Yecuwa bobuꞌrek mäjibäk änzï buräk babaräk ¹ Yecuwa na wällore wïwung dobaꞌrode yuwe thïk ye Jaräcïng onyago dogärägang gerek ï Jellill. ² Maung memema Yecuwa bonyagok änzï därämbik deno ngïräk, ongokpeng bogättok äno buräk babaräk berek bathok änzo nämuräk, buräk babaräk ippi beng bonak mäjibäk cik. ³ Ongokpeng bogak [bithäthade, barärek] yo nämuräk. Obärïk billak bamüde äna bamättok ängäng würenya. ⁴ Ongokpeng bogak bomämättagägagok ängäng nyägäk na nyägung, oꞌrïna ongokpeng bothäthigok würenya thäki thäki na obäronco mallong änno nyägak nyïyung. Ongokpeng bogak boborok gättïng, obärïk billak bathorïkïyok. ⁵ Ongokpeng bothäppïyok nängkora na ithängki yoꞌrägik ye nämuräk na ye moꞌrong, ongokpeng bokäꞌrecok guyï na omeme gatha gïgung ängäng mäbok. ⁶ Ongokpeng boꞌrämede Yecuwa babuthäk, oꞌrämïna ongokpeng bollode yanzagok agothicindok cïk ängäng nängkuk nïnung, ⁷ Angokpeng ogäꞌro guyï gättïng äna,“Yecuwa, Thäguräk Thabaräk The Gänzï Gimmäng Gättïng! Oungbeng bonareng ngänï änanagïng? Ottok Gänzï, oïngbeng bayïdïddïgoyang oungbeng bädagenyïkïng!” ⁸ Ongokpeng bomok irri reng gaka Yecuwa bomok äna thäjibäk ollu änzï buräk babaräk ippi beng!” ⁹ Oꞌrämïna Yecuwa bothuwungoyok äna,“Oungbeng bïkka yayï?” Buräk babaräk bobärïcek äna,“Oïngbeng bïkka äna‘Liyon, gaka oningdeng dogadüyik!’ ¹⁰ Ongokpeng bïdaddok ïdïddïgok Yecuwa äna bädanyängok mäjibäk änzï tharäk thottäk. ¹¹ Thäntok the Niddärük nerek thogak wuro odänok debük thäbïk the thoꞌrong. ¹² Oꞌrämïna mäjibäk mïdïddïgode Yecuwa äna,“Dinyudening ï niddärük inni neng, aningdeng ollok cik.” ¹³ Ongokpeng bogäyïnok mäjibäk ga gollok änzï burak babaräk agonyago ï niddärük. Niddärük anwuk nogak rämmek gurrung geꞌrak, niddärük nollok oräbo do gadändäng agaꞌräꞌrukok ï ngïräk. ¹⁴ Wuräk wïyaräk wewe wegak wure niddärük wollok agodaco rong änzïk re Yecuwa ï tharäk thottäk änzïk athwuk, wurïdena wuräk wogäcigode agonyago doꞌräme ngänï beng begak. ¹⁵ Maung memema ogengdeng dorok danda Yecuwa, ogengdeng dïnyode buräk babaräk bebe bekak benak mäjibäk cik. Ongokpeng bogak onängok cïk borïng ga bïthagok nadïya nïnung, ogengdeng adwuk donak näthäräk. ¹⁶ Ogengdeng dede deꞌrämek dïrenok wuräk rong rere regayïnok buräk babaräk na re niddärük. ¹⁷ Oꞌrämïna ogengdeng domode Yecuwa äna banyago änzï tharäk thottäk thïtheng. ¹⁸ Maung memema Yecuwa boduwungok ï därämbik deno ngïräk, buräk babaräk bebe benak mäjibäk cik bïdïddïgodok äna danyago nanulluk!” ¹⁹ Oꞌrïna Yecuwa bädagäyïnoyok ga ogengdeng onyago adwuk. Ongokpeng bomodok äna,‘Ängko ogappïno wuräk we dawuwang dïdang ayïreno geng äna Gäꞌrok goyegok nanageng cayï na gogak nanagak cayï.” ²⁰ Oꞌrämïna buräk babaräk beng bebe bonyagok othäppïyo ï maräk mottäk gurrung ga godänzïno rong rerera Yecuwa bonängïndok. Wurïdena wuräk auk wewe wegäcigode wogak wodäregok änzïk. ²¹ Maung memema Yecuwa bonyagok obaꞌrok Yuwe thïk gämme ängäng därämbik deno ngïräk ogappok do thäbïk the gärägang gerek. Thäntok the wuräk wüyik thappïttagode nanagok amïyagoyok do gärägang ge yuwe. ²² Wurïdena buräk babaräk berek bogak thobong the gayïk ge dappïttagok nang de Yawük bogak bïkkak äna Yarïyoc, maung memema ongokpeng boꞌrämek Yecuwa angokpeng odirothïk ïngkäk nyïnyung. ²³ A ongokpeng ïdïddïgok Yecuwa äna,“Thäguräk thäguräk thïthïng thonya gättïng. Ottok arek aräguthok ängäng nyägung nyïnyang a ongokpeng änana odeka borïng! ²⁴ Oꞌrämïna Yecuwa bonyagok ängagok, ga wuräk wüyik omakoyok na ogäꞌrïnttïnyoyok. ²⁵ Buräk babayï berek bogak bangicok [ngïnyok cïk, ngonyakok cïk, ngoräbok cïk] nanagok räbuk gurrung na weꞌrak(12), ²⁶ Ongokpeng bogak bogenyak gättïng na gicikok natteräk no wakïng wüyik. Oꞌrïna ongokpeng bidaddok ïyïcïgok gättïng ändokonang. ²⁷ Maung memema ongokpeng bogäcigode rong nana Yecuwa, oꞌrämïna ongokpeng bomakode Yecuwa oko ï wuräk ändothägeng agorüngkoyok gadïya, ²⁸ Gaka ongokpeng bonak ï ngäꞌre ngïngung äna,“Naa oïngbeng borüngkode gadïya gïgung, ayïngbeng ïyarägïk.” ²⁹ Nicok ngogädeyode nang othoräkok änzïgagok a ongokpeng ïnynyok äna bodekak borïng. ³⁰ Ängäng reng rere mik Yecuwa bännanang äna dobora donyagok änzïgagok, oꞌrämïna ongokpeng bobärïyagok cïk yoꞌrägik ye wuräk agothuwungo äna,“Obïthung beng berüngkode gadïya gïgïng?” ³¹ Wällore wïwung woräbïcek äna,‘Oungbeng bïthämäng wuräk woga odinttittiyok nanagang, oungbeng bathuwungo äna obïthung beng berüngkodang?” ³² Oꞌrïna Yecuwa bomagïyok agoꞌräme obïthung beng bebe berüngkodïng. ³³ Wurïdena buräk babayï bännak ngänï beng bekadok, oꞌrämïna ongokpeng bonyagok yanza Yecuwa ängäng näthäräk gagorängo, ongokpeng bodirok cïk ängäng nängkuk nïnung yokik gïgung agomoyok arwuk rere regayik. ³⁴ Yecuwa bomodok äna,“Thäguräk thïthïng thabayï, doroyik dïdang doräguthoyang. Ängko ängäng märïng, ongokpeng na borägïkok.” ³⁵ Maung memema Yecuwa bogak ïꞌre irri reng mik, wodinyagok werek wathok änzawuwang ye Yarïyoc thobong the gayïk ge dappïttagok nang de Yawüd agomoyok äna,“Thäguräk thïthang thïnyok.” Oungbeng bagenyïke bännïke ï gatha bodenï.” ³⁶ Yecuwa bogäcigode rong rerera ogengdeng dïꞌrek ïrrïng, Yecuwa bomodok äna,“Oruyik, oungbeng bädana näthäräk baꞌräng.” ³⁷ Wurïdena Yecuwa bädagäyïnok obärïk gagomakoyok, oꞌrïna bogäyïnok Bodäruc bälläk na Nyaguk na obang bïbung babaräk Yuwana ga ogengdeng omakoyok. ³⁸ Maung memema ogengdeng dathok dorok cawuwang ye Yarïyoc thobong the gayïk ge dappïttagok nang de Yawüd, Yecuwa boꞌrämek diddiko de wuräk na dongotho de wuräk gättïng. ³⁹ Maung memema ngokpeng bothinyok dawuwang, ongokpeng bomode geng äna,“Onongdeng dagerre na ongotho onayïnï? Thäguräk thädanyok, oꞌrïna ongokpeng boga ïndde baꞌräng.” ⁴⁰ Oꞌrïna ogengdeng docäcüllok nanagok, na maung memema ongokpeng bonyängode geng däbäk adwuk, ongokpeng bommok obädeng be thäguräk thabayï na obäneng na wällore wäddäk agengdeng onyago do bangka nana thäguräk thogak ithäcak. ⁴¹ Ongokpeng boraboyok thängung thïthung agomoyok äna,“Dallïtha, güm, ‘Rong reng roga äna,‘Thäguräk thabayï thetteng, Oïngbeng bamoyang äna güyogu änzïk!” ⁴² Ängäng reng rere mik thäguräk thogädeyode nang othäppïyo. (Thäguräk thonak räbuk gurrung na weꞌrak.) Maung memema rong irri reng rogak, ogengdeng dogak doräballak änzïk bäꞌrik. ⁴³ Oꞌrïna Yecuwa bïthede geng gäꞌrok äna onongdeng dädayïreno obärïk ngeng, Yecuwa bomode geng äna ändenong cok waräberek agorägo.