¹ Tigomo ta Asere ti zi kasi ure unu uruu sa maa suri nisissizo u nyara anu sa wa di wuzi me katuma uruu. ² Sa wa barka ma di nya we bidinari a nihiri nan anu akatuma me, ma tuburko we uruu me. ³ Sa ma ma suro in azumo uturoi ma kem aye wa ciki ahira a ni'ori sarki katuma ku wuza. ⁴ Ma gun we, "shi cangi taru ni uruu me, vat imum sa ya wunna shi indi nya shi.' Ba dusa ahira a katuma me. ⁵ Ma kuri ma suri uganiya azumo utasi ma kuri ma suri uhana uzumo uturoi, mas kuri ma wuzi anime. ⁶ Ma kuri ma suri in azumo ukirau in ni'inde, ma kem aye wa turi hem anime, ma gun we, 'Nyanini i turi aba me sarki imum i wuza vatyt anihiri?' ⁷ Wa gun me, 'Barki daki ta kem de sa ma di nyan duru katuma kani ba.' Ma gun we, "Shi cangi hana ni uruu me. ' ⁸ Sa uwunjoro wa wunna, unu uruu me ma gun inu unu tarsa uruu me tita anu akatuma me u nya konde avi ikirfi ime, tuba ahira ande sa we wani wa aye in adumo u masirkan ande sa wa tuba u aye. ⁹ Sa ande sa waa eh in azumo ukirau in ni'inde ma nya konde avi bidinari. ¹⁰ Sa anu utuba u aye waa eh, wa basa iwe me idi teki inu gbardang, wa iri a nya konde avi bidinari ni inde. ¹¹ Sa wa kabi ikirfi me, wa humoro unu uruu me. ¹² Wa gu, 'Anu u aye adumo wa wunna uganiya u inde uni in katuma me, hu be wa kurzo duru rep nan we, haru sa ti hiri uwui wa punza duru apum.' ¹³ Ma kabirka unu inde anyimo awe me ma gun me, 'Uroni, daki ma wuza shi a buri ba. Daki ta barka abidinari bi inde anihiri ba? ¹⁴ Kaba imum sa izi iwe udusa mi mani ma ira ya wunna uri in nya anu u aye adumo me rep na hu. ¹⁵ Daki ma bari in wuzi imum sa ya wunnam uri in imum im ba? Nani ni e'ru nini izin barki sa inzin in imum ihuma?' ¹⁶ Ani me ani anu adumo wa di cukuno anu aje, anu aje wa kuri adumo, atita gbardang azauka anu cingiling.'' ¹⁷ Sa Yaso maa hazi a urushalima, ma ziki anu ukirau in ware me anikira, uganiya sa wazin tanu ma gun we, ¹⁸ "Irani, ''ti haza Urshalima, adi kuri a nya vana unu atari ta anu adandang akatuma ka Asere nan anu nyettike. Wa di kuri wa weki me tize ti inko u huna iwono ¹⁹ Wa di kuri wa nya me atari tanu taa me tize ta Asere barki wa wuzi me nibasa, wa cobi me, wa kuri wa gankirka me. Unu wui u taru ma di hiri.'' ²⁰ Abini me a,ino ahana a zabadi ma eh nan ahana ame me ahira Yeso ma tunguno aje ame me ma iki ire imum ahira ame. ²¹ Yeso ma gun me, "Nyanini u nyara?" ma gun me "Wunna ahana am ware wa geme wa cukuno anyimo atigomo tuwe me, unu inde atari tinare unu inde tari tinan gure." ²² Yeso ma gun in ahana me, "I tashi imum me sa i igizo ba, i dake isi iso ijassi sa indi si?" Wa gun me, "Ti da ke" ²³ Ma gun we, "Kandundure ida ke i si iso im, u cukuno atari tinare nan tinan gure inzo mi mani in nikara ni u nya ba, aco um asesere ma inki barki de sa ma zauka." ²⁴ Sa ukasu anu tarsa ume ukirau me wa kunna ani me, wa kunna kang anuhenu ware me. ²⁵ Yeso ma titi we ahira ame me ma gu, "I rusa ubari sa agomo ande sa wa zo a yahudawa wani ba wa ka bezi anice ni anu awe me, ananu awe me cangi wa ka bezi ubari anice ni anu awe me. ²⁶ Ida cukuno me anime anyimo ashi me ba, a anime de sa ma nyara ma cukuno unu udandang gbas ma cukuno urere ushi. ²⁷ nan de sa ma nyara ma cukuno unaje ashi, gbas ma cukuno urere ushi. ²⁸ kasi sa vana unu ma aye inzo agi awuzi me nirere ba, me mani ma di wuzi nirere bati ma buri anu gbardang." ²⁹ Sa waa suri uyeriko, anu gbardang wa tarsi we. ³⁰ Wa kem arubo ware wa ciki anikira ni una, sa wa kunna yeso tantu aka wa yeze amyirang wa gu, "Ugomo Asere, usam u Dauda kunna ugogoni uru" ³¹ nigura me ni tarika we agi wa wu tik wa kuri wa kinki uyeze amyirang wa gu "Ugomo Asere usam u Dauda buran duru." ³² Ba Yeso ma tonno dang ma titi we ma gu, "I nyara in wu shi aneni?" ³³ Wa gun me, "Ugomo Asere, ti nyara upokin duru aje" ³⁴ Barki ugogoni yeso ma dari aje awe me, adusa apokino uganiya me wa tarsi me.