4 ¹ Bai yumi tok wanem long Abraham, husait em i tumbuna bilong yumi long bodi i painim? ² Sapos Abraham i bin kamap stretpela man long wok em i bin mekim, orait em bai i gat as long litimapim nem bilong em yet, tasol i no long ai bilong God. ³ Buk bilong God i tok wanem? "Abraham i bilip long God na long dispela tasol em i kamap stretpela man." ⁴ Long man husait i wok, pei em i kisim i no olsem wanpela presen, nogat dispela em i pei bilong wok em i bin mekim. ⁵ Tasol man husait i no mekim wanpela wok tasol em i bilip long dispela man husait i mekim ol man i no save long God i kamap stretpela, bilip bilong em i mekim em i kamap stretpela man. ⁶ David tu i givim blesing long man husait God i mekim em i kamap stretpela man, i no long wok em i mekim. ⁷ Em i tok olsem, " Husait man ol pasin nogut bilong em God i lusim pinis na ol sin bilong em God i karamapim em i ken amamas. ⁸ Husait man Bikpela i no holim sin bilong em i stap i ken amamas. ⁹ Olsem na dispela blesing i kam long ol lain i katim skin bilong ol tasol o long ol lain i no katim skin bilong ol tu? Yumi tok olsem, " Bilip i mekim Abraham i kamap stretpela man". ¹⁰ Dispela i kamap olsem wanem? Taim Abraham i stap olsem man i katim skin bilong em o man i no katim skin bilong em? I no long taim em i katim skin bilong em, tasol long taim em i no bin katim skin bilong em. ¹¹ Abraham i bin kisim mak bilong katim skin. Dispela em i mak bilong stretpela pasin bilong bilip em bin i gat pinis taim em i stap yet olsem man i no bin katim skin bilong em. Dispela mak em i olsem, em i kamap papa bilong olgeta lain husait i bilip, maski ol i no katim skin bilong ol. Dispela i mekim ol i kamap stretpela man. ¹² Dispela tu i olsem, Abraham i no kamap papa bilong ol lain i katim skin na ol lain i no katim skin tasol, nogat, husait ol i bihainim lek mak bilong bilip bilong papa bilong yumi Abraham long taim em i no katin skin. ¹³ Tok promis i go long Abraham wantaim lain tumbuna bilong em i olsem, em bai kisim olgeta hap bilong graun na dispela i no kam long pasin bilong bihainim lo, tasol long stretpela pasin bilong bilip. ¹⁴ Sapos ol lain i bihainim lo ol bai i kisim olgeta samting, bilip i kamap samting nating na promis bai i no inap kamap. ¹⁵ Lo i kisim belhat i kam, sapos i nogat lo i stap, bai nogat sin. ¹⁶ Olsem na long pasin bilong bilip, insait long marimari, promis bai i go long ol tubuna bilong Abraham - i no long husait i stap aninit long lo tasol, nogat, em bilong ol lain i gat bilip olsem Abraham. Em i papa bilong yumi olgeta, ¹⁷ olsem tok i stap pinis, "Mi mekim yu i kamap papa bilong planti lain." Abraham i stap klostu long husait em i gat bilip long en, em i dispela God husait i save givim laip long dai man na tok na ol samting i no kamap i kamap. ¹⁸ Maski Abraham i go lapun pinis em i gat bikpela bilip tru long God long samting bai i kamap bihain. Olsem na em i kamap papa bilong planti lain manmeri olsem tok em i bin harim pinis, "Olsem tasol bai ol tumbuna bilong yu i kamap." ¹⁹ Em i no slek long bilip. Abraham i luksave olsem, bodi bilong em i no inap long karim pikinini ( long wanem, em i klostu long 100-pela krismas pinis). Em tu i luksave olsem, bilum bilong pikinini long bel bilong Sera i no inap long karim pikinini. ²⁰ Tasol long promis bilong God, Abraham i no surik na i gat tupela tingting. Tasol em i stap strong long bilip na litimapim nem bilong God. ²¹ Em bin i gat strongpela tingting olsem, wanem promis God i mekim, em inap long kamapim. ²² Olsem na dispela i mekim em i kamap stretpela man. ²³ Dispela tok ol i raitim i no bilong em tasol. ²⁴ Dispela tok i bilong yumi tu husait bai i bilip na kamap stretpela long God husait i kirapim Jisas, Bikpela bilong yumi long dai. ²⁵ Dispela em husait ol i bin givim em i go bilong i dai long pasin nogut bilong yumi na i kirap bek long mekim yumi i kamap stretpela man.