1 ¹ Dispela em driman bilong Nahum bilong Elkos. Tok bilong biktaun Ninive. ² God Yawe i no inap larim ol man i lotu long ol god giaman na God i save belhat na bekim pei nogut long ol birua bilong em. ³ God Yawe i gat bikpela strong na i no save belhat hariap. Em i save mekim save long ol man i mekim asua. God Yawe, i save wokabaut insait long bikpela win na ren na klaut i olsem das aniniit long lek bilong em. ⁴ Em i kros long solwara na solwara i drai na olgeta wara tu i drai. Basan wantaim Kamel i no gat strong na ol plawa bilong Lebanon tu i dai. ⁵ Ol maunten i save guria long pes bilong em na ol liklik maunten i save kamap olsem wara, graun na olgeta manmeri i save guria nogut tru long pes bilong em. ⁶ Husait inap sanap istap long taim em i belhat? Husait inap long pasim strongpela belhat bilong em? Belhat bilong em i olsem paia i lait na ol ston i bruk nambaut. ⁷ God Yawe i save mekim gutpela pasin tru, Em i olsem strongpela banis tru na ol man i kam long em long taim bilong hevi oltaim em i save mekim gut long ol. ⁸ Tasol em bai bagarapim tru birua bilong em olsem bikpela wara i tait na em bai kilim ol i dai. ⁹ Yupela ol manmeri i pasim tok long mekim wanem long God Yawe? Em bai pinisim yupela olgeta na yupela i no inap kamapim hevi namba tu taim gen. ¹⁰ Ol bai spak long dring bilong ol yet na i olsem ol nil gras i holim lek bilong ol na ol bai olsem gras i drai na paia i kukim olgeta. ¹¹ Ninive, wanpela man namel long yu i gat tingting nogut bilong strongim pasin nogut na i laik mekim nogut long God Yawe. ¹² Tasol God Yawe i tok olsem, ''Maski ol i gat bikpela strong na bikpela lain i stap, bai mi katim ol na bai ol i no inap i stap moa. Mi bin givim hevi long Juda tasol mi no inap mekim moa. ¹³ Nau bai mi brukim sen i kalabusim yupela.'' ¹⁴ Yu Ninive, God Yawe i givim strongpela tok long yu, ''Bai i no gat ol lain tumbuna bilong yupela i stap moa. Bai mi rausim ol giaman god i stap long ol haus lotu bilong yupela. Bai mi wokim ol matmat bilong yupela, long wanem yupela i save daunim nem bilong mi.'' ¹⁵ Lukim, antap long maunten lek bilong wanpela man i bringim gutnius i kam na tokaut olsem pait i pinis. Juda, yupela amamas long ol bikpela dei bilong yupela na givim ol samting yupela i promis long God, ol lain nogut bilong kisim graun bilong yupela i no stap moa na i pinis olgeta.