¹ Nejjata Jacob tajubelia pona yajawa pata pemutua ira pijiwi werena pejinonopaewi. ² Itsa taejunua, tane mutju mera petusato jawata, yajawa, taema, akueyabi padajubi bitsouto ovejawi pe mujjunene jawata bobena. Tsipaji bajara pa mera jawata bajara pamonae abatabieba bajara pa bitsouto, yajawa bajara pa iboto pewu akatsijawa bitso ayeijawa jjaneto. ³ Itsa dajjita dajubi bajara jota nakaeutona, pe ewetsiwi pastorewi tijjitabieba iboto mutju wupa pebokaejjae yajawa rajutabieba ovejawi mera, nejjata bajara jjua kuijinae ikatsia buotabieba iboto mutju wupata, pebokae kowuta. ⁴ Jacob jumeitsi bajara pamonaeta: "Tajamonae, ¿De werena paponame?" Pamonae jumeitsi: "Harán jawata patajinonopaewi." ⁵ Ponu jumeitsi bajara pamonae: ¿Labán payaputaneme, Nacor pejjunato?" Pamonae jumeitsi: "Payaputanejü." ⁶ Ponu jumeitsi: "¿Bajara ponu jjanepana?" Pamonae jumeitsi: "Ponu jjanepana, yajawa, taema belia, Raquel pejjunatoyo kanajetarukarena oveja bitsouto." ⁷ Jacob jumeitsi: "Taema, matoneje baja. Pa epatota dajjita dajubi apo be kaetuotatsi. Mera be narajuta oveja bitsouto yajawa bajara jjua kuijinae be kaponatsi pe jjaenejja ponamü. ⁸ Pamonae jumeitsi: "Akuenebi pata rajutsijawa mera pa ewetsienajü dajjita dajubi pena nakaetuonajawa. Bajara pa pebijiwi nejjata tijjitsiena iboto mera mutju wupa werena, nejjata mera pa abatsienajü ovejabitsouto." ⁹ Itsa abajju Jacob baru naliweisita bajara pamonae, Raquel baru patanukapona pajja pieja oveja bitsouto, tsipaji powa ewetabieba. ¹⁰ Nejjata Jacob tane Raquel, Labán pejjunatoyo, pena pe matapijinu, Jacob kuijitabalia, tijjita iboto mutju mera pewu akatsijawa, yajawa rajuta mera Labán pieja dajubiwi nejja, pena pe matapijinu. ¹¹ Jacob ibara tsutsune Raquel pebajakobia kueneta yajawa nueya jjuoba ayei jumeta. ¹² Jacob jumeitsi Raquelta bajara ponu pajja pieja monaenu jawa, yajawa Raquel pejjunato liweisi jawa. Nejjata powa kuijinaeponalia yajawa pajja tsipaebalia. ¹³ Itsa Labán jumetane bajara pa liweisi Jacob jawa pejuyapijiwa pejjunato kuene, ponu mataenena ponalia, waitaba, itabara tsutsuba penta, yajawa pieja boo yaberena karenatsi. Jacob jumeitsi Labánta dajjita pieja liweisi. ¹⁴ Labán jumeitsi bajara ponu: "JJamu kajena rowielia taja sitonumu yajawa tawitonumu." Nejjata Jacob nakopata bajara ponuta kae juometo kuenia. ¹⁵ Nejjata Labán jumeitsi Jacob: "Tajamonaenumu jjae tsane, ¿Amoneya neto nakuenebi tsipame? Nejumeitsimure, ¿dejjua namata wenonaename taka matamotsinejja?" ¹⁶ Akonojjae Labán pejjunatoyobeje jjeina. Matapijiwa pewunu Lea, itsawa pijinia juyapijiwa pewunu Raquel. ¹⁷ Lea pejjania itajjutobeje jjeina, itsieta Raquel dajjitawa bitso pejjaniewa yajawa peitabara. ¹⁸ Jacob jitsipa Raquel, nejjata jumeitsi: "siete paweybeje kuenia kato nakuenebienatsi Raquel nejja, nejjunato juyapijiwa." ¹⁹ Labán jumeitsi: "JJanewaitsia kueneta jjamu karajutsienatsi, itsa pebi tarajutsi yaniwa. JJanu jawata nakopare." ²⁰ Nejjata Jacob siente pawey beje to nakuenebe Raquel nejja; yajawa bajara ponu nejja saya beto kae matakabitsibeje, tsipaji bitso jitsipa bajara powa. ²¹ Nejjata Jacob jumeitsi Labán: "Nerajure tajawa nejja, tsipaji baja weretajü tawunujonae matakabi tapitsinejja powa." ²² Nejjata Laban junata dajjita pebiji pejinonopaewi bajara panakuata yajawa itsi pejjjaejawa. ²³ Merewita, Labán pejjunatoyo Lea junata yajawa Jacob jawabelia to kaliatsatabi, nejjata baru majita powa. ²⁴ Laban rajuta pieja pienewa Zilpa pejjunatoyo Lea nejja pieja pienewa pe ejjanae nejja. ²⁵ Bajayakunua, taema, ¡U Lea! Jacob jumeitsi Labán: "¿Dejjua jjania ne itsimu? ¿Apo kato nakuenebitsi Raquel nejja? ¿Dejjuatsia jjania nayamujju itojorobame?" ²⁶ Labán jumeitsi: "Apo pataja kuijiru patarajutsinejja juyapijiwa kopieya penakojiobinejja matapijiwa wujunae. ²⁷ Kopiarure pekato sajinae matakabibeje tajjunatoyo nebaru nakojiobijawa, nejjata jjua kuijinae pakarajutsienatsi itsawa ata apo aponeya neto nakuenabiename 7 paweybeje kuenia." ²⁸ Jacob bajara pakuenia itsi, yajawa peto sajinae matakabibeje Leata kopia ruta. Nejjata Labán rajuta Raquel pejjunatoyo juyapijiwa pepitsinejja. ²⁹ Labán yajawa rajuta Bilha Raquelnejja, peto jayabiwanejjatsi. ³⁰ Nejjata yajawa Jacob baru majita Raquel, beitsi jane itsieta ponu jitsipa bitso Raquel bewelieyo tane Lea. Nejjata Jacob to nakueba Labán 7 paweybeje kuenia. ³¹ PETUJJANENU tane Lea apo pe jitsipaejawatsi, bajara jjuota Ponu to pataruta penakojjitsi nejja, Raquel pijinia maweko. ³² Lea nakojjita nejjata jjeina matapijinu nejja, yajawa wunu ruta Rubén. Powa nejjata jumeitsi: "Tsipaji PETUJJANENU netane ta nuejawa; akonojjae meta tsipae tamona ne jitsipaena." ³³ Nejjata powa jjeina ikatsia yajawa jjeina pebi. Powa jumeitsi: "Tsipaji PETUJJANENU nejume tane apo tane jitsipaejawa, Ponu, nejjata baja, nerajuta panakueto yajawa," nejjata powa wunu ruta Simeón. ³⁴ Ikatsia baja powa nakojjita yajawa to pebitsi. Powa jumeitsi: "Akonojjae ikatsia tamona neyajawa tsane, tsipaji rajutajü akueyabi panakuetobeje." Nejjata wunu ruta Leví. ³⁵ Powa jjeinataba ikatsia yajawa pebi totsi. Powa jumeitsi: "Ikatsia jjuota to najjuonaenajü PETUJJANENU." Bajara jjuota, powa wunu ruta Judá; bajara jjua kuijinae pejji pejjeinajawa kopia ruka.