7 ¹ Yahweh i tokim Noa, ''Kam, yu na olgeta haus lain bilong yu, kam insait long bikpela sip, mi lukim olsem yu wanpela stretpela man long ai bilong mi long dispela taim. ² Long olgeta klinpela abus yu bai kisim i go wantaim yu, seven pela man na seven pela meri. Na long ol abus we i no klin long em, kisim tupela tupela, man na meri. ³ Wankain tu long ol pisin antap long skai, kisim seven pela man na seven pela meri, long holim ol lain tumbuna bilong ol bai i no ken lus long dispela graun. ⁴ Bihain long seven pela dei mi bai salim ren kam daun long graun, na em bai ren inap long 40pela de na 40pela nait. Bai mi bagarapim olgeta samting mi bin wokim long en, na i gat laip antap long dispela graun. ⁵ Na Noa i bin mekim olgeta samting olsem Yahweh i tok long en . ⁶ Noa i gat 600 yia taim tait wara i bin kamap long olgeta hap bilong dispela graun. ⁷ Na, ol pikinini man bilong Noa, meri bilong em na ol meri bilong pikinini man bilong em,ol i bin i go insait long sip, long wanem, bikpela tait wara i kamap. ⁸ Ol klin na doti abus, ol pisin, na olgeta samting i save raun long bel long graun, ⁹ Tupela,abus wanpela man na wanpela meri, ol i kam long Noa na i go insait long sip,olsem tasol God i bin tokim Noa long en. ¹⁰ Na bihain long seven pela de, wara tait i bruk na kam antap long graun. ¹¹ Long 600 yia long laip bilong Noa, long namba tu mun, long namba 17de bilong dispela mun, long dispela de tasol, olgeta wara insait long graun i bruk na sut i kam antap long graun, na ol windua bilong heven i op. ¹² Na ren i pundaun long olgeta hap graun inap long 40pela de na 40pela nait. ¹³ Long dispela wanpela de tasol, Noa na olgeta pikinini man bilong em, Sem, Ham, na Jafet, na meri bilong em, na ol tripela meri bilong pikinini man bilong em ol i go insait long sip. ¹⁴ Ol i go insait wantaim wanwan welabus wankain olsem ol yet, na wanwan abus ol man save lukautim long em wankain olsem ol yet, na wanwan abus i save raun long bel long graun wankain olsem ol yet, na ol kainkain pisin wankain olsem ol yet, na ol abus i gat wing long em tu. ¹⁵ Tupela bilong olgeta samting i gat laip na save kisim win ol i kam long Noa na i go insait long sip. ¹⁶ Dispela ol abus i bin i go insait, em ol man na meri igat laip, ol i bin i go insait wankain olsem God i bin tokim em. Na Yahweh i pasim dua taim ol i go insait pinis. ¹⁷ Orait, tait wara i bin kam antap long dispela graun long 40pela de, na wara i kamap bikpela moa na apim sip na kisim i go antap tru abrusim graun. ¹⁸ Dispela wara i bin karamapim olgeta hap bilong dispela graun na sip i bin trip antap long wara. ¹⁹ Wara i bin kamap bikpela tru na i bin karamapim olgeta longpela maunten i stap aninit long skai. ²⁰ Dispela tait wara i bin kamap bikpela tru inap olsem 6mita i abrusim ol longpela maunten. ²¹ Olgeta samting i gat laip i bin i stap antap long graun ol i dai, ol pisin, na ol abus man i save lukautim, na ol wel abus,wantaim olgeta samting i bin i stap planti tru long graun, na olgeta man meri tu i bin i dai. ²² Olgeta samting i bin istap long dispela graun, na i bin kisim dispela win bilong laip insait long nus bilong ol, olgeta i dai. ²³ Olsem na olgeta samting i gat laip i bin istap antap long graun ol i dai olgeta, long ol manmeri na i go long ol bikpela abus,na samting i save raun long bel na tu ol pisin bilong skai. Olgeta i bin bagarap long graun. Tasol Noa wantaim ol lain i bin istap wantaim em long sip i no kisim bagarap. ²⁴ Dispela wara i no bin drai inap long 150pela de.