¹ Inoparrotacada Habacuc itatjaca Dio iinai cayoji: ² No-Minalri, njominina pinaco, njite panaya nofiocawa. No-Minalri, picada nacapa pidejicalre napecolrico njaji panayaperri, panaya, njaa jalredaoca-ca jliaji picadaa nacapácarro pianjikje, njite piwada tsaotsa kjenaca picapaca warso pírroa ipecolrico. ³ Dio íno Temán lrikjoite, njite jliaji Mamatsicanadalri, lrinoca Jiipana Parán nakjoite. Selah. Lriita eenocoma yekjoete Lrimatsiaca sho, Njite pjiomi njaji jalredaoca lricoperri naaca Lrirso matsiadalri. ⁴ Eeno icananialre sho njaji njaji camarrai imotolri Lricaapi lrikjoite yamemape, ima icatsa ninica Lridawaca Jliida. ⁵ Njaji ipoati inocaperri inaiki lriacawa Lripeyajle, njite njaji jalredaoca pirra naacawa jlipa sahpodetetsa. ⁶ Jlinico lriemawa lriwícarro jliaji jiipai; njite lricapa cádanacotsa naikjaolre njaji inaiki jalredaoca lricoperri ikena natetjecawa ifiokjeti sho, njite canani tsakja njaji jiipana yenonnipe njite njaji pamoyoaperri tsakja oopi naconjiawa. Ima Dio ianjicawa lriapowa oopjikjai lrico. ⁷ Nocapa coajica njerrapitaca matsidalri sho njaji inaiki Cusán lricoperri, njite natetjetacawa napanapoco njaji Madian jipaite lricoperri nafio capoawa. ⁸ ¿Capja kerroaca pjia onipaokja ikjoete, ooni macapeki ikjoete o manoa ikjoete, piaji cádanaco picapa pjia iofacadawa pi-caballon nacó njite njaji pjieco carrofiape shametacaperri? ⁹ ¡Capja pjitaca matsia piyawitjiapo piyawitácarro! Selah. Pimjecoca jiipai metádalri ooni. ¹⁰ Nacaoa pjia njaji jiipana lrima njite ikena natipirracacawa icaiyati sho. Njite pjietetacana ooni sho; jliaji ooni imaimaca nawanaca pikjaolre. Ikena keñocaacana. ¹¹ Picada jérri njite kérri tsakja nerrocarroa yenontsa lricana cadanatoa jliaji piyawitjioko kerradalri cayoji eeno iperro capisho. ¹² Pirroa iapiya piajicawa jalredaoca lrico niini pipjoaca njaji inaiki jalredaoca lricoperri. ¹³ Pia piaca piyomjeta njaji pinaikite aimada njite jliaji natalricanaa piniwananipe. Piwayaketa matsiape napaneta jiwidapo njaji matsiperri. ¹⁴ Pjiatsa ino njaji inoacacaperri kjaidaperri nayawitjioco shotsa, ima nano piaca kjeya njite kjaida sho tsakja wakjoete nadecarro paitapena fa jalredaoca lrico. Catima nanjiacacawa cayoji catima capisho jliaji iñaiticada pada kjenadalri iyarro. ¹⁵ Pianjicawa manoa naco pi-caballon sho, njite piwaketaca pafetsa njaji ooni imaimaca. ¹⁶ ¡Njomi cádanaconi, noshapi icorsocawa! Nacorso tsakjawa njaji nonomaya lrimaolrena sho; mjaidaca noaji noapi ricó njite corrin noajica njaji njoipa. Nowapaotsa wia a kjerrecaotsa njenana iocawa njerrapitá-carro njaji inocape fa. ¹⁷ Corri cadaotsa keewi njaji higuera lrima njite corrin cainacaca njaji ova; maatsi cadaotsa nainaca njaji olivo njite corrin paoketaca paiñjaope awacada lrico, o njenita cadaa oveja teecojletsa vaaca ioya nacorrarran lrico, cayoatsa nonaitjaca. ¹⁸ Ima njoa, nocatimataaca caotsawa Dio nacó. Catima caotsa njoa Dio nacó lriyomjeta capoena njoa. ¹⁹ Jliaji IMINALRITI Dio lri kjaidataca njoa njite lricadaa nopjoá carro matsia cayoji nérri ipjoa capisho matsia lriajicarroa jiipana yenondalripe naco