1 ¹ جی شمعونِ پطرسْ، خادم و عیسایِ مسیحِ رسولْ، به اوشَأنی کی بواسطۀ برکتی کی اَمی خدا و اَمی نجات دهنده عیسی مسیحِ عدالتِ جَه اوشَأنِ نصیب بوبُسته، اَمی اَمرَه ایمانی یکسان دَأرد. ² هوطو کی شیمی شناختْ نسبتِ به عیسی مسیح و خدا ویشترَ بِه، هوطو هم فیض و سلامتی شمرِه ویشتر بَأیه. ³ قدرتِ الهی اونچی کی زندگی و خداپرستی رِه احتیاج دَأریم اَمَرَه ببخشه دَأره، تا بتَأنیم بهتر بشنأسیم کسی یَ کی اَمَرَه دخَأد تا اونِ جلال و عظمتِ دورون شریک بیبیم. ⁴ هَ قدرتِ عظیمِ الهی مرَه بو کی اونْ خو وَعده هایِ عظیم و اَرزشمندَ، اَمَرَه ببخشه، تا شومَأنْ بتَأنید از طریقِ اوشَأنْ طبیعتِ الهی شریک بیبید، و فساد و شهوتی کی اَمی دؤر وَر نَهه جَه نجات پیدا کونید. ⁵ ولی اَنِ وَسی کی اَ برکاتَ دس پیدا کونید، سخت تلاش بوکونید تا بواسطۀ خودتانِ ایمانْ، خوبی به بار بأورید، و بواسطۀ خوبی شناختْ، ⁶ و بواسطۀ شناختْ پرهیزکاری، و بواسطۀ پرهیزکاری صبرْ، و بواسطۀ صبرْ دینداری، ⁷ و بواسطۀ دینداری، دوستی، و بواسطۀ دوستی محبتْ. ⁸ چون وختی اَ صفتانْ شیمی میَأن وجود بدَأره و رُشد بوکونه، وَأنَأله کی اَمی خداوند عیسی مسیحِ شناختِ دورونْ تنبلْ و یا بی فایده بیبید. ⁹ ولی کسی کی اَ صفتانَ نَئره، کورْ و تنگ نظره، او شخص جی یاد بوبورده دَأره کی خو گوناهانِ قبلی جَه پاکَ بوسته. ¹⁰ پس ای برأرأنْ، سخت تلاش بوکونید تا ثابت بوکونید کی جُزءِ خدا دعوت بوبُسته یان و انتخاب بوبُسته یانید، چون اگر اَ کارَه بوکونید هیچموقع لغزش نوخورید و خدا جَه دورَه نیبید. ¹¹ و خدا هم آسمانِ دروازه یانَ شمرِه بازَ کونه تا شومَأنْ اَمی خداوند و اَمی نجات دهنده عیسی مسیحِ ملکوتِ جاودانی یَ داخل بیبید. ¹² پس اَ اُمورَ همیشه شمره یادآوری کونم، هر چند اوشَأنَ دأنید و اونْ حقیقتی کی پیدا کوده دَأریدِ دورون اُستوارید. ¹³ ولی تا زنده یم، صلاح دینم کی شمرَه یادآوری بوکونم تا هیچوخت اوشَأنَ جی خاطر نوبورید. ¹⁴ من دَأنم کی بزودی اَ دونیا جَه شؤم، چون اَمی خداوند عیسی مسیح خودش مرَه خبر بدَه دَأره. ¹⁵ هَنه وَسی هر چی توان دَأرم انجام دهم تا می مَردَن پسِ رِه همیشه بتَأنید اَ چیزانَ به یاد بأورید. ¹⁶ اَمَأنْ وختی دربارۀ اَمی خداوند عیسی مسیحِ قدرتْ و یا اونِ وَأگردستَأن شیمی مرَه گب زئیم، داستانهایِ جعلی شمرِه تعریف نوکودیم، بلکی اَمی چومَأنِ مرَه اونِ عظمت و اونِ جلالَ بیده ایم. ¹⁷ وختی خدایِ پئرْ اونَ جلال و افتخار فَأدَه، اَمَأنْ حاضر بوئیم، و اونْ زمانی کی جلالِ خداوندی صدا به گوش فَأرسه کی گفته:«اَنه می عزیزه پسر کی اونِ جَه راضیم» اَمَأنْ هویَ ایسَه بیم. ¹⁸ بله، اَمَأنْ وختی اونِ مرَه کوهِ مقدسِ رو ایسَه بیم اَ صدایَ کی آسمانِ جَه بأمو بیشتَأوستیم.