3 ¹ Ol brata tru, nau em mi raitim namba 2 pas i go long yupela long kirapim tingting bilong yupela long tingim gen ol dispela samting na tingting bilong yupela i ken i stap stret olgeta. ² Mi laikim yupela mas tingim gen ol toktok ol profet i bin autim bipo na wanem ol lo Bikpela bilong yumi Jisas Krais i givim long maus bilong ol aposol. ³ Bikpela samting yupela i mas save pastaim em olsem, ol man bilong tok bilas bai kamap long las de na ol bai bihainim laik nogut bilong ol. ⁴ Bai ol i tok bilas olsem, "Wanem taim Krais bai i kam bek gen? Bipo olgeta samting i kamap ol i stap wankain tasol i kam inap ol tumbuna bilong mipela i dai pinis. ⁵ Ol i mekim dispela kain tok. Long wanem, ol i no laikim long save long tok bilong God olsem, em i tok na skai i bin kamap na em i tok na graun i lusim wara na i kam antap. ⁶ Na bihain God i tok na bikpela ai wara i kamap na tait i bagarapim graun wantaim olgeta samting. ⁷ Na nau long wankain pasin tasol heven na graun i wet long paia bai kukim long wankain tok bilong God. Ol i wetim de bilong kot na ol manmeri i save givim baksait long God bai bagarap olgeta. ⁸ Ol pren tru, mi laik yupela i save gut olsem, long God wanpela de i olsem 1,000 yia na 1,000 yia i olsem wanpela de. ⁹ Sampela man i save ting olsem, Bikpela i save isi isi long kamapim ol promis bilong em. Nogat.Tasol em i isi long yupela na em i  wet istap. Em i no laik bai wanpela i lus. Em i laik bai olgeta manmeri i mas tanim bel long ol pasin nogut. ¹⁰  Tasol dei bilong Bikpela bai i kam olsem  stilman. Skai bai pairap bikpela na pinis  olgeta. Paia bai kukim graun wantaim  olgeta samting istap long en. ¹¹  Sapos ogeta samting bai i bagarap long  dispela kain pasin. Bai yupela istap ol  wanem kain manmeri? Yupela i mas stap  holi na bihainim pasin bilong God. ¹²  Yupela mas wetim dispela de bilong God i     kam na yupela i mas mekim wok strong       long hariapim dispela de. Long dispela de     bai hatpela paia bai kukim skai wantaim       olgeta samting na bai kamap olsem wara. ¹³  Tasol long promis bilong em, yumi save  wetim nupela heven na nupela graun na  stretpela pasin tasol bai stap long en. ¹⁴  Olsem na ol brata tru, yupela i save wet  long ol dispela samting bai i kamap, yupela  i mas wok strong na laip bilong yupela i  noken gat makmak na asua na wokabaut  wantaim bel isi long ai bilong God. ¹⁵  Bikpela i save isi isi long yupela na i wet  istap. Em i mekim olsem, long wanem, em i  laik kisim bek yumi. Brata tru bilong yumi  Pol i raitim dispela tok tu long yupela  wantaim save Bikpela i givim long em. ¹⁶  Long ol pas Pol i raitim, em i toktok long ol  dispela samting. Em i tru olsem, sampela  toktok em yumi i no inap long save gut long  en. Olsem na ol man i no save gut long tok  bilong God na ol man bilip bilong ol i no  strong i save autim dispela tok na paulim.  Ol i save mekim long ol narapela tok bilong  God tu. Olsem na ol bai bagarap. ¹⁷  Olsem na ol brata tru, yupela i save pinis  long ol dispela samting. Yupela i mas  lukaut gut. Yupela i no ken larim ol giaman  man bilong sakim lo i paulim yupela na  yupela i lusim bilip. ¹⁸  Tasol yupela i mas kamap bikpela moa long  marimari na kisim gutpela save moa long  Bikpela bilong yumi Jisas Krais.Yumi mas  litimapim nem bilong em long nau na  oltaim oltaim.I tru.