¹ Ol hait tingting i save kamap insait long bel bilong man em bilong dispela man, tasol ol tok bilong bekim i save kam long God Yawe. ² Olgeta pasin bilong dispela man i stretpela long ai bilong em yet, tasol God Yawe i save lukluk na skelim bel bilong ol man. ³ Tokaut long ol wok bilong yu long God Yawe na ol hait tingting bilong yu bai i kamap gutpela. ⁴ I gat as na God Yawe i kamapim olgeta samting, maski long taim ol man bilong sakim tok tu i bungim hevi. ⁵ God Yawe i no save laikim ol man bel bilong ol i pulap long pasin bilong apim ol yet, tasol yupela i mas save gut olsem, ol bai kisim pei long wanem samting ol i mekim. ⁶ Long pasin bilong wanbel na pasin bilong givim bel i soim pasin bilong lusim rong wantaim pret bilong God Yawe taim ol manmeri i givim baksait long sin. ⁷ Taim man i bihainim pasin God Yawe i laikim, em i ken mekim ol birua bilong dispela man i stap amamas wantaim em. ⁸ Gutpela long yu gat liklik mani na mekim samting em i stret olsem na yu no ken kisim bikpela mani long mekim samting i no stret. ⁹ Long bel man i save kamapim ol hait tingting long bihainim, tasol God Yawe i save stiaim olgeta wokabaut bilong em. ¹⁰ Gutpela na stretpela tok tasol i save stap long maus bilong king na em i no save giaman. ¹¹ Stretpela pasin bilong skelim kilo i save kam long God Yawe, olgeta bilum i hevi em wok bilong em long skelim ¹² Taim ol king i mekim ol samting i no stret, dispela em yumi no ken amamas, long wanem sia king ol i sindaun long en em bilong mekim stretpela wok tasol. ¹³ King i save amamas long man i save toktok long wanem samting em i stret na em i save laikim man i save go pas long givim gutpela toktok. ¹⁴ Belhat bilong king i olsem toksave bilong dai tasol man i gat gutpela tingting bai traim long daunim belhat bilong em. ¹⁵ Taim lait i kamap long pes bilong king em i toktok long laip na laikim bilong em i olsem klaut i save givim ren. ¹⁶ Hamas gutpela tingting na save i stap insait long yu moa long gol. Long kisim gutpela tingting yu mas makim wanem yu laikim em i bikpela moa long silva. ¹⁷ Rot bilong ol stretpela manmeri i save mekim ol manmeri i lusim pasin nogut, man husait i save lukautim laip bilong em i save stiaim wokabaut bilong em. ¹⁸ Pasin bilong apim nem i save kamap long mekim man i kisim bikpela bagarap. ¹⁹ Em i gutpela long daunim yu yet namel long ol rabis man na yu no ken skelim ol man i bagarap wantaim ol manmeri i amamas. ²⁰ Husait ol i bihainim wanem ol i lainim ol bai painim gutpela bilong en, na husait ol i save bilip long God Yawe bai i amamas. ²¹ Man i gat gutpela tingting na save, ol i save kolim ol dispela kain man olsem, man bilong skelim gut tok na ol tok em i mekim i save swit taim ol manmeri i harim. ²² Man i gat klia tingting em i olsem wara i kamap long graun long givim laip long em, tasol tingting bilong ol man nogut em bilong bagarapim ol yet tasol. ²³ Man i gat gutpela tingting na save i mekim gutpela tok tasol na toktok bilong em i ken daunim ol hevi tu. ²⁴ Ol gutpela tok i olsem hani i swit long harim na i oraitim bodi bilong man. ²⁵ I gat rot bai yu ting em i orait long man i bihainim tasol arere bilong en em i dai tasol. ²⁶ Man i givim bel na i mekim wok bilong em, hangre bilong em bai i mekim em i wok moa yet. ²⁷ Man nogut i save painim asua bilong ol man long bagarapim ol na ol toktok em i save mekim i olsem hatpela paia. ²⁸ Man i gat gutpela tingting i save kamapim bel isi na pasin bilong tok baksait i save mekim gutpela wantok bilong yu i go longwe long yu. ²⁹ Man bilong kamapim hevi i save giamanim wantok bilong em na soim em long rot nogut. ³⁰ Na man i pasim ai bilong en em i mekim sain bilong ol laik nogut na ol dispela lain i kaikaim tit bilong ol i mekim pasin nogut pinis. ³¹ Waitpela gras long het em hat king bilong stretpela pasin, em i pulap long bihainim stretpela pasin. ³² Em gutpela long yu no belhat kwik na yu no stap olsem man bilong pait na man husait i save lukautim bel bilong en, em i winim man husait i gat strong long pait na kisim biktaun. ³³ Ol i pilai ston long painim aut ol samting, tasol tok orait i save kam long God Yawe.