¹ Abraham wekua nawita bajara pa ira Neguev, jawabelia pona, yajawa na panapona Cades yajawa Shur jawata. Ponu be seikayanu ponapona Gerar jawata. ² Abraham jumeitsi piejawa yabara Sara: "Powa tajuyapijiwa." Nejjata Abimelec, Gerar tujjanenu, itoroba pieja pienewi yajawa waetabatsi Sara. ³ Itsieta Dioso Abimelec kuijita peita mejitsinaeta merewita, nejjata jumeitsi: "Taema, ne tupaenu powa yabara ne pitsiwa, tsipaji powa pamona pejjeinaewa." ⁴ Akanojjae Abimelec apo imojjoyobi bajara powa, nejjata jumeitsi: "PETUJJANENU, ¿Beijitsipame pejjania jamatabu kuenewi? ⁵ ¿Bajara ponu pieja kuijiruta apo e jumeitsi: "Powa tajuyapijiwa"? Bajara powa ata jumeitsi: "Ponu tamata pijinu." Majjua itsinu apo tajamatabu kuene yaputae kueneta yajawa apo nakobe weintsinu." ⁶ Nejjata Dioso jemeitsi ameitsinaeta: "Jjaniejajamu, jjanu kajamatabu kuene yaputanetsi, yajawa kawekua torotatsi pebisia kuene ne itsinejja jjanu jawarena. Bajara jjuota apo ka jayebi ejjanaetsi. ⁷ Bajara jjuota, to kanawiere pieja wa bajara ponu, tsipaji ponu profetano. Ponu kato wajukaena, nejjata asoumutsane. Itsa apo to kanawietsimutsane, yaputaneme jjamu yajawa dajjita niejawi tüpaena." ⁸ Abimelec bajaya kunua nounkota nejjata junata dajjitayo pieja pienewi peita barata. Ponu jumeitsi dajjita pajume, yajawa pebijiwi bitso junawa. ⁹ Nejjata Abimelec junata Abraham yajawa jumeitsi: "¿Dejjua pane itsimu? ¿ Pakuenia jjania pebisia kuene jjanu itsino jjamujawalia,netsi ruae ejjaname jjanu jawatsika yajawa taja irajawata pebisia kuene jjaneto? Jjamu ne itsi ejjaname apo waja jjania taejawa." ¹⁰ Abimelec jumeitsi Abraham: "dejjuajiatsia itsimu pakuenia?" ¹¹ Abraham jumeitsi: "Tsipaji najamatabu jjejeinaju: "Tsipaji meta jota Dioso apo yeyatae pa nakuota nejjata ne beyajjuobiena tajawa mujjutupae." ¹² Beitsi jane itsieta, powa tajuyapijiwa, tajja pejjunatoyo, itsieta taena apo pejjunatoyo; yajawa. ¹³ Pa matakabi Dioso ne pitsapae ejjana tajja pieja boo werena yajawa neponae ejja nakua jawajjiya, jumeitsinu bajara powa: "Netae ajjanaename majjua tajawa kuenemu: dajjita jawa waja jinarutsi nakua, jumeitsimutsane jjanu jawaberena: "Ponu tamatapijinu. ¹⁴ "Nejjata Abimelec pita oveja yajawa bueyewi, yajawa pienewi yajawa pienewi petiriewi, yajawa rajuta Abraham. Nejjata kanawieta Sara, pieja wa, ponu jawalia. ¹⁵ Abimelec jumeitsi: "Taema, taja ira eka neita bara werena. Jota itsa jamatabu pitame ekare." ¹⁶ Sara jumeitsitsi: "Taema, rajutajü nemata píjinu mil potobeje plata. Ta kateibinejja itsa kuene ta itsijawa jjamu jawalia jiwi itajjutua dajjit pane baru jinonopaewi, yajawa dajjita itajjutua, rowielia baja ka kopatatsi." ¹⁷ Nejjata Abraham Diosota to wajuka, nejjata Dioso jumeyaba Abimelec, pieja wa, yajawa pieja pienewanu pejji pejjeinaenejja. ¹⁸ Tsipaji PETUJJANENU mawekuoyaba dajjita petiriewi Abimelec pieja boo jawata, pena nekonitsijjae Sara jawabelia, Abraham pieja wa.