¹ Oli Yesus maso e hamolang gomi, nama kivil gatang edeng ae emi Yesus gauling. ² Ginang ajimi Yesus gauling, tabi nama vid hamolang, gomi tahoning ging geng gene gahala. ³ Muse Yesus nama gatang edeng kivil adi gohi, "nama hahamami mate." ⁴ Anga muse, Yesus angami giala tutuk, "Agani se vid hamolang gadang karajang nua e pela? walmagang gene gang a petal e gentamina?" iba se ging takimang. ⁵ Oli, Yesus geng puhi gi uling oli gang gomi kalila. Yesus gomi susah gomi nama gene mona e nama gene keta Yesus nama gatang edeng kivil adi galatutuk, atang horuk, gatang penang mona jema. ⁶ Ang gagelang, nama Farisi gonong jema gi tala gahing, tomi anu, oli nama Herodian. Tata bani hise ping geng tamina. NAMA TOHING YESUS GALUALI ⁷ Ibase Yesus gabvak gasoru gaserang gala, geng kolang gadang jema, galilea ga manusia oli Yudea, ⁸ Oli Yerusalem, oli Idumea, nama Yordan gamotagoa, oli Tirus oli Sidon, nama tohing ajimi Yesus ga karajang gauling. ⁹ Nama rae anga g'elang, Yesus gaserang gonong gialatutuk e tangtang anu gauling mia nang tang tangi anga hise, gang I ugahala ganang. ¹⁰ Yesus nama rai gahoni gang mona, anga muse nama ajimi ketang bana ehi gadang adu. ¹¹ Sawa kase eang pela uling, Yesus gakarejang anga gaebeng ging Yesus gomigoa toku kalili, "Eng Lahatala gaval!" ¹² Ake nama gala hupa bola nengadi alalang bagie. YESUS SAKOLA KARANU WALUNG ALO UALU ¹³ Seng muse Yesus adual tang mida, gang nama tohing gohi gola adu. ¹⁴ Gang ginang karanu walung alo ualu, miama gala karajang ubalenta oli gang ginggahing moling sarinta, ¹⁵ Oli kuasa maginang ging setan-setan gatiari. ¹⁶ Karanu walung alo: adi Simon (genga Yesus gane ubagang Petrus), ¹⁷ Yakobus, Zebedeus gaval, oli Yohanes, Yakobus ga kaku (genga Yesus gene ubagang Boarneges, gaubagang "Guru gaval"), ¹⁸ Andreas, Filipus, Bartolomeus, matius, Tomas, Yakobus, Alfeus gaval, Tadeus, Simon Zelot, ¹⁹ Oli Yudas Iskariot, gemba Yesus abali. YESUS GAKUASA LAHATALA MI ADA ²⁰ Anga Muse, Yesus e anu mi mida, nama adu gioduna ging ebeng anga di adu ging topuni anga gelang Yesus oli ga sakola val ging roti kede jadibanaga. ²¹ Oras anga mi e manaking hur anga umagia ging adu Yesus gala bale, ging ubagang uganokung ka tening bana. ²² Oli, Ahli-ahli Taurat Yerusalem mi adu ging ubagang bohola, "geng anga eang pela Beelzebul?" oli "gang setang gatiari setang ga parenta gomi." ²³ Anga muse, Yesus gi agang ginang ajimi gadang adu, oli gang koli miama gialatutuk, "Tatabani hise setang bale setang gatiari? ²⁴ Parenta mitatara tegapalang, gang bale ga parenta lavang, parenta anga anamang bana. ²⁵ Oli, e anu tarikil mitatara, e anga ka anamang mate bana. ²⁶ Oli iblis mate bale gadiri lavang oli mitatara, gang ka anamang bana, gasarenta umate. ²⁷ Oli namanu ka e mi maso bana nama ba dagili pata gang il gapuning bana ibase gang geng pata gatula, anga hise gang ga il gapuning. ²⁸ "Nang hur tarang mia ila hupa, val gonong gi gahalang uampo mia giala hama, oli gi hur gahalang ba ging ubagang anga. ²⁹ Anga gagelang alang ba eang hamolang gabuala gagahalang uampo bana, uampo gahalang gegjia." ³⁰ Anga muse, ahli-ahli Taurat ubagang, "Eang pela ba geng tamang." YESUS GAJOA BA GAMA MOLO ³¹ Anga muse, Yesus giva oli gakaku gonong adu poe balelang mi mate. Ging adu yesus gaagang. ³² Nama goduna, ging gie miha Yesus migoleng ging angami gialatutuk, "Alangba mia niva nakaku gene." ³³ Yesus angami gialatutuk, "Alangba mia niva nakaku gene?" ³⁴ Anga muse, anga mi giuling gahur ubale maginang, "uling, adi mi adi angaba niva gene oli nakaku gonong! ³⁵ Alangba Lahatala gakarajang ukarajang, angaba, miama mia naku amu, oli mia hial niva gene,"