2 ¹ Long dispela taim, Sisa Ogastas i putim wanpela lo olsem olgeta manmeri i stap aninit long Roman gavman i mas givim nem bilong ol. ² Em i nambawan taim bilong kaunim olgeta manmeri, dispela i kamap taim Kwairinias i stap gavana bilong provins Siria. ³ Olsem na wanwan i mas go long asples bilong ol long putim nem. ⁴ Josep em i bilong lain famili bilong King Devit, olsem na em i lusim taun Nasaret long Galili na i go long Judia long taun bilong Devit, nem bilong en Betlihem. ⁵ Em i go wantaim Maria long go putim nem. Maria i gat bel, em dispela meri ol i makim bilong maritim em. ⁶ Taim ol i kamap long Betlihem, taim bilong Maria long karim pikinini i kamap. ⁷ Olgeta haus pasindia i pulap na i nogat rum olsem na ol i go slip long haus bilong ol bulmakau, na em i karim nambawan pikinini man bilong en, na i karamapim em long laplap na putim em insait long bokis kaikai bilong ol bulmakau. ⁸ Long dispela nait ol man bilong lukautim sipsip i was long ol sipsip bilong ol ausait long taun Betlihem. ⁹ Wanpela ensel i kamap long ol, na lait bilong glori bilong God i karamapim ol, na ol i pret tru. ¹⁰ Na ensel i tokim ol, " Yupela i no ken pret, mi bringim gutnius long yupela na dispela nius bai i mekim olgeta manmeri i amamas tru". ¹¹ Nau long dispela taim long taun bilong Deivit, wanpela meri i karim pikinini. Dispela pikinini bai i kisim bek olgeta manmeri. Em i Bikpela Kraist! ¹² Na yupela bai i luksave long em olsem. Wanpela pikinini ol i pasim wantaim laplap na i slip long bokis kaikai bilong ol sipsip". ¹³ Wantu bikpela lain ami bilong heven i kamap na i stap wantaim dispela ensel na litimapim nem bilong God na i tok, ¹⁴ "Litimapim nem bilong God antap tru, na long graun ol manmeri i ken stap bel isi, God i bel gut long ol." ¹⁵ Taim ol ensel i lusim na i go pinis long heven, ol wasman bilong sipsip i tok, "Goan yumi go nau long Betlihem na lukim dispela samting i kamap, wei Bikpela i tokim yumi long en.'' ¹⁶ Ol i go hariap na painim Maria tupela Josep, na lukim pikinini i slip long bokis kaikai bilong ol sipsip. ¹⁷ Taim ol i lukim em pinis, ol i tokaut long wanem samting ensel i bin tokim ol long dispela pikinini. ¹⁸ Na olgeta manmeri i harim wanem ol wasman bilong sipsip i tok, ol i tingting planti. ¹⁹ Tasol Maria i putim olgeta dispela tok long bel bilong en na i tingim yet. ²⁰ Ol wasman bilong sipsip i go bek, na i litimapim nem bilong God long wanem samting ol i harim na lukim. Olgeta samting i kamap olsem wanem ensel i bin tokim ol. ²¹ Long 8 pela dei bihain long mama i karim em, ol i katim skin bilong en, na kolim nem bilong em Jisas. Dispela nem ensel i bin givim long en taim mama i no gat bel yet. ²² Taim bilong kamap klin long ai bilong God i pinis, olsem lo bilong Moses i tok. Maria na Josep i kisim pikinini i go long hauslotu long Jerusalem long givim long Bikpela. ²³ Tupela i bihainim lo bilong Bikpela olsem tok istap, "Olgeta nambawan pikinini man mama i karim, ol i mas givim i go long Bikpela." ²⁴ Ol i bihainim olsem lo bilong Bikpela i tok na ol i mekim ofa. "Ol i givim tupela yangpela balus olsem ofa" ²⁵ Long dispela taim i gat wanpela man long Jerusalem, nem bilong en Simion, na dispela man i save mekim stretpela pasin na i save lotu long God. Em i weitim man God i bin makim bilong mekim bel gut long ol Israil na Holi Spirit i stap wantaim em. ²⁶ Holi Spirit i tokim em pinis olsem, em i no inap i dai kwik. Nogat, em i mas lukim Bikpela Kraist pastaim. ²⁷ Holi Spirit i kirapim Simion na em i go insait long tempel. Tupela papa mama bilong pikinini Jisas i bringim em i go long mekim pasin long em olsem lo bilong Moses i tok. ²⁸ Na Simion i kisim em na i holim em long han bilong en na i litimapim nem bilong God olsem, ²⁹ " Bikpela nau yu ken larim wokman bilong yu i go wantaim bel isi, olsem tok bilong yu i tok. ³⁰ Nau ai bilong mi i lukim pinis samting yu mekim bilong kisim bek mipela, ³¹ yu redim long ai bilong olgeta manmeri. ³² Wanpela lait long kamapim laikim bilong yu long ol arapela lain manmeri, na em bai i givim biknem long Israil, em ol lain manmeri bilong yu." ³³ Papa na mama bilong pikinini i tingting planti long wanem tok tupela i harim. ³⁴ Simion i blesim ol na i tokim Maria mama bilong pikinini, "Harim, dispela pikinini God i makim bilong planti manmeri long Israil i mas pundaun na bilong mekim planti i kirap gen . Em bai i kamap olsem wanpela mak bilong ol manmeri i no laikim em. Na tingting hait bilong planti manmeri bai i kamap ples klia. ³⁵ Na bai yu kisim wanpela pen i bikpela tru, olsem bainat i sutim na katim lewa bilong yu. ³⁶ Wanpela profet meri nem bilong en Ana tu i bin i stap. Em i pikinini meri bilong Panuel long lain bilong Asa. Em i lapun tru. Em i bin marit na i stap 7 pela Krismas wantaim man bilong em. ³⁷ Na bihain man bilong en i dai na em i stap 84 Krismas nating. Ana i no save lusim tempel, em i save tambuim kaikai na beten, long nait na dei. ³⁸ Long dispela taim stret Ana i kam klostu long pikinini na i tok tenkiu long God. Na em i autim tok bilong dispela pikinini long ol manmeri i weitim God bai i kisim bek ol manmeri bilong Jerusalem. ³⁹ Taim ol i mekim pinis olgeta samting olsem lo bilong Bikpela i tok, ol i go bek long Galili, long Nasaret em taun bilong ol yet. ⁴⁰ Na pikinini i kamap bikpela na i kamap strong. Na em i gat gutpela tingting na marimari bilong God i stap wantaim em. ⁴¹ Long olgeta yia ol papamama bilong Jisas i save go long Jerusalem long lukim bikpela dei bilong Pasova. ⁴² Long taim Jisas i gat 12-pela Krismas, ol i bihainim pasin bilong bung long ol bikpela dei na ol i go bek long Jerusalem. ⁴³ Taim bilong dispela bikpela dei bilong lotu i pinis, orait ol i go bek long ples bilong ol. Tasol yangpela boi Jisas i stap bek long Jerusalem, na tupela papamama bilong en i no save olsem em i stap bek. ⁴⁴ Ol i ting olsem em i wokabaut wantaim ol arapela i bin kam wantaim ol na ol i wokabaut wanpela dei pinis. Bihain ol i stat painim em namel long ol wanlain na wantok bilong ol. ⁴⁵ Tasol ol i no lukim em. Na ol i go bek long Jerusalem long painim em. ⁴⁶ Bihain long 3-pela de, ol i painim em insait long tempel. Em i sindaun i stap namel wantaim ol tisa bilong lo na i harim ol i toktok na i askim ol tu. ⁴⁷ Ol man i harim em, ol i kirap nogut long save bilong em na long ol tok em i bekim. ⁴⁸ Tupela i lukim em na i kirap nogut. Mama bilong em i tokim em olsem, "Pikinini, bilong wanem yu mekim dispela pasin long mitupela? Harim, mitupela papa bilong yu i bel hevi tru na painim yu." ⁴⁹ Tasol Jisas i bekim tok long tupela, "Bilong wanem yutupela wok long painim mi? Yutupela i no save, olsem mi mas i stap long haus bilong Papa bilong mi?" ⁵⁰ Tasol tupela i no kisim gut as tingting bilong dispela tok em i bekim. ⁵¹ Orait em i go bek long ples wantaim tupela long Nasaret na em i harim na bihain gut olgeta tok bilong ol. Mama bilong em i putim gut ol dispela tok long bel bilong em na i holim i stap. ⁵² Na Jisas i wok long kamap bikpela wantaim gutpela tingting na save. Na God i laikim em tru na ol manmeri tu i laikim em.