31 ¹² ایتَه بمرده مَأنستَأن جی خاطر بوشو دَأرم و ایتَه بیشکفته ظرفِ مَأنستَأن جی چوم دکفته دَأرم. ¹³ دروغایی کی می دوشمنان می پوشتِ سر گویده یَ ایشتَأوم. می دؤرَ وحشت بیگیفته دَأره و بر علیه من نقشه کشد تا مرَه بوکوشد. ¹⁴ ولی ای خداوند من ترَه توکل کونم و گویم می خدا تویی. ¹⁵ می زندگی تی دسِ میَأن نَهه، مرَه می دوشمنانِ دسِ جَه و کسانی دسِ جَه کی مرَه آزار دهد خلاصَ کون. ¹⁶ تی بنده چومَ تی جمالِ نورِ جَه روشنَ کون و تی رحمتِ اَبدی اَمرَه مرَه نجات بدن. ¹⁷ ای خداوند ترَه توکل بوکوده دَأرم مرَه خجالت زده نوکون، وَأهَأل شریرِ مردمان شرمنده و سرافکنده بوبود و ساکت بوشود خوشَأنِ قبرانِ دورون. ¹⁸ لال بوکون اوشَأنی کی دروغ گویده و جی رویِ غرور و حماقت علیه عادلان گب زند.