¹ Hei, ingba Galatia ganama bodo gonong! Alangba ba ae yomitang jema? Anise ging uling gomi mi anga Yesus nama geng halia ae nama tohing ga ulinggeli gomi mi? ² Nang bola il anu miama uiteng, anise ing Roh utarima anga Taurat ugaluali e ig ugaluali gomi mi? ³ Anga ibodoh p'enang ba anga? Halomang ing nuahama gomimi ulamal jema gau mate adi ing imauba ugaluali? ⁴ Tohing rai ba ing adia ukarajang anga parasuma? kalu bola ajimi adi ingka ugaluali bana. ⁵ Angase gang gomi nua hama miama ingtang sengse ing Tanda herang gene anga Taurat gelang e naga iugaluali gelang? ⁶ Emanghula Abraham gaugaluali gelang nama bola gengdi nama nua. ⁷ Anga gelang base, ning malekang geli sebola nama gaugaluali geng u angaba nama bola Abraham gaval gidat. ⁸ Surat hamolang, tulangmi ubagang sebola Yahudi gamanusia banadi gang geng gene molo gaugaluali gelang. ⁹ Jadi, ingba Lahatala mikakubal anga nama kuli Abraham nama molo anga gala barakat mia ing tang. ¹⁰ Nama olalang gaurat adi ugaluali e oli ukarajang anga gang ae hukung dumang: "Se tulang mi ubagang jemai sebola kutuk pal ingtan adu ingba gahur uhalua bang olika ulamal bana." ¹¹ Anga gelang base nama anu ka ae Lahatala gahondal mi Hukung Taurat bana, sebab "Nama molo, abeytal gau gau galuali gelang." ¹² Anibase, Taurat anga ugaluali anga uapit jadi bana. Angami gabak bola nama alalang ba uda luali se gang taurat mi ap'etal." ¹³ Hukung Taurat gelang Yesus amina miama kutuk gavagi gau bagang sebola, "kutuk p'al miama ingba laut uhila anga gadang!" ¹⁴ Ae Yesus Kristus gomi Abraham ga barakat anga sampe mia ma namaba Yahudi gamanusia bana anga gonong ging tang adu anga hise giugaluali gomi, Roh ba miama piala palak ang ping kuli tarima. LAHATALA GAPALAKI OLI HUKUNG TAURAT ¹⁵ Nimang naming, kaku gonong: Vid kakanap gomi nang sontoanu mia, kalu nama tohing ga tala tutuk hur ana puni jema se nama anu ka gabuala bana oli ka huranu magala bana. ¹⁶ Jadi palakiba Lahatala miama Abraham gala palaki miama anga gata p'anang ba gadang. Kabola miama ap'anang digadang bana e miama gatap'anang ba gadang angase bola miama nama anu kelang gadang p'enang ba Kristus. ¹⁷ Naganokung sebola, Taurat ba muncul tung 430 ga magoava jema anga namanu ka gabuala bana olika ga ebana bana. ¹⁸ Warisan anga ugalualise pingka miama palika ading igapuni jadi bana. Ibase Lahatala gang ganuahama miama Abraham geng tang gaugaluali miadu ¹⁹ Jadi, getabaniba hukung Taurat malekang ae? Hukung Taurat nama gene anga karna gahalang gene gaganua u bana, sampe gatap'anang ujia. ²⁰ Ibase, Taurat ba nama galalamal anga malaikat oli maring vala gala, padahal Lahatala anga anu. TAURAT GAUBAGANG ²¹ Kalau amise, Hukung Taurat adi gangk Lahatala gapalakika umugu bana? Tantu naga! Sebab, kalu bola hukung adi nama galahela nama gohi mi ap'etal, se tentu molo gadang anga ajimi Hukung Taurat ming adu. ²² Ani ibase, Surat Hamolang tulang mi ajimi miama manusia gala tutuk sebola nama ba dosa mi ap'etal ba ang mikakubal palaki Kristus Yesus gomi mi anga gelang ging kuli gap'ili anga tarima giugaluali gomi. ²³ peu galualika ping u bada anga ping do Hukung Taurat dumang gomi mi ap'etal sampe piugaluali anga gang gavak ma tubing. ²⁴ Angami senghise,Hukum Taurat miama pihapa gene sampe Kristus pielang ga adu ping gene molom pi ugamali gomi. ²⁵ Adise, pi uga luali tarang jema pinka Taurat uga luali gomi. ²⁶ Adise Yesus Kristus gomi mi, pinang ajimi Lahatala gaval galuali gomi mi. ²⁷ Inang ajimiba jial mia ibiang tang Yesus gomimi angse bola ingdi Yesus gajua. ²⁸ Nama Yahuda e nama Yunani ka ae bana jema, nama hukung nagaba nama mardeka, hial oliba amu karna inang ajimi nama anju ae Yesus gomimi. ²⁹ Kalo bola ing miama Kristus ga serang genese ing adiba Abraham gatap'anang gene palaki anga ugaluali.