3 ¹ Tambu mama bilong en, Naomi i tokim em olsem, "Gutpela pikinini meri bilong mi, inap mi go painim ples bilong yu long kisim malolo na bai olgeta samting bai i orait tasol long yu?" ² Boas em i wanblut bilong yumi na ol wokmeri bilong em i bin stap wantaim yu a? Harim, em bai rausim skin bilong wit bali long nau nait long ples bilong rausim skin. ³ Olsem na yu go waswas, putim wel na gutpela klos na go daun long wok ples bilong rausim wit bali. Tasol yu noken larim em i lukim yu inap em pinisim kaikai na dring. ⁴ Tasol taim bilong slip, yu mas lukim ples em i putim het na slip bai yu ken go apim blanket na slip long lek bilong en. Em yet bai i tokim yu long wanem bai yu mekim.'' ⁵ Orait Rut i tokim Naomi, ''Bai mi mekim olgeta samting olsem yu tok." ⁶ Na em i go daun long wok ples bilong rausim lip bilong wit bali na em bihainim olgeta tok tambu mama bilong em i bin tokim em. ⁷ Taim Boas i kaikai na dring pinis na bel bilong em i gutpela, em i go long slip long het bilong hip bali. Na Rut i kam isi na rausim blanket long lek bilong em na slip. ⁸ Na long biknait dispela man i pilim olsem man i pas long em olsem na em tanim na lukim wanpela meri i slip long lek bilong em! ⁹ Em i askim em, ''Yu husait?'' Na meri bekim olsem, ''Mi Rut, wokmeri bilong yu.Plis, karamapim blanket long wokmeri bilong yu, long wanem, em i wanblut bilong yu." ¹⁰ Boas i tok, ''Piknini meri bilong mi, God Yawe bai mekim gut long yu. Yu bin mekim gutpela pasin tru long wanem i gat ol yangpela man ol i gat planti samting na i nogat samting tasol yu no maritim ol. ¹¹ Yu noken pret pikinini meri! Bai mi mekim olgeta samting yu tok long en, long wanem olgeta manmeri long biktaun hia i save olsem yu gutpela meri tru. ¹² Em i tru olsem mi wanblut bilong Elimelek tasol i gat wanpela wanblut bilong Elimelek i stap hia i klostu moa long mi. ¹³ Slip long hia long nait na long moning, sapos em i laik maritim yu long wanem em i wanblut bilong Elimelek, larim em i mekim pasin ol wanblut i save mekim. Sapos em i no laik mekim olsem, orait bai mi mekim, long God Yawe i stap laip oltaim. Em orait, nau yu slip long hia igo inap moning.'' ¹⁴ Orait Rut i slip long lek bilong en i go inap moning. Tasol em i kirap long bik moning tru na i go long wanem em i no laikim wanpela man long luksave long em. Long wanem Boas i bin tok olsem, "Noken tokaut olsem wanpela meri i bin kam slip long ples bilong rausim skin bilong wit bali." ¹⁵ Na Boas i tok, ''Kisim laplap bilong yu i kam na holim pastaim.'' Taim em i mekim olsem, em i mesaim 6pela bikpela mesa bilong bali insait na givim dispela kago long em long karim i go.Na bihain em i go insait long taun. ¹⁶ Taim Rut i kam long tambu mama bilong en na tambu mama i askim em, "Yu bin mekim olsem wanem tru, pikinini meri? '' Na Rut i tokim em olgeta samting Boas i bin mekim long em. ¹⁷ Na Rut i tok, ''Lukim, em i givim mi dispela 6pela mesa bilong bali na i tok,' Yu no inap go nating long tambu mama bilong yu.''' ¹⁸ Na Naomi i tok, ''Yu stap long hia, pikinini meri bilong mi, inap yu lukim wanem samting bai i kamap, long wanem dispela man bai ino inap kisim gutpela malol inap em i pinisim olgeta samting long nau."