28
1
ای خداوند، ای می نگهدار، تی درگاهَ زاری کونم می دوعایَ بیشتَأو، چره کی اگر مرَه جواب ندی، مُرده یانی مَأنستَأن بؤم کی شوئون درد قبرِ میَأن.
2
وختی می دستانَ تی معبدِ مقدسِ طرف بلندَ کونم و التماسِ و گریه زاری اَمرَه تی جَه کمک خَأیم، می دوعایَ مستجاب بوکون.
3
مرَه جُزء شروران و بدکاران به حیساب نَأور، کسانی کی خوشَأنِ همساده یانِ اَمرَه ظاهراً دوستانه گب زند، ولی خوشَأنِ دیلِ میَأن قصد دَأرد اوشَأنَ اذیت و آزار بوکوند.
4
اَجور کسانَ مطابقِ اوشَأنِ رفتار و شرارت مجازات بوکون، هو کارای زشتِ وَسی کی انجام بدَه دَأرد، اوشَأنَ مطابقِ اوشَأنِ کاران جزا بدن.
5
اوشَأن خداوندِه کاران و اونچیزایی کی خلق بوکوده یَ توجهی نَئرد، پس خداوندم اوشَأنَ مجازات کونه و همیشه رِه جی میَأن بوره.
6
متبارک بیبه خداوند، چره کی می درخواست کمکَ بیشتَأوسته دَأره.
7
خداوند می قوّت و می سِپره، می دیل اونَ توکل دَأشته و اونم مرَه یاری بوکود، هَنه وَسی می دیل شاده و می سرود خَأدنِ اَمرَه اونِ جَه تشکر کونم.
8
خداوند خو قؤمِ رِه قوّته و خو مسیحِ جَه پشتیبانی کونه.
9
خداوندا خودتِ قؤمَ نجات بدن و اوشَأنی کی تی شین ایسه دَه برکت بدن، اوشَأنِ شبان بوبون، اوشَأنِ جَه نگهداری بوکون تا اَبدالآباد.