¹ Jacob ata pieja namuto jawa póna nejjata Dioso pieja angelwi namatajjunatsi. ² Itsa Jacob taetaba, jumeitsi: "Majota Dioso pieja boo burto nuta," bajara patajjunae wunu ruta Mahanaim. ³ Jacob namatajjeinaya itoroba pieja pienewi peto tsipaebi nejja pematapijinu Esaú, Seir ira jawabelia, Edom nakuayabelia. ⁴ Ponu itoroba, pakuenia: "Majjua pa jjumeitsimutsane taja tujjanenu Esaú: 'Paliweisi kato itoroba nieja pienenu Jacob pakuenia jumeitsi: 'Labán jawata nakopatajü najjatsiyo apo nawietsi bajara jjuota matapania najetarukajü. ⁵ JJanu jjeinajü bueyewi, burrowi yajawa dajubi bitsouto, taneto nakuenebiwi pebijiwi jjeinajü yajawa petiriewi penakuenebiwanu. JJanu kato itorobatsi paliweisi taja tujjanenümu jjae, tane itajjuto tsonia tae nejjamu." ⁶ Nawieba najetarubena Jacob peitorobiwi liweisi to kanajetarubena: "Nepatapijinu Esaú jawabelia pa ponajü. Ponu renatsane kamata enenaejitsia yajawa cuatrocientos ponubeje yajawa ponaena." ⁷ Nejjata Jacob bitso junawajjuoreka yajawa jamatabu deideijei. Bajara juajitsia tsata pieja jiwi bitsouto peyajawa ponaewi najua boo burto kuenia ponae ejjana yajawa kaponae ejjana dajubi bitsouto, vacabitsouto yajawa camellobitsouto. ⁸ Ponu jumeitsi: "Itsa Esaú pamonae kuijitsiena pebeyejebinejja, nejjata pomonae penakopatsiwi naetabijirabiena." ⁹ Jacob jumeitsi: "Tajja Abraham pieja Dioso numu yajawa Tajja Isaac pieja Dioso numu, PETUJJANENUMU, tane jumeitsinumu: 'Nawiere nieja ira jawabelia yajawa nieja monaeta yajawa JJanu kajjeinae ejjanaenatsi.' ¹⁰ JJanu apo nametawenonaenu dajjita tane itajjuto tsonia taejawamu ajibi ata tane baru ponaejawamu pakuenia netsitajutame JJanu takato nakuenebinu. Tsipaji saya taja naeboyo kanikabajü Jordan menejawa nejjata akonojjae najua boo burto jjaneto jjeinajü. ¹¹ Nejume taema, neyawenonare tamata pijinu pekobe wekua, Esaú pekobe, tsipaji bajara ponu kujunawajü, penajetarukaejawa yajawa tanebeyajjuobijawa yajawa pejji pejjeinaewabeje yajawa pejji bitsouto. ¹² Tsipaji JJamu jumeitsimu: 'JJanu karajutsienatsi nejjeinaenu tsane. JJanu kato wietsienatsi be manua mene atsa puru tsane, apo namata ujutsi kapanepae tsane." ¹³ Jacob bajara pamerewita nukajopa bajara jota. Ponu pita pekobe kowujawa pe rajutsinejja Esaú, pematapijunu: ¹⁴ doscientos pa cabrabitsouto, veinte pebitowi kae wiria pijiwi, doscientas ovejawi pesorowatowi yajawa veite carnerowi pebitonu, ¹⁵ treinta camelowi penami abatsiwi yajawa pejji, cuarenta bakawiriawi yajawa diez papebitowi toro, veinte paasnawanu yajawa diez pebitonu burro wiria. ¹⁶ Ponu pokobeta rajuta pieja pienewi pe kaponaenejja, kae dajubi wiria kanakuijitsia. Ponu jumeitsi pieja pienewita: "Panamata jjeinare yajawa patsi tae najetarubenare dajubi peponaenejja." ¹⁷ Ponu kujuruoba kopieya pienenu, pakuenia jumeitsi: "Itsa tamatapijinu Esaú kanamatajjuna itsa kayanijoba pakuenia: '¿Nieja tujjanenu deponu? ¿Debelia poname? ¿Depitsa pieja dajubi kopieya namatajjeinanubenapona jjamu kapueneta?' ¹⁸ Nejjata jumeitsimutsane: 'Nieja pienenu Jacob piejawi. Pamonae to itoroba taja tujjanenu nejja Esaú. Nejume taema, ponu patakowu wetsina najetaruka."' ¹⁹ Jacob yajawa kujuruoba juyanu pemata káponaenu nejja itsa jiwi bitsouto, yajawa akueyabinu yajawa dajjita pebijiwi pepuna ponaewi dajubi bitsouto. Ponu jumeitsi: "Pajjamu bajara pakuijiruta pajumeitsimu tsane Esaú itsa pabaru namatajjunaename. ²⁰ Yajawa pajumeitsimu tsane: 'Nieja pienenu Jacob kotokaewa najetaruka pata puwetsina."' Tsipaji najamatabu jjeina : "Jamatabu kaewi ejjanaenajü tato itorobi dajubi tawujunae wetsia. Itsa namata ujjunaenajü bejjua, jjanewaitsia kueneta ne wujunae pitsiena." ²¹ Bajara jjuota to itoroba kopieya pewujunaeyo ponu. Bajara ponu pamerewita nukajopa pieja epatoyo pieja boo burtota. ²² Jacob nountapuna merewita yajawa pita piejawabeje yajawa pieja pienewabeje yajawa pejji bitsouto once pajiwibeje. Ponu itoroba itsa paná werena petsewi nania pe nikabinejja wekua Jacob. ²³ Pakuenia ponu itoroba penajato penikabinejja dajjita pekobe kowu yajawa. ²⁴ Jacob pieja epato nakopataba yajawa pebi baru nabeponapona peyananienae jawabelia. ²⁵ Itsa pebi tane apo peamoneyabijawa, pe epasituolia to tsakitajjuoba Jacob. Jacob pesi epatuolia to jontajjuoba pebaru nabejawata. ²⁶ Bajara pa pebi jumeitsi: "Nekopare taponae nejja, matakabi tsanajetarukae baja." Jacob jumeitsi: "JJanu apo kakopatsi tsanetsi itsa pejjania jume apo neto kueikueijamu tsane." ²⁷ Bajara pa pebi jumeitsi: "¿Depa wunumu?" Jacob jei: "Jacob." ²⁸ Bajara pa pebi jumeitsi: "JJamu Jacob apo newunu tsane, newunu baja tsane Israel. Tsipaji jjamu baru nabieme Dioso yajawa pebijiwi apo ka amoneyabi." ²⁹ Jacob yanijoba: "Depa wunumu nejumeitsimure itsieta." Ponu jumeitsi: ''¿Dejjuajitsia tawunu neyanijobame?" Bajara jjua kuijinae pejjania kuene jumeta to najume kateita. ³⁰ Jacob bajara pa tajjunae wunu ruta Peniel, tsipaji jumeitsi: "Dioso panaita baratanejü beje yajawa pejjania kueneta nekopata ta asounejja." ³¹ Ikotia tsimata pitsapeinatsi Jacob itsa jjentanajetaruka Peniel. Ponu jayujayunaeya nukapona tsipaji epasi tsakitajjuobatsi. ³² Bajara jjuota pamatakabi jebi, Israel pieja wiria apo jjae penepeto penawaitabijawa pe tjou sito yajawa pesi epatobeje, tsipaji pebaru nabenu wi kaukutajjuoba bajarapa nepeto itsa apasi jontajjuoba Jacob.