3 ¹ Tokim ol long stap aninit long ol hetman na ol lo, long bihainim ol, na redi long mekim ol gutpela wok, ²  noken tok baksait long wanpela man long abrusim kros na stap isi, soim ol daun pasin long olgeta lain. ³ Bipo mipela yet i no bin kisim kain skul na mipela i bin sakim tok. Mipela i bin i go longwe na kalabus long ol planti tingting na laik bilong bodi. Mipela i stap insait long pasin nogut. Mipela i belhat na les tru long wanpela narapela. ⁴ Tasol taim gutpela pasin bilong God bikpela bilong yumi, na laikim bilong em long ol manmeri i kamap ples klia, ⁵ I no long wok bilong stretpela pasin yumi i mekim, tasol long marimari bilong em i kisim bek mipela. Em i kisim bek yumi long pasin bilong kamap nupela long wok bilong Holi Spirit. ⁶ God i kapsaitim spirit tambu long mipela long wok bilong bikpela Jisas Krais. ⁷ Long marimari em, i bin lusim sin bilong yumi, bai yumi kamap papa long ol samtin bilong bihian bai i stap oltaim. ⁸ Dispela tok ol i ken bilip long en. Mi laikim yupela long autim ol dispela samting, olsem na husait i bilip long God i ken lukaut gut na mekim ol gutpela wok. Dispela ol samting em i gutpela bilong olgeta manmeri. ⁹ Tasol abrusim ol giaman tok bilong tumbuna lain, na pasin bilong tok pait long ol lo. Dispela ol samting em nogat kaikai bilong em na i pipia. ¹⁰   Rausim ol lain husait i kamapim birua namel long yupela, bihain long wanpela o tupela tok lukaut, ¹¹  Save long dispela kain man i givim baksait long gutpela rot na mekim sin na bagarapim em yet. ¹²  Taim mi salim Atemas o Taikikus i kam long yupela, hariap na kam long mi long Nikopolis, we mi bin i gat tingting long malolo. ¹³  yupela salim Senas dispela saveman bilong lo na Apolos, long kam wantaim olgeta samting tupela bai i nidim. ¹⁴  Ol lain bilong yumi i mas lainim long mekim gutpela wok i ken inapim nid bilong ol olsem na ol i ken kamap gutpela. ¹⁵  Ol lain husait i stap wantaim mi hamamas long yupela. Tok hamamas long ol lain husait i save bilip na laikim mipela. Marimari i ken stap wantaim yupela.