¹ Kadura usuro ahira a Bulus, Silas, nanTimoti, uhana ahira anu tarsa Asere Utasalonikawa anyimo a ugomo Asere acoo nan Yeso vana ume me. Ca masaa nan iriba irum idi ishi me. ² Ti zini iriba irum kondi uya uwui ahira Ugomo Asere barki vat ushi,anyimo a biringira biru. ³ Ti ringizi in katuma ka riri kashi me aje Ugomo Asere acoo,sarki umarsa,katuma ku nyara u nihenu,muriba mu sheu,barki uhana anaje anyimo a Yeso vana a Ugomo Asere . ⁴ Nihenu maa hem inshi, to dusa maa zauka shi, ⁵ barki tize ti Ugomo Asere tiru taa eh ahira ashi azo in agurang ani gas ba, usuro anikira ni bibe bilau nan uhem uni udang. Una u inde me, i kuri rusa usasana wa anu sa taa zi anyimo ashi me barki shi. ⁶ Ya cukuno anu manza uru nan Ugomo Asere, gusi u zina me sa ya kabi tize ti Ugomo Asere me, anyimo ijasi nan iriba irum anyimo bibe bilau bu Ugomo Asere. ⁷ Barki ani me, ya cukuno anu u'inso aje, daki Umakidoniya nan Ukaya cas ba ande sa wa hem. ⁸ Barki usuro ushi me uni tize ti Ugomo Asere taa samirka , daki Umakidoniya nan Ukaya cas ba. Uwito ace ashi me anyimo atize ta Asere ta hana piit. ⁹ We ina ce awe me waa bezi usasana iriba iru anyimo ashi me. wa buki uzina uwito ace ashi me ahira Asere, ya ceki utarsa umakiri barki i tarsi Asere. ¹⁰ Wa buki i zinu ube u ze uvanaa Asere Yeso sa madi ze usuro asessere, de be sa maa hiri usuro iwono ka'inde. Me mani Yeso, debe sa maa burin duru usuro iriba iburi ya Asere sa i ehze.