewi Zora yajawa Estaol, petajjuta petaerutsinejja ira pe yaputaenejja. Bajara pamonae jumeitsi: "Paponare patairure ira." Bajara pamonae Efraín tsutota pata, Micaías piejabota, bajara jota majita. ³ Itsa patanajetarubena Micaías piejabo jawata, jume liweisi yaputane pe kueikueijeijawa pewujuoto levita wirienu. Nejjata bajara pamonae nubena otjopa pe yanijobinejjatsi: "¿Depatsa ka kaiena? ¿De itsimutsanukae panakuota? ¿Dejjuotsia jota nukame?" ⁴ Bajara ponu jumeitsi bajara pamonae jawabelia: "Micaías majjua neyawenona: Bajara ponu nejunatatato tanakuenebinejja pieja sacerdotenejjanu." ⁵ Bajara pamonae jjumeitsi: "Panejumetaema Dioso pejume liweisi jeire, parayaputaenejja pamatakabi itsa pa pitsapajü pejjania kueneta pa ponaejitsienu." ⁶ Nejjata sacerdotenu jei bajara pamonae: "Jjanewaitsia kueneta pana wiebare. PETUJJANENU paka tsitajubiena pane ponae namuto." ⁷ Nejjata kae kobe cinco (5) kuenia ponubeje pona nejjata Lais jawata pata, nejjata tane jiwi jjanewaitsia kueneta pejinonopaejawa bajara jota anayajibia- bajara pakuenia Sidonios pjiwi jinonopa anayajibia jjanewaitsia kueneta. Itsajiwiyo ata apo kuijiru koujupaetsi pewekua pitsijawatsi ira, itsa jiwiyo ata apo jamatabu itonotsitsi. Taju wkua jinonopa Sidoniowi, itsajiwiyo ata apo nabaru kueikueijei ata. ⁸ Bajara pamonae nawieba Zora yajawa Estaol wiriata. Pieja monae yanijobatsi: ¿Depa nejumeitsimutsane? ⁹ Bajara pamonae jumeitsi: "¡Najjatsia! ¡Benatsi!" Patanejü ira jjanepana. ¿Itsa kuene apo itsi? Panajamatabu jematsipame pane benejja yajawa panewekua pitsinejja ira. ¹⁰ ¡Itsa pa poname, pajjamu panamatajjunaename jiwi itsa kuene apo pe najamatabu jjeinaewi, yajawa ayei ira jjaneto! Dioso pajjamu paka rajuta bajara pa ira jawata itsa kuene apo pakato sajinaetsane." ¹¹ Seiscientos (600) ponubeje Dan wiria pijiwi, jjeina pieja naenu penabaru nabe nejja, Zora wera pitsapa yajawa Estaol. ¹² Bajara pajiwi beje, Judá nakua jawata. Bajara pa jjuota panakua Majané Dan wunu rutatsi bajara pa matakabi; itsa juameto ba tabujopa Quiriat Yearín eka. ¹³ Nejjata Efraín jumatsuto jawabelia pitsapa bajara belia pepatsinejja nejjat Micaías pieja bota pata. ¹⁴ Nejjata bajara papebibeje cinco (5) Lais ira petaerutsiwi jumeitsi piejamonae jawabelia: "¿Payaputaneme efod pa bonuta pejjeinaejawa, diosowi penatsikobe nubiwi, penatsi kobe ejjanaewi, yajawa kopei jumape pe tajuitsiyawa? Nejjata de pa itsimutsane akonojjae." ¹⁵ Nejjata imojjoyoba bajara jota pewujuoto levitanu pieja boo kuijiba, Micaías pieja boo jawata, nejjata bajakobatsi. ¹⁶ Nejjata akonojjae seiscientos (600) Danitawi, nawajabitsouta pieja naeta pena baru nabe nejja, nubena boupa werena. ¹⁷ Bajara pa pebijiwi cinco (5) ira taerutsiwi bajara pa ira wekua pitsapa wekua nota pejumape penatsikobe ejjanaewi, efod, diosewi penatsikobe nubiwi, yajawa kopei pe ejjanaewi, sacerdotenu pijinia baru ewetanuka boupa werena seiscientos (600) pebijiwi pieja nae kanubena pe kanabenejja. ¹⁸ Pakuijinae pamonae Micaías pieja boota junua wekua nota penatsikobe ejjanaejawa, efod, diosowi penatsikobe nubiwi, yajawa kopei pe ejjanaewi, sacerdotenu bajara jawabelia jumeitsi: "¿Dejjua pa itsimu?" ¹⁹ Nejjata bajara pamonae jumeitsi "¡Moyamure! Nakuibo akare nekobeta yajawa najua ponatsi, pajjanunejja peneto tajjamure yajawa sacerdotenu. ¿Tsipaji kato jjanepana sacerdotenu kuene neto nakuenebinejja pebi pieja boo jawata, tsipaji apo kayo jjanepanaetsipae sacerdotenu kuene pa wiria yajawa penajupae wiria jupaewi nejja Israel?" ²⁰ Sacerdotenu jamatabu baraya. Bajara ponu pita efod, diosowi penatsi kobe nubiwi boota, jayawa penatsi kobe ejjanaewi nejjata yajawa baru nawieta. ²¹ Nejjata napu yorotsieya nawieba. Bajara pamonae pejewajji natsi wujunae nuba, pakuenia baja pieja bakanu yajawa pekobe kowu. ²² Taju itsa wekua najetarubena Micaías pieja boo wekua, pebijiwi imojjoyo pe jinonopaewi Micaías pieja boo jawata junatasi penakaituo tsinejja, nejjata danitawi pü kajjina. ²³ Bajara pamonae danita wiria pu wawajei, napuna yorotsieya Micaías jumeitsitsi: "¿Depatsa pakajunata panena kaituonaenejja?" ²⁴ Bajara ponu jumeitsi: "Jjamu nakobe tojjotame ta itsi diosonujji, nevekua pitame taja sacerdotenu, jayawa ponaejitsiemu. ¿Dejjua nejjata neto nakopatsiena? Dejjuatsia neyanijobame jjanu: "¿Dejjua yabara nieja anaepanae?" ²⁵ Dan tomara jumeitsitsi: "Jjamu kato akuenebi pakuenia patane baru kueikueijawamu, peanaepanae pebi kabejitsipa, nejjata jjamu yajawa nieja monae kato beyajebijitsipa." ²⁶ Nejjata Dan pebijiwi pieja namutuojawa pona. Micaías itsa tane pe asoubeje jawa bajara ponu nejja, napunuyorota nawieta pieja boo yabelia. ²⁷ Dan jiwi pita jjua Micaías itsi, yajawa pieja sacerdotenu, Lais jawaberena ponarena, jiwi jawaberena jamatajema yajawa jjanewaitsia pe jinonopaewi, bajara pamonae beyejeba pieja wakapata pieja tomara tajuitajeba. ²⁸ Itsa jiwiyo apo yawenonaetsi tsipaji Sidón taju wekua eka, itsa jiwiyp apo baru kueikueijei. pe bujjupjoto jawata Bet Rejob jawatsia. Danitawi ikatsia nakuenebeta tomara nejjata bajara jota jinonopa. ²⁹ Bajara pamonae wunu ruta Dan, pieja salineinu Dan pewunu ruta, tsipaji Israel pejjunato kowunu. Bajayatami pewunu bajara pa tomara Lais. ³⁰ Dan tomara pijiwi yota pejumape ejjanaejawa najara pamonae nejja. Nejjata Jonatán, Gersón pejjunato, Moisés pejjunato, najara ponu yajawa pejji sacerdotewi danita wiriawi nejja pewaitabi kuijinae jawabeliatsi irata. ³¹ Nejjata pemata bakabuta to nubena pe jumape ejjanaejawa Micaías yaputae ata Dioso piejaboo Siló pe nukaejawa.