1 Bai mi givim tenkyu long yu wantaim olgeta bel bilong mi na long ai bilong ol god bai mi singsing long litimapim yu. 2 Bai mi daunim het i go long haus holi bilong yu na givim tenkyu long yu long wanem yu holim tru kontrak na gutpela nem bilong yu. Yu mekim tok bilong yu na nem bilong yu, i kamap nambawan long olgeta samting. 3 Long dispela dei mi singaut long yu, yu bin helpim mi, yu bin mekim mi strong na tu, yu strongim sol bilong mi. 4 Olgeta king bilong graun bai givim tenkyu long yu God Yawe, olgeta yet bai harim tok long maus bilong yu. 5 Tru tumas, ol bai singsing long ol wok bilong God Yawe, bilong wanem olgeta biknem em bilong God Yawe tasol. 6 Long wanem God Yawe i stap antap tru, tasol em save tingim ol lain husait i daunim ol yet na longwei yet, em i save luksave long ol lain bilong apim ol yet. 7 Taim mi wokabaut namel long hevi laik kamap long en, yu save holim laip bilong mi; yu bai surukim han bilong yu long pes bilong belhat bilong ol birua, bilong mi na bai yu banisim mi long hansut bilong yu. 8 God Yawe bai stap wantaim mi i go inap long arere bilong laip, God Yawe yu holim tru kontrak bilong yu na em stap yet oltaim. Noken givim beksait long wanwan lain husait han bilong yu i mekim.