¹ Harim beten bilong mi, God Yawe, putim yau long bel krai bilong mi. Bekim beten bilong mi, bilong wanem yu i no save lusim ol gutpela na stretpela pasin bilong yu. ² Yu noken kisim mi i go insait long pasin bilong skelim ol wokman bilong yu, bilong wanem i nogat wanpela i stretpela long ai bilong yu. ³ Birua em i save bihainim sol bilong mi na brukim mi i go daun long graun na em mekim mi slip kirap long tutak olsem ol man dai pinis bipo. ⁴ Spirit bilong mi i tingting planti insait long mi na lewa bilong mi i no inap i stap stret. ⁵ Mi tingim ken i go bek long bipo taim, mi tingting long gutpela bel bilong yu na stretpela pasin bilong yu. ⁶ Mi apim han bilong mi i go antap, sol bilong mi i nek drai long yu olsem ples i nogat wara. Sela. ⁷ God Yawe bekim beten bilong mi hariap, bilong wanem spirit bilong mi em i hap idai. Yu noken haitim pes bilong yu long mi, nogut mi i go daun olsem ol lain i go daun pinis long hul. ⁸ Larim mi i harim tok promis bilong yu long monin, bilong wanem mi i gat bilip long yu. Soim mi wanem rot mi mas i go, olsem na mi litimapim sol bilong mi i go long yu. ⁹ God Yawe helpim mi long ol birua bilong mi, mi ranawe i kam long hait insait long yu. ¹⁰ Skulim mi long mekim laik bilong yu, bilong wanem yu tasol God bilong mi. Larim gutpela spirit bilong yu kisim mi i go long ples antap pulap long stretpela pasin. ¹¹ God Yawe long biknem bilong yu larim mi i stap laip, long stretpela pasin bilong yu kisim sol bilong mi i kam aut long hevi. ¹² Insait long strongpela tok promis bilong yu, katim birua bilong mi na bagarapim olgeta birua long laip bilong mi, bilong wanem mi wokman bilong yu.