¹ Ne songo unkundwa wa Gayi, we muganile muvwa nalyoli. ² Nkundwa, nkuputa ukuti zyonti zijendaje ishete poka niwe nukutiu wivwaje ahinza, inza she umuzimu waho ulishete. ³ She nasesheye nkani lwe avamwitu vinzile ukuhomeshezya uvwanalyoli vwavo, inza she ukujendela muvwanalyoli. ⁴ Nte nuluseshelo ulupiti ukushila palizi, ukwivwa ukuti avana vane vakujenda muvwanalyoli. ⁵ Nkundwa ukulanjizya uvusuvalilwa pa zyonti zye ukuvavombela avamwitu na vajeni. ⁶ Ve vanyamuye uvwahome vwa shikunzi shaho pilongolela ilya shivanza. vavomvile ishete ukuvatuma venevo pavulendo vwavo mwidala lwe likumushela uMulungu. ⁷ Shifukwa ishakulondola izina she vepeye, vatahasenda nashimo ukufuma kuva kunzi. ⁸ Iswe lelo tuvaposhele inza vanava ukuti tuve swe vavomvi avamwavo mu vwanalyoli. ⁹ Nkashisimbila zimo ishivanza, nkandi u Diyotilefi, we aganile ukuva wakwanda pavavo atakutuposhela iswe. ¹⁰ Pe ishi inga ninza, ndiyitizya ulutejelezyo kuzye akuvomba., nizyilenga zye akutuyanjila poka namazwi amavivi. Atahikuta nizyo zyeka, tekuhana kweka ukuvaposhela avamwitu uwene, nkandi nakwe kuvalesya vonti ve vakwanza ukuvaposhela vavo nukuvashimbizya mushivanza. ¹¹ Nkundwa, atahejelelaje ishivivi nkandi she shinza. Uno wenga akuvomba inyinza wakwa Mulungu: umuvomba mbivi atamuvonyi uMulungu. ¹² U Demetiyasi ahaposhela ulusimishizyo ulwinza ukufuma ku vonti nuvwa nalyoli vwakwe. Niswe vulo tukusimishizya nizya wuyo, umanyile ukuti ulusimishizyo lwitu lwanalyoli. ¹³ Ine namile nazyo izyakukusimbila iwe, nkandi ine ntahanza ukukusimbila izyo nishisimbilo ni inki. ¹⁴ Nkandi ine nkusuvila ukukwenya iwe shinishi, pe tuliziyanga paminso na paminso. ¹⁵ Umutende wuvanje niwe. Avamanyi vakulamuha. Uvalamushe avamanyani vitu kula kwizina.