3 ¹ پس یهودیان چی برتری دَأرد و یا ختنه چی ارزشی دَأره؟ ² بله، خدا یهودیانِ رِه امتیازاتِ زیادی قائل بوبُسته، اول جی همه اَنکی خدا خو کلامَ، اوشَأنَ امانت فَأدَه دَأره. ³ ولی اگر بعضی جی اوشَأن اَمین نوبود، چی شَه گوفتأن؟ آیا اوشَأنِ بی ایمانی خدا امانتَ باطلَ کونه؟ ⁴ هیچموقع، حتی اگر همۀ آدمان دوروغگو بوبود، خدا راسگویِه. هوطو کی کیتابِ مقدسِ مزامیرِ دورون بینیویشته بوبُسته: «تی راسگویی، وَأستی تی گب زَئَن دورون آشکارَ بِه، و تی دوروستکاری وَأستی محاکمه دورون ثابت بیبِه» ⁵ ولی بعضی اَطو فکر کوند کی خوبه اَمَأن بی ایمان بِمَأنیم، اَمی گوناهان، ثمره خوبی دَأره، چره کی وختی مردم بیدیند کی اَمَأن چقده بدیم، بهتر فَهمده کی خدا چقدر خوبه. پس اگر اَطو کی اوشَأن گویده بیبِه، آیا اِنصافِه کی خدا اَمرَه جزا بِدِه؟ چونکی اَمی گوناهان اونِ جلالَ کمک بوکوده دَأره. ⁶ ولی به هیچ وجه اَجور نییِه، وگرنه خدا چوطو تَأنِه جهانَ داوری بوکونه؟ ⁷ اگر می دوروغ مرَه، خدا راستی ویشتر آشکارَ بِه و خدا جلال پیدا کونه، دِ چره وَأستی من ایتِه گوناهکارِ مَأنَستَأن محکوم بوبوم؟ ⁸ اگر بخَأئیم اَجور فکر بوکونیم، به اَ نتیجه رِسیم کی وَأستی بوگوئیم: «بائید بدی بوکونیم تا خوبی به بار بَأیِه.» بعضی اَمرَه اِفترا زِنِد و گومان کوند کی اَمَأن اَطو گوئیم، انصاف اَنِ کی اَجور آدمان محکوم بوبود. ⁹ پس چی بوگوئیم، یعنی اَمَأن یهودیان، غیر یهودیانِ جَه بهتریم؟ نه هیچ اَطو نییِه، پِشتر بوگوفتیم کی چی یهودی و چی غیرِ یهودی همه گوناهکارد. ¹⁰ هوطو کی کیتابِ مقدسِ مزامیرِ دورون بینیویشته بوبُسته: «کسی بی گوناه نییِه، حتی اینفر، ¹¹ هیچکی نیِه کی بِفهمه و خدا راهَ بیشِه، کسی واقعاً خدا طالب نییِه، ¹² همه خدا جَه رو وَأگردأنه دَأرِد و گومراهَ بوستد، همه تَه راستِ راهِ جَه مُنحرفَ بوستد، حتی اینفر هم پیدا نیبِه کی دوروسکار بیبِه. ¹³ اَشَأنِ گولی، قبری یَ مَأنِه کی اونِ رو بازه و تَعفنِ بویَ دِهِه، خوشَأنِ زبانَ کلک زَئَنِ رِه بکار گیرِد، و اَشَأنِ کنایه، لانتی زهرِ مَأنستَأنه. ¹⁴ و اَشَأنِ دَهَن جی فُحش و ناسزا پوره ، ¹⁵ و اَشَأنِ پاهان خونریزی رِه تونده. ¹⁶ هر جا شوده ویرانی و بدبختی بجا نِهِد. ¹⁷ و صلح و سلامتی راهَ نشناخته دَأرِد. ¹⁸ اَشَأنِ چومَأنِ میَأن خدا ترسی دیننی.» ¹⁹ هَسَه دَأنیم کی اونچی شریعت گوفتَأن دِره، اونِ منظور کسانی ایسِه کی شریعت دَأرد، تا دِ هیچکی نِتَأنه عذر و بهانه ای بَأوره و همۀ مردم خوشَأنَ خدا ورجَه مقصر و محکوم بدَأند. ²⁰ پس دینیدی کی شریعتِ اعمالِ انجام دَئَنِ اَمرَه هیچکی نِتَأنِه خدا رضایتَ بدس بَأوره، شریعتِ کار اَنِ کی فقط اَمی چومَه وَأکونه تا اَمی گوناهانَ بیدینیم. و هر چی ویشتر شریعتَ بدَأنیم، ویشتر فهمیم کی اونَ پامال کوده دَأریم. ²¹ ولی خدا ایتَه راهِ دیگر اَمرَه نیشان بدَه دَأره، هَسَه اون بی گوناه به حیساب اَمون کی خدا طرفِ جَه یِه، و تورات و پیغمبرَأن اونِ رِه شهادت بدَه دَأرد آشکارَ بوسته، اَ تازه راه دِ سابقِ مَأنستَأن نییِه، و بدونِ شریعت ²² و فقط جی راهِ ایمان به عیسی مسیح، خدا همۀ ایماندارانَ پاک و بی گوناه به حیساب اَوره و هیچ فرقی هم کسی رِه قائل نییِه. ²³ چره کی همه گوناه بوکودِه دَأرد و خدا جلالِ جَه محرومد. ²⁴ اما خدا فیضِ وَسی، همه به صورت مجانی بواسطۀ عیسی مسیح قربانی بوستَأن، بی گوناه به حیساب اَیِد. ²⁵ چره کی خدا عیسی مسیحَه گوناهانِ کفاره رِه عرضه بوکود. کفاره ای کی بواسطۀ عیسی مسیح خون، و جی راهِ ایمان حاصل اَیِه و اَ کارِه اَمرَه خدا خو عدالتَ ثابت بوکود، چون پِشتر خو تحملِ الهی وَسی آدمیانِ گوناهانَ ندید بیگیفته بو تا عیسی مسیح بَأیِه و همه تَأنِ گوناهانَ پاکَ کونه. ²⁶ خدا اَ کارَه بوکود تا هَسَه خو عدالتَ ثابت بوکونه، تا هم خودش عادل به حیساب بَأیه، هم هر کسی یَ کی عیسی مسیحَ ایمان اَوره عادل حیساب بوکونه. ²⁷ آیا هَسَه دِ کسی تَأنِه خودشَ افتخار بوکونه و خیال بوکونه خو اعمال و رفتارِ خوبِ وَسی نجات پیدا کوده و خدا مقبول بوبُسته؟ هیچموقع، چره؟ چونکی جی راهِ اعمالِ مذهبی انجام دَئَن نجات بدس نَأیِه، بلکی جی راهِ کارهایی کی عیسی مسیح اَمرِه انجام بدَه دَأره و ایمانی کی اَمَأن اونَ اَوریم بدس اَیِه. ²⁸ اَمَأن یقین دَأریم کی انسان، جی راهِ ایمان و بدون اینکی شریعتِ اَعمالَ انجام بِدِه کاملاً عادل به حیساب اَیِه. ²⁹ آیا خدا فقط یهودیانِ خدایه؟ آیا غیرِ یهودیانِ خدا نییِه؟ البته کی غیرِ یهودیانِ خدا هم ایسِه. ³⁰ چره کی فقط ایتَه خدا وجود دَأره، و اون خدا، یهودیانَ بر اساس ایمان و غیرِ یهودیانم بر اساسِ هو ایمان عادل به حیساب اَوره. ³¹ آیا هَسَه کی ایمانِ اَمرَه نجات پیدا کونیم، دِ لازم نییِه کی خدا احکامَ ایطاعت بوکونیم؟ نه، اَطو نییِه، بلکی زمانی تَأنیم خدا احکامَ دوروست ایطاعت بوکونیم کی عیسی مسیحَ ایمان بَأوریم.