2 ¹ Bihain long ol dispela samting taim belhat bilong King Serksis i pinis, em i tingting long Vasti na ol samting em i bin mekim. Em i tingting tu long ol lo em i bin mekim bilong bagarapim em. ² Olsem na ol yangpela man husat i save wok long king ol i tok," larim wanpela wok painim aut bilong ol yangpela naispela meri i no bin slip wantaim man i ken kamap bilong maritim king". ³ Larim king i makim ol ofisa insait long olgeta provins long kingdom bilong em long bungim olgeta naispela yangpela meri long rum bilong ol meri insait long strongpela banis long Susa. Larim ol i stap aninit long lukaut bilong Hagai, em ofisa bilong king husat i save was long ol meri na larim em i stretim na lukautim bodi bilong ol. ⁴ "Larim yangpela meri husat i inapim laik na tingting bilong king i ken maritim em bilong kisim ples bilong Vasti." Dispela tok stia i inapim tingting bilong king na em i mekim olsem. ⁵ I bin i gat wanpela man Juda insait long strongpela banis bilong Susa nem bilong em Modekai, pikinini man bilong Jair, em pikinini man bilong Simei na em pikinini man bilong Kis husat i bilong lain Benjamin. ⁶ Ol i bin rausim em long Jerusalem wantaim ol arapela manmeri husat i lusim ples na i go wantaim Jehoiakin king bilong Juda, husat Nebukatnesar king bilong Babilon i kisim i go. ⁷ Em i save lukautim Adasa, narapela nem bilong em Esta. Em i pikinini meri bilong brata bilong papa bilong em, bilong wanem em i nogat papa na mama. Dispela yangpela meri i gat gutpela bodi na em i luk nais tru. Modekai i kisim em na lukautim em olsem pikinini meri bilong em yet. ⁸ Taim ol lo na tok orait king i givim i kamap ples klia, ol i bringim ol planti yangpela meri i go long strongpela banis bilong Susa. Ol i putim ol aninit long lukaut bilong Hagai. Ol i bringim Esta tu i go insait long aus bilong king na putim em aninit long lukaut bilong Hagai, man bilong lukautim ol meri. ⁹ Dispela yangpela meri i inapim tru laik na tingting bilong en. Kwiktaim em i givim em ol samting bilong wasim na lukautim bodi bilong em na ol kaikai long skel bilong em. Em i makim 7-pela yangpela wok meri long haus bilong king bai ol i ken wok long dispela yangpela meri na em i salim ol yangpela wok meri na dispela yangpela meri i go long naispela ples tru insait long haus bilong ol meri. ¹⁰ Esta i no tokim wanpela man long husat em ol lain bilong en na ol femili bilong en, bilong wanem Modekai i bin tokim em long noken tokaut. ¹¹ Olgeta dei Modekai i save wokabaut i go i kam autsait long ples bung long haus bilong ol meri bilong luksave long ol i lukautim Esta olsem wanem na ol bai i mekim wanem long em. ¹² Dispela taim i kamap long ol wanwan yangpela meri bai i go long King Serksis. Bihainim lo bilong ol meri, wanwan yangpela meri i mas pinisim 12-pela mun bilong stretim gut bodi bilong ol, 6-pela mun wantaim wel ol i kukim i save givim gutpela smel na 6-pela mun wantaim ol samting bilong givim gutpela smel na stretim bodi, ¹³ taim wanpela yangpela meri i go long king, em i save bringim i go wantaim em wanem samting em i laikim tumas long haus bilong ol meri, bilong em long bringim i go long haus bilong king. ¹⁴ Long apinun em bai i go insait na long monin taim em bai i go bek long namba tu haus bilong ol meri na stap aninit long lukaut bilong Sasgas, em ofisa bilong king i save lukautim ol meri bilong king. Em bai i no inap i go bek long king inap taim king i laikim em tru na singautim em. ¹⁵ Nau dispela taim i kamap bilong Esta, em i pikinini meri bilong Abihail, liklik papa bilong Modekai, husat i bin kisim em na lukautim olsem pikinini meri bilong em yet long i go long king. Em i no askim long wanpela samting tasol Hagai em ofisa bilong king husat i save lukautim ol meri i tok. Nau olgeta lain i lukim Esta ol i laikim em tru. ¹⁶ Ol i bringim Esta i go long king Serksis insait long banis em i save stap long en long Tebet, em namba 10 mun, long namba 7 yia long taim em i stap king. ¹⁷ King i laikim Esta moa yet winim ol arapela meri na kisim em na laikim em tru winim olgeta yangpela meri i no bin slip wantaim man yet. Olsem na em i putim hat bilong kwin long het bilong en na mekim em i kamap kwin na kisim ples bilong Vasti. ¹⁸ King i mekim bikpela pati bilong ol ofisa na ol wokboi bilong em, pati bilong Esta na em i givim malolo long ol na i no kisim takis long ol provins. Em i givim tu ol presen wantaim pasin bilong king. ¹⁹ Nau taim ol yangpela meri i no bin slip wantaim man i kam bung long namba tu taim, Modekai i sindaun long dua bilong banis bilong king. ²⁰ Esta i no tokim wanpela man yet long ol femili na ol lain bilong em olsem Modekai i tokim em. Em i wok long bihainim skul tok bilong Modekai olsem em i save mekim long taim em i save lukautim em. ²¹ Long ol dispela dei taim Modekai i save sindaun long dua bilong banis bilong king. Tupela ofisa bilong king, Biktana na Teres husat i save was long dua i belhat na painim rot long bagarapim King Serksis. ²² Taim ol dispela samting i kamap ples klia long Modekai, em i tokim Kwin Esta na Esta i go toktok long king makim maus bilong Modekai. ²³ Dispela tok ol i wok painim aut na lukim olsem em i tru na ol i hangamapim dispela tupela man long diwai bilong hangamapim ol man bilong bikhet. Dispela samting ol i raitim i go daun long buk bilong ol stori long ai bilong king.