1 ¹ از یهودا؛ عیسی مسیحِ غلام، و یعقوبِ برأر، به مسیحیانی کی خدایِ پئرِه محبوبْ و اونِ انتخاب بوبُسته ید، و عیسی مسیحِ رِه محفوظ بدَأشته بوبُستد. ² رَحمت و سلامتی و مُحبت، هر روز ویشتر شمرِه بأیِه. ³ ای عزیزانْ، هر چند اشتیاق دَأشتم دربارۀ اون نجاتی کی اونِ میَأن شریکیم شمرِه بینیویسم، ولی لازم بیدم اَ چند خطِ اَمرَه شمرَه تشویق بوکونم تا اونْ ایمانی جَه کی خدا ایبار و همیشه رِه خو مقدسینَ بیسپُرده دفاع بوکونید. ⁴ چون بعضی خدانشناسان کی از قبل اوشَأنِ محکومیت مشخص بوبُسته، مخفیانه کلیسا دورون نفوذ بوکودد و تعلیم دهد کی اَمَأن بعدِ اَنکی مسیحی بوبُستیم اَمی خداوندِ فیضِ وَسی، هر چی کی اَمی دیل بخَأیه تَأنیم اَنجام بدیم، اوشَأنْ اَمی مولا و اَمی خداوندْ عیسی مسیحَ اِنکار کوند. ⁵ هر چند شومَأنْ پیشترانِ رِه اَجور چیزانِ جَه خبردار بوبُسته اید و دَأنید، ولی خَأیم شمرَه یادآوری بوکونم، خداوندْ با اَنکی اسرائیلِ قؤمَ مصرِ جَه نجات بدَه، ولی بازنْ، کسانی کی بی ایمان بوبُسته بودَ هلاکَ کود. ⁶ و یا اون فرشته یانی کی خوشأنِ مقامِ عالیَ حفظ نوکودد و خوشَأنِ مکانِ حقیقی یَ ولَ کودد، زنجیرایَ اَبدی مرَه دَوَسته دَأره و تاریکی مُطلقِ دورون بدَأشته، تا روزِ داوری رِه محکوم بوبود. ⁷ و هَطو سُدوم و عَمورَه و شهرایِ اَطرافِ مردمَ، اوشَأنْ زِناکاری و همجنسبازی دونبال بوشد، و هَنه وَسی جی میَأن بوشد و آتشِ اَبدیَ گرفتارَ بوستد تا اَمِرِه درسِ عبرتی بوبود. ⁸ اِمروزم اَجور آدمانِ وضع هَطویه، خوابهایی کی دیندِ وَسی خوشَأنِ بدنَ نجس کوند، خداوندَ قبول نَئرد و موجوداتِ آسمانی یَ مسخره کوند. ⁹ حتی میکائیلْ فرشته یانِ رئیسْ، وختی موسی نعشِ سر اِبلیسِ مرَه جر و بحث کوده جرأت نوکود اونَ تُهمت بزنه و محکوم بوکونه، بلکی بوگوفت:«خداوند ترَه توبیخ بوکونه!» ¹⁰ ولی اَشَأنْ اونچی کی نفهمدَ توهین کوند، اَشَأنْ حیواناتِ بیشعورَ مَأند کی جی رویِ غریزه هر چی کی اوشَأنِ دیل خَأیه یَ انجام دهد، ولی هون کارانْ، اوشَأنِ هلاکتَ باعث بِهه. ¹¹ وای بر اوشَأنْ، چون قائنِ راهَ شوئون درد، اوشَأنْ بَلعامِ مَأنستَأن گومراهَ بوستد و مَنفعتِ وَسی هر کاری کوند، و قورَحِ مَأنستَأن کی یاغی بوبُست و خدا دستورِ جَه سرپیچی بوکودْ هلاکَ بوستد. ¹² اَجور آدمانْ شیمی جشنهایِ کلیسایی دورون لکه ناپاکی ایسد کی فقط خورد و شیمی مرَه شادی کوند، اوشَأنْ شبانانی ایسد کی فقط خوشَأنَ پروار کوند، اوشَأنْ اَبرهایِ بی بارانی ایسد کی زمینِ خوشکِ جَه دوارد بی اَنکی بارانی بواراند، درختانی ایسد کی هیچ فصلی دورون میوه فاندد و ریشه جَه بیرون بأمو دَأرد و کاملاً بمرده ید. ¹³ اوشَأنْ دریا موجَ مَأند و اوشَأنِ رُسوایی کفهایِ کثیفِ مَأنستَأن ظاهرَ بِه، و ستاره هایِ سرگردانی یَ مَأند کی تاریکی و ظلمتْ تا اَبد اوشَأنِ رِه مُقرر بوبُسته. ¹⁴ خَنوخ، کی هفت نسل بعدِ آدم زندگی کوده اَجور آدمانِ وضعِ جَه خبر دَأشته و بوگوفته:«بیدینید، خداوندْ، هیزاران هیزار خو مقدسینِ اَمرَه اَمون دره، ¹⁵ تا همۀ مردمَ داوری بوکونه و همۀ بی دینانَ شرارتایی وَسی کی انجام بدَه دَأردْ، و همۀ گوناهکارانَ گبایِ زشتی وَسی کی بر علیه خدا بوگفته دَأردْ، محکوم بوکونه.» ¹⁶ اَجور آدمانْ همیشه غُرغُر و شکایت کوند و خوشَأنِ شهوتِ جَه پیروی کوند، پیله حرفان زند و سود و منفعتِ وَسی مردمِ جَه تعریف کوند. ¹⁷ ای عزیزان، او حرفهایی کی اَمی خداوند عیسی مسیحِ رسولانْ بوگوفتدَ به یاد بأورید، ¹⁸ اوشَأنْ شمرَه بوگوفتد:«زمانهایِ آخرِ رِه کسانی پیدا بهد کی مُطابقِ خوشَأنِ شهوَت رفتار کوند کی بر خلافِ دینداری ایسه، اوشَأنْ حقیقتَ مسخرهکوند.» ¹⁹ هَجور آدمان شیمی میَأن تفرقه و جودایی تَأوَدد و آدمایِ نفسانی ایی ایسد، اوشَأنْ خدا روحَ نَئرد. ²⁰ ولی شومَأن ای عزیزانْ، خودتانِ زندگی یَ ایمانِ رو اُستوار بوکونید، و روح القدسِ هدایتِ مرَه عبادت بوکونید. ²¹ و هَطو کی اَمی خداوند عیسی مسیحِ رَحمتِ رأفأ ایسَأئید تا شمرَه حیاتِ جاودانی طرف هدایت بوکونه، خودتانَ خدا محبتِ میَأن محفوظ بدَأرید. ²² نسبتِ به اوشَأنی کی شک و تردید دَأرد مهربان بیبید. ²³ کسانی کی آتشِ مجازاتِ طرف شوئون دردَ نجات بدید، ولی مراقب بیبید خودتانْ گوناه طرف فأکشه نیبید، هوقدر کی شیمی دیل اوشَأنِ رِه سوجه، هوقدر اوشَأنِ اَعمالِ گوناه آلودِ جَه نفرت بدَأرید. ²⁴ هَسَه بر اونی کی قادره شمرَه لغزشِ جَه محفوط بدَأره و شمرَه بی عیب و شادمانْ، خو حضورِ پور جلالِ پِش جَه حاضر بوکونه، ²⁵ بر اون خدایِ یکتا، کی بواسطۀ اَمی خداوندْ عیسی مسیحْ اَمَرَه نجات بدَه دَأره، از اَزل تا هَسَه، و تا اَبدالآباد، جلال و عَظمت و قوّت و قدرت بیبه، آمین.