¹ Jliaji yácoti inoparrotacada Habacuc icoadatalri, ² ''No-Minalri, nowana mana pjia mitsa corrin mana pjiepa njoa. Nowana mana pikjaolre niini capoa njaji inocaperri fa, mitsa pjia corrin coca pinaitja piyomjetá-carro fa ³ ¿Coada picadaa nocapaca njaji imatsicanati njite njaji nanaitjaji maatsiperri? Namatsiketaca pjiomi njite naino tsakja inaiki; nainoacacawa nakjoetewaca pjiomi akjerrecatsaji. ⁴ Mjaidaketsa njaji yácoti kjaidaperri, corrinatsa naofacawa matsia aima jalredaoca. kjaidaperri pjaca njaji inaiki maatsiperri, niini aima pjaca nanaitjaca maatsirri matsiaperri ioya. ''Jliaji IMINALRITI idieta yácoti Habacuc irso. ⁵ Picapa matsia coajica naofaaca njaji inaiki aimadan jalredaoca lrico; ¡Pjitacaotsa picaolre njite corriotsa pianjí carroca jloada nacó! Padaotsa jiyapawa cafi cádanaco toa pjia ima corricatsantja pjiepá carroca pada cadantja icaite pjimi nanaco. ⁶ Ima Njorretacaotsa njaji caldeonai, njaji inaiki matsíperri corri perritsa kjená icapaca apjetsida irso. Nanjicaotsa pjiomi jalredaoca lrico niini njepa caotsa napanawa njaji panti corripetsa nayadaca. ⁷ Matsíperri, cafaináperri; ima njaji ana inaiki nafioketsa naiwana nacapá cádanaco nafainá. ⁸ Kjeyaperri pjaca njaji nacaballoni yaawi ioya, kjeyaperri pjacana naoya njaji zorro dépi ricope yanjicawa. Nocadaotsa nanoca njaji sheco cape nanaco tekjoiote, njite kjeyapjaotsa nanoca pérri ioya lripineta cádanco ⁹ lriwiniwa.  Namatsiketaotsa pjiomi a kjerrecawajleca njeyapawa; caida caolri ipjiada jalrapocolri ricó shoca namaimaca ínoca, njite aima pja caotsa njaji inaiki njepalriotsa nadee presowa. ¹⁰ Necajicaotsa naiwana njaji talricanatinai, icamitsaotsa necacarronaca njajio talricanatinai. Corriotsa coadaca narso nayaclre idana, ima nawaketacaotsa jiipai njerrá carrona naikjaolre nadé-carrona. ¹¹ Njeyapaca nanaco cayoji caolri kjaidadalri jiyapa capisho. Corripetsa naoma dio shoperri cantja ikitsindatacana ima njaidacatsa jliaji nadiote. ''Habacuc itatja tsenakja jlimiwa Dio iinai.'' ¹² Miyaca ca Pjia no-Minalri Dio, pjia no-Diote Mamatsicanadalri,l Pjia corridalri coancaojlicaotsa mayami ¿Piniwanaca Babilonia pjirrapitetá-carro Irael namatsicana ikjaote, pji, Jiipada Macadalri. ¹³ 13Mamatsicanaperrica njaji pitji picapá carrontja jaji imatsicanati, corrin pipeyoca picapa njaji imatsicanati; ¿Coada tsakjao matsia picapaca narso njaji yacapewa pikjoete? ¿Coada corrin pikitsindataca njaji matsiaperri pjatsa naoya njaji matsíperri calretsa, njaji inolrina? ¹⁴ Pinaitjaca njaji inaiki nacayosho njaji copje ooni ricope, njaji corripetsa irso iminanai. ¹⁵ Njaji babilonionai napóitana epoi sho; njite njepa pjiomina napeeco capisho nanaco tooda nawaketá-carro pjiomina. Catiima nacapaca njite kjaida nacapaca cayo cádanaco nanaitjacana ima njepaca nayadawa njaji apacoa yacaalre. ¹⁶ Niini njaji babilonionai namjaita maaficalri njite incienso tsakja natodalre irso njite napoirrekja irso tsakja ima nasho naikjaoteca narso naiñjaope matsiaperri aimasho. ¹⁷ Niini, naa pjacaotsa napeco natodalre apana inaiki nacojle njepá carrona, njite nayadacarro njepaite, nainó pjaca inaiki mjenatsa?