20 ¹ Long yia King bilong Asiria i salim Tatan i kam long Asdot, em i pait long ol Asdot na i kisim taun. ² Long dispela taim God Yawe i toktok long maus bilong Aisaia pikinini man bilong Amos na i tok, "Go na rausim ol brukbruk klos long hip bilong yu, na rausim su long lek bilong yu." Em i mekim olsem na i wokabaut as na lek nating. ³ God Yawe i tok, "Olsem Aisaia wok man bilong mi i bin wokabaut as na lek nating long tripela yia, em i wanpela mak long ol samting nogut bai i kamap long ol Isip na long ol lain Kus, ⁴ long dispela pasin bai king bilong Asiria i kisim ol kalabus manmeri bilong Isip i go na ol kalabus manmeri bilong Kus tu, ol yangpela na ol lapun i as nating na lek nating na i no karamapim as wantaim bilong givim sem long Isip. ⁵ Bai ol i kirap nogut na pilim sem, bilong wanem ol i tingting long ol Kus em i helpim ol long pait na biknem ol i givim long kantri Isip. ⁶ Ol manmeri i stap arere long nambis bilong solwara bai i tok, 'Tru tumas, yumi bin tingting long kisim helpim long wanpela strongpela kantri na yumi bin ranawe long king bilong Asiria na nau, olsem wanem bai yumi i ranawe?'''