1 ¹ Dispela em ol nem bilong ol pikinini man bilong Israel husait i bin kam long Isip wantaim Jekop, Ol dispela wanwan pikinini man tu i kam wantaim femili bilong ol: ² Ruben, Simion, Livai na Juda, ³ Isaka, Sebulun na Bensamin, ⁴ Dan, Naptali, Gad na Aser. ⁵ Namba bilong ol lain manmeri husait em ol pikinini na tumbuna bilong Jekop i 70-pela olgeta. Josep i bin stap pinis long Isip long dispela taim. ⁶ Na bihain Josep, wantaim ol lain brata bilong em na ol lain tumbuna i go stap long Isip na lo i dai. ⁷ Ol Israel i kamapim planti gutpela samting na namba bilong ol tu i go bikpela na ol i kamap strong olgeta na i pulap tru long olgeta hap bilong Isip. ⁸ Tasol bihain wanpela nupela king i kirap long Isip, dispela king i no save long Josep i wanem kain man. ⁹ Em i tokim ol lain manmeri bilong em olsem, "Lukim, namba bilong ol lain Israel i kamap planti tru na ol i kamap strong moa long yumi. ¹⁰ Yumi mas kamap wantaim ol gutpela tingting na yumi mas mekim sampela samting long ol, sapos i no olsem, bai namba bilong ol i kamap bikpela yet na bikpela pait i bruk ol bai go bung wantaim ol birua bilong yumi na pait long yumi long lusim graun bilong yumi. ¹¹ Olsem na ol i putim ol man bilong bosim ol na daunim ol na givim ol strongpela wok long mekim. Ol Israel i mekim ol bikpela stoa long ol biktaun bilong Fero: em Pitom na Ramesis. ¹² Tasol planti taim ol Isip save mekim nogut long ol, namba bilong ol Israel i wok long kamap bikpela moa yet na ol i go long olgeta hap. Olsem na ol Isip i pret tru long ol Israel. ¹³ Ol Isip i mekim ol Israel i kisim bikpela bagarap na pen long wok ol i mekim. ¹⁴ Ol i kisim bagarap na pen long laip bilong ol long wok wantaim wesan na simen bilong mekim ol brik samting na ol narapela wok tu. Wanem wok ol i mekim, em i gat bagarap na pen tasol. ¹⁵ Orait king bilong Isip i toktok long tupela meri i save helpim ol Hibru meri long taim bilong karim pikinini, nem bilong wanpela em Sifra na narapela em Pua. ¹⁶ Em i tokim ol olsem, "Taim yupela i helpim ol Hibru meri long bet bilong karim pikinini, lukluk gut long taim ol i karim. Sapos em pikinini man orait yupela i mas kilim, tasol sapos em pikinini meri orait yupela i ken larim em i stap laip." ¹⁷ Tasol tupela meri i save helpim ol Hibru meri long karim pikinini i gat pret long God olsem na ol ino bihainim wanem tok king bilong Isip i bin givim long ol, nogat, ol i larim ol pikinini man bilong ol Hibru i stap laip. ¹⁸ Olsem na king bilong Isip i singautim tupela meri i save helpim ol Hibru meri long karim pikinini i kam long em na tokim ol olsem, "Bilong wanem na yupela i mekim olsem na yupela larim ol pikinini man i stap laip?" ¹⁹ Na tupela meri i save helpim ol Hibru meri long karim pikinini, i bekim tok bilong Fero olsem, "Ol Hibru meri ino wankain olsem ol meri Isip. Em ol strongpela meri olsem na ol i save karim pikinini hariap taim mipela ol meri bilong helpim ol long karim pikinini ino kam yet long helpim ol." ²⁰ God i bin lukautim tupela meri i save helpim ol Hibru meri long karim pikinini. Na namba bilong ol lain Israel i kamap bikpela na ol i wok long kamap strong. ²¹ God i givim femili long tupela meri i save helpim ol Hibru meri long karim pikinini, long wanem, ol i gat pret long Em. ²² Orait Fero i tokim ol lain manmeri bilong em olsem, "Yupela i mas tromoi olgeta pikinini man bilong ol Israel long wara, tasol olgeta pikinini meri, em yupela i mas larim ol i stap laip."