1 ¹ Mi Jud, wokman bilong Jisas Krais na mi brata bilong Jems. Mi raitim dispela pas igo long ol manmeri God i laikim ol na lukautim ol insait long Jisas Krais. ² Marimari, na bel isi, na laikim bilong God i ken stap wantaim yupela. ³ Ol fren, taim mi rait i kam long yupela long pasin God i mekim long kisim bek yumi, mi painim olsem em i isi long tokim yupela long holim dispela bilip God i bin givim long ol lain bilong em. ⁴ Yupela i no save na sampela man ino bilip long God i kam long yupela na senisim tok long marimari bilong God bilong yumi na mekim kamap tok bilong ol kain kain pasin nogut. Ol i no save bilip long dispela wanpela Hetman, em Bikpela bilong yumi Jisas Krais. Bipo tru God i bin tok olsem, ol dispela kain man i mas kamap long kot bilong God, na ol bai i lus. ⁵ Nau mi gat laik long tokim yupela olsem, yupela i save pinis long Bikpela, bipo em i kisim ol Israil i kam aut long Isip. Na bihain em i bagarapim ol manmeri i no bilip long em. ⁶ Na ol ensel i no laik i stap gut long dispela wok God i bin givim ol, na ol i lusim ples bilong ol. Olsem na Bikpela i pasim ol long sen i save stap oltaim oltaim, na em i kalabusim ol i stap long ples i tudak nogut tru, na ol i weitim dei bilong bikpela kot bilong God. ⁷ Wankain olsem Sodom na Gomora na ol biktaun i stap klostu long ol, ol i bin mekim wankain pasin olsem ol dispela ensel. Ol i bihainim ol pasin nogut na ol i mekim ol pasin pamuk bihainim laik nogut bilong ol, olsem na ol i kisim pei nogut long faia i nogat pinis bilong em. Ol dispela samting i bin kamap bifo, olsem na yumi ken tingim na noken bihainim ol. ⁸ Long wankain rot ol dispela man i bihainim driman bilong ol na bagarapim bodi bilong ol. Ol i save mekim ol pasin bikhet na mekim ol pasin doti long Bikpela bilong yumi. ⁹ Tasol taim namba wan ensel Maikel i mekim tok pait wantaim Satan long bodi bilong Moses, Maikel i no bikhet, na mekim tok nogut long Satan. Em i tok olsem, Bikpela “yet i ken krosim yu.” ¹⁰ Tasol ol dispela man i save tok nogut long ol samting ol i no save long as bilong en. Ol i olsem ol abus i no gat tingting, na ol i save bihainim ol laik bilong bodi tasol. Dispela pasin bilong ol i save bagarapim ol yet. ¹¹ Lukaut, ol i wokabaut bihainim pasin bilong Kein. Ol i ting long kisim mani, olsem Balam i bin mekim. Na ol i bin bikhet long God, olsem Kora, na long dispela pasin ol i lus. ¹² Ol dispela lain i save kam bagarapim ol gutpela pati bilong yupela. Ol i no save sem, taim ol i kaikai ol i tingim ol yet tasol. Ol i olsem klaut i nogat wara na win i save karim ol i go. Ol i olsem diwai i no save karim frut long taim bilong em na ol i kamautim na ol i dai tupela taim. ¹³ Ol i olsem ol solwara i save bruk bikpela tru wantaim ol pasin nogut bilong ol, na sem bilong ol i save kamap ples klia olsem spet bilong solwara. Ol i olsem ol star ino save bihainim rot bilong ol. God i redim pinis ples i tudak tru bilong ol dispela lain bai igo stap long en oltaim oltaim. ¹⁴ Enok em i namba 7 man bihain long Adam, na em i bin tok profet long ol olsem, “Mi lukim Bikpela i kam wantaim ol planti tausen ensel bilong en. ¹⁵ Em i kam long mekim save long ol na kotim olgeta man. Em i laik mekim ol man ino bilip long God i save long asua ol i bin mekim. Na sampela sinman God i laik mekim ol long pilim tru asua bilong ol tok nogut ol i bin mekim long em.” ¹⁶ Ol dispela man bilong bel nogut, na komplein oltaim. Na ol i save bihainim laik nogut bilong ol yet. Na ol i save bikmaus na hambak nabaut na litimapim nem bilong ol yet. Na ol i save grisim ol man long bihainim laik bilong ol. ¹⁷ Tasol yupela ol brata, yupela i mas tingim gen tok bilong ol aposel bilong Bikpela bilong yumi Jisas Krais, ol i bin autim. ¹⁸ Ol i bin tokim yupela olsem, “Long las dei, ol man bilong tok bilas bai i kam, na ol bai i givim baksait long God na bihainim ol laik nogut bilong ol yet.” ¹⁹ Ol dispela man i save brukim sios. Ol i save bihainim tingting bilong ol man bilong graun tasol, na Holi Spirit i no i stap long ol. ²⁰ Tasol yupela ol brata, oltaim yupela i mas bilip strong long God na stap insait long Holi Spirit na prea long helpim yupela. ²¹ Na yupela i mas i stap insait long laikim bilong God oltaim. Na oltaim yupela i mas wetim Bikpela bilong yumi Jisas Krais na em bai givim yupela laif i stap gut oltaim oltaim. ²² Yupela i mas sori long ol man bilip bilong ol i no strong. ²³ Yupela i mas helpim ol arapela na ol i noken i go long hel faia, na yupela i mas igat pret na sori tru long ol arapela, na yupela i mas stap longwe long ol man i save mekim ol pasin nogut. ²⁴ God inap long lukautim yupela gut na bai yupela i no inap pundaun, na em inap long bringim yupela i go stap long gutpela ples bilong en, na bai yupela i no gat asua, na bai yupela i gat bikpela hamamas tru. ²⁵ Dispela wanpela God em i helpim bilong yumi insait long Jisas Krais, Bikpela bilong yumi. Em i stap king, na lukautim olgeta samting. Biknem na olgeta strong i bilong em. Em i bin stap bifo na nau tu em i stap, na em bai stap wankain tasol oltaim oltaim. I tru.