¹ Aveni ma teki unu gbardang? Rep uganiya ugino me anu manza ume me wa eh ahira a yeso wa iki me wa gu, "Aveni ma teki unu gbardang anyimo a tigomo ti Asesere?" ² Ma titi vana ucing anyimo awe. ³ Yeso ma titi vana ucing ahira ame, ma gu, "kadundure in boo shi in daki ya kurzo ace ashi kasi ahana acicing ba, ida ribe shi anyimo a tigomo ti asesere ba. ⁴ Barki anime vat de sa ma tuzo nice nume kasi vana ucing me mani unu udandang anyimo a ti g ta sesere. ⁵ Vat de sa ma kaba vana ucing kasi uge me barki mi, im mani ma kaba. ⁶ Vat de sa ma wunna unu inde anyimo a hana age me ma cara abangan sa wa hem in mi, idi teki a tirzi me unanzu udang i iriri areki me anyimo uraba udang uconcong. ⁷ Timum be sa ti ehzen inu pilzino Wa de unee barki uganiya upilzino, barki ya cukuno gbas uganiya u eh, ana me wa de hu, de sa uganiya wa aye u suro uwe! ⁸ Yoro ubuna nan tari tuwe me u vette ni ingi ti wuza we ucara abangan iteki u riba a tigomo ta sesere inu buna u inde nan tari ti inde wa inu guna areki we anyimo ura uzatu umarsa in tibuna tuwe tire nan tari tire. ⁹ Ingi nije nuwe me ni wuza u upilko tasa nini uvete ni, iteki u ribe a tigomo ta sesere in nije ni inde inu gunna areki we ura u zatu u marsa in naje ana are. ¹⁰ Hirani kati i izi unu inde anyimo ahana acicing a geme ba, in boo shi ibe i kadura ka Asere awe me wa hira muhenu ma acoo am de sa ma ra anyimo asesere. ¹¹ I rusa vana unu ma aye barki ma buri ande sa wa hunne we. Nyanini i basa? ingi uye ma zin ini tam ini ni'ino bi inde ba hunne me i hira ma da ceki me ukasu me ma dusa u nyara u bi inde me ba? ¹³ Ingi ma tinka bini, iriba ime me idi rumi i teki a'ino ukirau uzati u bi inde me (99). ¹⁴ Ani me ani acoo ushi me sa ma rani anyimo asesere ma da nyara me unu inde anyimo a hana a cincing wa geme ma corno me ba. Ingi u henu uwe me ma cara we abanga, hana uka buka me hu nan me, ingi ma kunna we wa bura me. ¹⁶ Ingi daki ma kunna we ba nyara unu inde nani anu wa re nan hu, barki anyo anu ware nani wa taru u tonno amaru atize ake a kabi. ¹⁷ Ingi daki ma kunna we ba, ubuki anu tarsa Asere ingi ma game u kunna anu tarsa Asere uziki me de sa ma tame Asere nani unu ukabsa u ikirfi i manyanga. ¹⁸ Kadundure in boo shi vatt imum me sa ya tira unee izin nu tira asesere imum be sa ya sopo unee asopo asesere. ¹⁹ In kuri in buu shi, ingi anu ware anyimo ashi me unee wa hem wa iko ire imum, aco um sa ma rani anyimo asesere ma di nya we. ²⁰ Barki vat ahira me sa anu ware nani wa taru wa gurna anyimo a niza num izi nan we. ²¹ Ara anyimo anime Bitrus ma eh ma gun yeso, ugomo Asere kani ka hono kani uhenu um ma di carum iriba ni in vette ni? kanu sunare? ²² Yeso ma gun inzo kanu sunare ba, ma gun me sunare kani akuri u sunare. ²³ Barki ani me adi bati tigomo ta sesere nan ure Ugomo sa ma nyara ma basa ucira ume me atari ti arere ame me. ²⁴ Sa maa ra anyimo ubassa me a ehn in me in ure urere sa ma tarsa me ikirfi sa ma da ke ma bi ba. ²⁵ Sa ma dira imum ukurzo meni, Sakura ma gu azizi me nan uneh me wan ahana me vat nan imum me sa ma zini akurzo ikirfi meni. ²⁶ Urere ma tunguno ma gun me,"Sakura nata iriba indi kurzo we kondi nyani. ²⁷ Sakura me ma kunna ugogoni urere me ma gu a ceki ureme me. ²⁸ Sa ma suro ma gurna nan ure uroni me sa ma tarsa me ureme ikiirfi cing ma patti me iriri, ma gu 'nyam imum me sa in tarsa we. ²⁹ Uroni me ma tunguno ma gun me nata iruba indi kurzo we ni.' ³⁰ Urere me ma ga me ma han unu roni me akura a nirere, agi ma kurzo me ni. ³¹ Sa aroni akatuma wa kunna imum me icari we mu riban wa kurzo Sakura imum me ni vatt. ³² Sakura ma titi me ma gun me, "Hu urere uburi mani, ma ceki vat imum me sa in tarsa we sa wa rizom. ³³ Daki ya wuna iri ukunna ugogoni uroni uwe me urere, kasi mi sa ma kunna u goggoni uweme ba ?' ³⁴ Sakura ma kunna iriba kang ma gu a nya me ijasi ma kurzo vat ureme sa matarsa me. ³⁵ Ani me ani acoo um sa ma rani anyimo asesere ma di wuzi vat de sa ma nyari me uceki uhenu ume me ini ruba ka inde."