¹ Are a Farisawa nan anu nyettike udungara u Musa wa eh ahira a Yeso usuro urushalima. Wa gu, ² "Nyanini ya wuna anu manza uwe me wa pattilka utanda wa nanu? Barki sa wa ka ri imum yare sarki u kpico utari." ³ Yeso ma kabirka we ma gu, "Nyanini ya wuna shi i pattala tize ta Asere barki utanda ushi? ⁴ Barki agu, Hira Aco uweme nan Ka'ino umeme gongon,' nan 'Desa ma buka imum ibur anice na aco me nani A'ino me, kadure madi wi.' ⁵ Shi be ya guna, 'Desa ma gunna in ka Aco me nani A'ino me, "Vat ubenke sa izi idi kem ahira am ana me nyanki u nya Asere uni,'" ⁶ Daki ya cukunu gbass unu me ma hiri Aco me gonogo. A anemi ya vete tize ta Asere barki utanda ushi. ⁷ Anu abur! Ine ini Ishaya ma buuki ace ashime unu guna, ⁸ 'Inozon me in tinyo tini cas mu ruba mu shi me mu zi pitt nan mi. ⁹ Heem ini i nonzo ni mi, Barki sa wa dungara u inko utize ta anu ayo imum utarsa.''' Ba ma titi nigura na nu ahira ame ma gun we, "Kunna ni i rusi- ¹¹ Azo imum be sa idi ribe anyo unu ini idi cari me ni ba.Senke, imum be sa idi suri anyo ame, ine ini idi cari me." ¹² Anu tarsa ume me wa eh wa gun me, "U rusa anu bezi urusa wa kunna muruba in tize tigino me?" ¹³ Yeso ma kabirka ma gu, "Vat tibira sa tizome ta co um tini Aseseri ba ca a rufi tini. ¹⁴ Cekini we a rubo wani zi unu hungo arubo. I ngi urubo ma hunguko urubo, vat uwe wadi rizi anyimo uwaa.'' ¹⁵ Bitrus ma kabirka ma gun in Yeso, "Pokon duru tige tize me." ¹⁶ Yeso magu, "Ana me daki ya rusa ba? ¹⁷ Daki ya ira imum sa aka ri, iki tarsa, apuru ika suro ani kinki? ¹⁸ Ba ti mumum sa ti suso ayo ti suso ini amu riba. Ti ne tini ti car ununi. ¹⁹ Barki ti mum ti bur ti suso iruba ini, u huna unu, umusa in ane anu, ucara hana anu, nikari, u impo amaru ama cico, nan ti zogo. ²⁰ Ti mumum ti geme tine tini ti cara unun. A anime azo are imu mare sarki ukpico utari ine ini icarsa unu ba.'' ²¹ Yeso ma dusa uhana amanyanga mati pinpin ti u Taya nan usidon. ²² A bini me, uri unee wa anu kanana ma eh inu hunu unu gusa" buram ugomo Asere, usam u Dauda! ugbergene ma mekim uca uni." ²³ Yeso ma ciki tik, unu tarsa u Yeso ma gun me gido me mazi unu wuza uru sisip nan nugbejere. ²⁴ Yeso ma kabirka ma gun we, "A tummam barki itam isaraila sa ya hunna me inzo barki uye ba." ²⁵ Ma eh ma tungunu ma gu, "Ugomo Asere buram." ²⁶ Ma kabirka ma gu, "I da rizi me a ziki imumyare ya hana anya ahana i woci ba." ²⁷ Ma gu, Ee ugomo Asere, a hana iwoci me wa ka ri imumyare sa irizizo a dizi yana tikura tuwe me." ²⁸ Yeso ma kabirka ma gun me, "Une u hem uweme uzin ni kara, ca imumme sa unyara kukunu." ²⁹ A bini me Yeso ma tarsi urabi uraba udandand u Galili. Ma nyene ahira azallang ma cukuno ni. ³⁰ Anu gbardang wa eh ahira ame me. Nigo me nan anu zatu utibuna nan tari, arubo, anu uvavi upebu, nan aturi wan anu atikoni, gbardang wa inki we ati buna ti Yeso' ma humman we. ³¹ I cukuno anu imum ugamara, aturi in tize, anu uvavi upebu wa huma, anu zatu uti buna in tanu, arubo unu hira. Abini me wa nonzo Asere Isaraila. ³² Yeso ma titi anu tarsa umeme ma gu, "In kunna ugogoni wa anu ageme, kaani tiye ti taru nan mi, sarki imum yare. Nda nyaram in ceki we wa dusa ani me ba kati wa aki wa bilizi una." ³³ Anu manza ume me wa gu me. "Abani tidi kem imum yare sa idi bari anu age me gbardang ana me, a nija nige me?" ³⁴ Yeso ma iki ma gun we, "Uborodi uhono uni izini?" Wa gu, "Unu sunare nan mucere mu cincing cingiling." ³⁵ Ba Yeso ma wu nigura nanu me wa cukuno adizi. ³⁶ Ma ziki uborodi unu sunare me nan icere ma ringirka ma pussi, ma nya anu utarsa umeme, wa hari anu me. ³⁷ Anu me vat wari wati, wa ori mubuzuru me, u myinca mu gira usunare. ³⁸ Anu me sa wari wa biki anu ni'ino kana akure anazi, sarki aneh nan ahana. ³⁹ Sa Yeso ma hirza nigura nanu me ma ribe uzirgi gbei ma dusa uhana amanyanga Umagadan.