1 ¹ Bihain long dai bilong Josua, ol manmeri bilong Israel i askim God Yawe, ol i tok,"Husait bai i go pas long yumi na pait wantaim ol Kenan?" ² God Yawe i tok,"Juda bai i go pait. Lukim, mi givim ol pinis dispela graun long lukautim." ³ Ol man bilong Juda i tokim ol man bilong Simeon, ol brata bilong ol,"Kam wantaim mipela i go insait long dispela hap graun ol i givim mipela, bai yumi bung wantaim na pait long ol Kenan. Mipela tu bai i go wantaim yupela long dispela graun ol i givim long yupela."Olsem na ol lain tumbuna bilong Simeon i go wantaim ol. ⁴ Ol man bilong Juda i pait wantaim ol Kenan na ol Peres na God Yawe i helpim ol na ol i winim pait. Ol i kilim 10 000 bilong ol long Besek. ⁵ Ol i painim Adoni- Besek long Besek na ol i pait wantaim em na ol i daunim ol kenan na ol Peres. ⁶ Tasol Adoni-Besek i ranawe na ol i ronim em na holim em, na ol i katim aut bikpela pinga bilong han bilong em na bikpela pinga bilong lek bilong em. ⁷ Adoni- Besek i tok,"70-pela king, husait ol bikpela pinga bilong han na ol bikpela pinga bilong lek bilong ol i katim aut, i kisim kaikai long aninit long tabol bilong mi. Olsem mi mekim, wankain tasol God i mekim long mi." Ol i kisim em i go long Jerusalem na em i dai long hap. ⁸ Ol man bilong Juda i pait wantaim biktaun Jerusalem na i kisim. Ol i kilim ol manmeri wantaim bainat na kukim dispela biktaun. ⁹ Bihain long dispela ol man bilong Juda i go daun long pait wantaim ol Kenan husait i save stap long maunten kantri, long Negef na long ples i stap daunbilo long maunten long hap san i go daun. ¹⁰ Juda i go pait wantaim ol Kenan husait i save stap long Hebron ( nem bilong Hebron bipo ol i kolim Kiriat Aba ) na ol i daunim Sesai, Aiman na Talmai. ¹¹ Long hap ol man bilong Juda i go pait long ol lain bilong Debi ( nem bilong Debi bipo ol i kolim Kiriat Sefa ). ¹² Kalep i tok,"Husait i go pait wantaim Kiriat Sefa na i kisim em, bai mi givim Aksa, pikinini meri bilong mi long kamap meri bilong em." ¹³ Otniel pikinini man bilong Kenas ( yangpela brata bilong Kalep ) i go na kisim ples Debi , olsem na Kalep i givim Aksa pikinini meri bilong em long kamap meri bilong em. ¹⁴ Hariap tasol Aksa i kam long Otniel, na em i tokim em long askim papa bilong em long givim hap graun. Taim em i kam daun long donki, Kalep i askim em,"Yu laikim wanem?" ¹⁵ Aksa i tokim em,"Givim me wanpela gutpela samting. Olsem yu i bin givim mi graun bilong Negev, orait givim mi graun i gat wara."Olsem na Kalep i givim em graun i gat wara i stap antap na graun i gat wara long daunbilo. ¹⁶ Ol Kena husait i tumbuna lain bilong tambu bilong Moses i kam antap olsem long Biktaun bilong Pam wantaim ol manmeri bilong Juda, i go insait long ples nating bilong Juda,em i Negev long stap wantaim ol manmeri bilong Juda i stap klostu long Arat. ¹⁷ Ol man bilong Juda i go wantaim ol man bilong Simeon ol brata bilong ol na pait long ol Kenan husait i save stap long Jefat na ol i bagarapim olgeta. Nem bilong dispela biktaun ol i kolim Homa. ¹⁸ Ol manmeri bilong Juda i kisim Gasa na ol graun arere long en, Askelon na ol graun arere lo en na Ekron na ol graun arere long en. ¹⁹ God Yawe i stap wantaim ol manmeri bilong Juda na ol i kisim ol ples long maunten kantri, tasol ol i no rausim ol lain i save stap long ol ples daun bilong wanem ol i gat ain karis. ²⁰ Hebron ol i givim long Kalep ( olsem Moses i tok ), na em i rausim tripela pikinini man bilong Anak long dispela hap. ²¹ Tasol ol manmeri bilong Bensamin i no rausim ol Jebu husait i save stap long Jerusalem. Olsem na ol Jebu i save stap wantaim ol manmeri bilong Bensamin long Jerusalem i kam inap long dispela dei. ²² Ol lain bilong Josep i redi long pait wamtaim ol Betel na God Yawe i bin stap wantaim ol. ²³ Ol i salim ol man long luk stil long Betel ( dispela biktaun ol bin kolim Lus ). ²⁴ Ol man bilong luk stil i lukim wanpela man i kam autsait long biktaun na ol i tokim em,''Inap yu soim mipela wanem rot long go insait long biktaun na mipela bai i mekim gut long yu. " ²⁵ Em i soim ol wanpela rot i go insait long biktaun olsem na ol i kilim olgeta manmeri wantaim sap bainat, tasol ol i lusim dispela man wantaim ol famili bilong em i go. ²⁶ Na dispela man i go long graun bilong ol Hit na i mekim wanpela biktaun na i kolim Lus, em nem bilong em i kam inap nau. ²⁷ Ol manmeri bilong Manase i no rausim ol manmeri i stap long biktaun bilong Bet San na ol haus lain, ol Tanak na haus lain, ol i save stap long Do na haus lain, ol lain husait i stap long Iblem na haus lain na ol i save stap long Megido na haus lain bilong wanem ol Kenan i strong moa na ol i stap long dispela graun. ²⁸ Taim ol Israel i kamap strong ol i mekim ol Kenan i kamap wokboi nating na hat wok tru, tasol ol i no rausim ol i go aut olgeta. ²⁹ Efraim i no rausim ol Kenan husait i save stap long Gesa, olsem na ol Kenan i stap yet long Gesa wantaim ol. ³⁰ Sebulun i no rausim ol manmeri husait i save stap long Kitron, ol manmeri i stap long Nahalol, olsem na ol Kenan i stap wantaim ol, tasol Sebulun i mekim ol Kenan i kamap wokboi nating na ol i wok hat tru. ³¹ Asa i no rausim ol manmeri i stap long Ako, ol manmeri i stap long Sidon, ol manmeri i stap long Alap,Aksip, Helba, Afek na Rehop. ³² Olsem na ol lain bilong Asa i stap wantaim ol Kenan ( husait i stap long dispela graun ), bilong wanem ol i no rausim ol i go aut. ³³ Ol lain bilong Naftali i no rausim ol lain husait i save stap long Bet Semes na ol lain i stap long Bet Anat. Olsem na ol lain Naftali i stap wantaim ol lain Kenan ( ol manmeri i stap long dispela hap graun ) . Tasol ol manmeri i save stap long Bet Semes na Bet Anat i kamap wokboi nating bilong ol Naftali. ³⁴ Ol lain bilong Amo i strong na rausim ol lain bilong Dan i go i stap antap long maunten kantri, ol i no larim ol i kam daun long stretpela ples. ³⁵ Olsem na ol Amo i stap long Maunten Heres, long Aisalon, long Salbim, tasol ol ami bilong lain bilong Josep i strong moa na i kisim dispela hap na ol i mekim ol i kamap wokboi nating na hat wok tru . ³⁶ Dispela mak bilong ol Amo i stat long maunten bilong Akrapim long Sela na i go antap long maunten kantri.