¹ Mia ma piapbetal adi gohi lohi,fela, Kristus gang piapbetal gene lohi. Anga gelang ba, ma e ping mate anamang tama hogol miama i kaku a saserang geng tang mega ganang. ² Uhalela! Neng adi ba, Paulus, miama ialatutuk, ing kalu sunat anga tarima, angase Kristus anga ka gagunang u banaga miama iala hama. ³ Idang mianu magala, nang oli ialatutuk, nama alalang anga ba gang sunat anga ugaluali angase gang malekang taurat ga karajang ajimi ukarajang. ⁴ Ing kalu bola iapbetal hamolang anga mia Hukung Taurat mi u galuali gelang, anga se iapbetal anga ing miama Kristus uhapba jema, anga gelang ga nua hama anga, gang miama iohapba jema. ⁵ Lahatala ga Roh oli, iman parasaja gomi mi, ping miha ga nua hama anga u harap. ⁶ Anga gelang, Yesus Kristus gomi mi, sunat naga ba sunat banaga di ajimi ga gunangh u bana. Pi ugaluali ga karajang oli tomi mia tajajahi anga ba ga gunang u. ⁷ Ing ehi nua jema, alang ba ihapa iohi nua hama anga bola iohi ukarajang ganang? ⁸ Nama oli nua hama anga ukarajang ganang anga ka gabung adu banaga. ⁹ "Ragi ol edeng gang bisa miama topong tohing-tohing anga bisa gene ga boku." ¹⁰ Na pikir ganukung miama idang, Lahatala gomi mi se bola ing ka pikir ganokung ebeng banaga. Ani ibase, nama alalang anga ba i parasaja anga gene ing ka tening banaga gang kuli gapbili anga dapa. ¹¹ Anga gelang kaku gonong, kalo nang do sunat ga viag anga ututuk ubagang jia, getabani hise nama do najajahing nababutung jia? Kalo ani se, kupbal val ba miama leut anga u pbei jema. ¹² Nang u harap ging ba ing pbana tatara tegapalang anga mi nua se giag anga mang haruata. ¹³ Kaku gonong, nang i agang ma bola iapbetal anga gohi lohi. Agani ibase, ing ake i lohi anga pake apbetal miama dunia ga mau ga ujali anga ba ugaluali, ibase ing pake miama tomamoling Lahatala gomi mi. ¹⁴ Oli, parenta-parenta ba Hukung Taurat gomi mi anga ajimi ga pol gene anu miama hur gamang kavali anu mi pbenang ba, "Iomi miama i kaku i saserang ga jahi emanghula ing i diri iavak pbahi gajahi anga gajoang." ¹⁵ Ing kalu teng kakiki oli teng amamogal, iavak anga u jaga anga hi ing ake tenetamina ganang. PI BOGA AJI GAUJALI KA PI UALMAGANG GAUJALI GAJOANG BANAGA 16 Anga gelang, nang ialatutuk, apbetal Roh gomi mi, angase ing ka apbetal dunia ga mau ga ujali anga ugaluali banaga. ¹⁷ Apbetal pbela kalila a boga aji gomi mi anga gang ka Roh gomi gala tomi anu bana, oli apbetal Roh gomi mi anga gang ka apbetal pi boga aji gomi mi gala tomi anu banaga, alopi adi ging tatara, anga hi ing ake il ba ing u suka banaga anga ukarajang ganang. ¹⁸ Anga gelang, ing kalu bola Lahatala ga Roh gohi piala topuni, anga se ing ka apbetal taurat ga nua ugaluali banaga. ¹⁹ Napsu ga karajang ga rupa, pi boga aji ga maun tarang jema pbenang ba, buha ta, pbela gahalang, hur tapbokang. ²⁰ Te pbal gahi, te pbahi te aliku pake, tomi takalila, ulak papak, tomi mia takakurang, tomi taketa, pi diri galokang u pikir, ulak papak oli il gene mi gajahing, ²¹ Togageve pusi, naboga pusi oli dunia ba mi navera, oli ebeng emanghula nening ba nang mia ialatutuk anga gajoang. Nang i vong gene, nama alalang ba karajang gagiani adi ukarajang, ging anga ka mana ba Lahatala u sadia jema anga mi maso banaga. ²² Agani ibase, Roh hamolang gahi pbenang ba, tomi tajajahi, sukanavera, tomi anu taha anu, sukasanang, tening rama, nua hama oli kalaka. ²³ Piavak pbahi gene galolang-galolang, moleng bala. Karajang garupa ani anga hukung joa ka u larang banaga. ²⁴ Nama ba giavak miama Yesus Kristus gatang mi gamugu, ging anga ba gi manusia dunia anga ging miama Yesus gala leut jema oli gi napsu pbela anga gala. Kalu pi apbetal adi ping Roh ba gala apbetal, anga se pi lamal pi mate anga malekang Roh ga mau anga ba ugaluali. ²⁶ Ping ake pi diri gene gatela ganang, ping oli ake teng olu mia to gadu pbela anga gene ganang oli ake tomi takakurang ganang.