¹ Shinishi ukuyana nivyakulya ivya kufinjila ku malungu: Iswe tumanyile ukuti swenti tuli nu vumanyi. Uvumanyi vukuyikwezya nkani, nkandi ulugano lukuzenga nkani. ² Inga wumo akusiva uwene ashimanyile shimo, umuntu wula ashili atazimanyile vwevunuvo avajiye ukumanyila. ³ Loli inga wumo amukunzite uMulungu, umuntu wewula amanyikwilwe na wuyo. ⁴ Ishi pe, ukuyana ukulya ishakulya she vafinjiye ku malungu: Tukumanya ukuti imilungu munsi umu yite nimbombo nayimo havili ukuti pataliko nawumo uMulungu nkandi woka. ⁵ Nape pope inga vangavapo vevakwitwa malungu, kali kwe kumwanya pamu munsi umu ( inza she galiko gevinji ''Amalangu'' havili avinji ava ''Mwene''), ⁶ loli kukwitu iswe kulivulo woka uMulungu, uTata, kukwakwe kuli ivintu vyonti havili kuli wuyo she twe valanzi, havili woka uMwene uYesu chilisiti, ukujendela mumwakwe niswe tulipo. ⁷ Pope, nuvumanyi uvu vutali muli wonti. muvuzilo vwakwe, vamo kwisinda vahavombaga ukuputa amalungu, havili vahalyanga ivyakulya ukuti ngati vyevila vye vahafinjilaga ku malungu. Inyenyezyo zyavo zye vali nazyo zyali nyazu shifukwa shakuti zyali nyeyevazu. ⁸ Nkandi ivyakulya vitalitwimilila iswe kwa Mulngu. Teswe vavivi inga tutakulya, pope teswe vinza inga tukulya vyenevyo. ⁹ Pelelo vuleme ishete uvusatushe vwinyu ukuti vutayipelaje ukuva shifukwa kuwumo we ukupunula mulwitiho avulaziwe. ¹⁰ Ave ukuti wumo akukwenya iwe, we ali nuvumanyi, akulya ishakulya mukasi mu tempeli lya malungu. Tekwekuti uvuyeyevazu vwakwe uvwa nyenyezyo vutangamugomya ukulya kuvye vifinjilwe ku malungu? ¹¹ pashifukwa ishakwivwisya kwinyu ukuyana nu vwanalyoli uvwa kupeliwa uvwa malungu, umuyeyevazu, uwamwavo we uChilisiti amufwiliye, ananjisile. ¹² Vunuvo, inga mukutala amalandu kuvamwinyu havili nukuvulazya inyenyezyo injeyevazu, mukutala amalandu kwa Chilisiti. ¹³ Pelelo, inga ivyakulya vikumupelela uwamwinyu ukupunula, ntalitela indiye inyama havili, ukuti ntahinze imupelele uwamwitu ukuti agwe.