¹ Nkwaha nmotja atthu entji yaahomananiha othenkatja tjohimyahimiya tjomyaha tjakhumenlale wariyariwihu. ² Toko tjikhanlehu ohimeeriya naale okhumela wopatjeroni yari massahiti yonehale ni arumeyi onulumo, ³ vano kahonela oreerelatho, tjowehawehiya orathatjene nviraviralyaaya wotjeiya wotjitthu tjootene okhumela woopatjeroni, kiwantikhelaka wootthonkomanya saana, nkhulupale Teofilo, ⁴ wowiira otjuwele weekeekhayi ekhweeli wotjutthu tjikhanle tjoossomihiya. ⁵ Mahuku a Herodes, mwene oJudeia, aahavo nan'kutho n'motja, ihaniya Zacarias, wonikhoto naa Abias. Amuarawe yari wo nikhotto naArao ni yihaniya Isabel. ⁶ Oyeeli yaari anasariya oholo wa Muluku, yethaka wenan'na woohimamiya wokettelo tjooteene ni tjokhanhenriha tja Apwiya. ⁷ Massi ayenani khayarina asaana, kontha Isabel ari ekupa, ni yari oyeeli owuluvalatja tjinene yooyo okathyuyo. ⁸ Yiranyaaale wiira Zacarias aari ohoolo wa Muluku, avaraka mitekotjawe tjeenamikuttho, n'toko nikhotonawe; ⁹ Vano yena anothanliya motjaaliyani, wonayeli elamalelo wonteko weenankutho, wowira akele enupa ya Pwiya ni apahe elunpani. ¹⁰ Atthu oteene yanaaswali n'phanthi woota owakathi wapahiyaya elunpani. ¹¹ Vano nlaikha nimotja naahonmkhumenla, nineemelale, moono weelopwana okhipulani wapahiya elunpani. ¹² Okathi Zacarias wonaliyaawe, ahokhala okutakuthya niwoova. ¹³ Massi n'laikha naahomwiirela: "Ohoove, Zacarias, kontha mavekelwa ahiiwiya. Amwara, Isabel, anahala on'yara mwana mwanlopwana, niwe on'hala omwihana Joao. ¹⁴ We onaahala okhala otteliya ni nukhala sana, ni athu entji anaahala otjiveliya oyariyawawe. ¹⁵ Kontha yena nkokhala muulupale nmenthoni mwaa Pwiya; khan'hala ovurya nipha, hata tjoovuriya tjoohapala; nitho n'mirimani wanumwanawe, yena n'kokhala ootjariya nin'nepa n'thakathifu. ¹⁶ Ni atthu entji Owisrael anaahala wahokolela Apwiya, Mulukwaaya. ¹⁷ Yena nkoorwa ohoolo wa Pwiya mwin'nepani ni owerya wa Elias, wira ahokolose mirima tjannapapaawe wasaanaya, ni waakussa ohin'welela wira yeette womananna ootjuwelatja waanasariya. Yena n'kopanka tjon'mo wowira intthutjihe atthu oothonkomanya wariyari wa Pwiya". ¹⁸ Zacarias ahirela n'laikha: "Kinkookupaleela tjani woyeeyo? Kontha kihuuluvala ni amwaraka ahuuluvala". ¹⁹ N'laikha naahontjipwa: "Mi ki Gabriel, kinkhala wakhiviru ni Muluku ni kinoorumiya wira kulume niwe ni wira kuwaanele ehapari tjoorera. ²⁰ Ni onkookhala puupuupu ni khun'rwa wulumatja n'paka nihuku nin'halaaya wiiranya, kontha kukupalale moolumwaka, an'hala wiranya owakathi waphiya". ²¹ Okathi atthu wamwanrihaaya Zacarias, ayenatja yanaakohana okhala wira yena okathi mwintji aari nkapela. ²² Vano wakhumaliyawe, yena khakwittinri wuluma naatthwaale, pimaana othonyatja nimatata wowira amananihe wahimwerya ethu ekhumenlale. Vano yaahotjula wira yena ehavo yathonyeriyawe owakathi wariyawe n'pani. ²³ Yakhumenlale tjo, owakathi mahuku wamalaliya n'tekwawe, yena ahohokolela owaani. ²⁴ Anavirale yayo mahukwayo, amwarawe Isarel yaahorupala erukulo ni yahivithatha mye eri mithano, iraka: ²⁵ "Eyo piitthu Apwiya ekipankelalyaaya owakathi ayena wakiwehalyaaya wowira akumihe ehayatjaka ohoolo watthu". ²⁶ Mo mweri sitta woholela, n'laykha Gabriel nahorumiya ni N'luku epoma emotja yo Galileia, yihaniyaka Nazare, ²⁷ mwa eharusi emotja yari yapuleliya ni n'lopwana n'motja ihaniyaka Jose. Jose ari n'loko na Davi, ni eharusiyo yihaniya Maria. ²⁸ N'laykhan'no nahon'khumenla ni nahira: "Salama, we ori oreriya tjinene! Apwiya ari ni we!" ²⁹ Masi yena ahokhala owova tjinene mwaha ayo molumwayo ni ahokoha enan'nanila yosenlihiyela. ³⁰ Ni n'laykha nahomwerela: "Ohove Maria, kontha ohorerihiya ni Muluku. ³¹ Kontha onahala orupala erukulu ni onahala onyara mwana we onhala onvaha n'tjina na Yesu. ³² Yena n'kokhala mulupale, n'hala wihaniya mwana owirimo. Apwiya N'luku anahala onvava ehitje ya paapwe, Davi, ³³ Yena anhaal okhala mwe enupa ya Jaco mahuku ottene, ni omweniyawe khuhaal omalatho". ³⁴ Maria ahirela n'laykha: "Iyo iraniyale tjani, mii kinari eharusi?" ³⁵ N'laykha nahomwakhula ni eraka: "N'nepa N'ttakathifu ninawuwela, ni ekuru tjo wirimo tjinahala wuwara. Pimaana, ole ri Ttakattifu nahala oyariya ni nahala wihaniya Mwana a Muluku. ³⁶ Vano Isabel, n'mutji, tjitjan'mo hon'yara mwana nuluvanle. Yena ireliya epupa hana mweri sita nayarale. ³⁷ Kontha khivo yonrikela Muluku". ³⁸ Maria ahira: "Kiti va mii nanteko Apwiya. Eyo yiranye wa mii n'toko nulumo ninyu". Ni n'laykha nahon'hiya. ³⁹ Yale mahukuwale, Maria ahokhuma arwaka mithethe tjo mwako, arwaka epoma yo Judeiya. ⁴⁰ Ni yena ahokela enupa ya Zacarias ni ahonseliha Isabel. ⁴¹ Owakathi ekhumenlaliya eyo, in'waka Isabel osenlihiya wa Maria, mwaana n'mirimani wawe aahotupha, ni Isabel ahotjariya ni N'nepa N'thakathifu. ⁴² Yena ahokhuwela ahimitjaka eraka: "We ori oreriya wa thiyana otene, ni woreriya ori n'hokorokhowo n'mirimaniwa. ⁴³ Onkhumenla tjani anumwanawe Pwiyaka owa okottola? ⁴⁴ Winwaliyaka osenliha, mwana ri n'mirimaniwaka hotupha wotteliya. ⁴⁵ Ni oreriya thule rupalale kontha tjinawiranya n'toko tjithu tjotene tjahimiye na Pwiya. ⁴⁶ Maria ahira: "Erowuaka enawathothopela Apwiya, ⁴⁷ ni n'nepaka onatheliya tjinene wa Muluku, Moopoliyaka. ⁴⁸ Kontha Yena hona wiyevihawaka wenan'na ye nan'teko. Okhumela nen'nava, makhotto otene an'hala okihana oreriya, ⁴⁹ kontha ole ri Ooweryessa hokipankela tjithu tjuulupaleru, ni N'tjinanawe Ttakathifu. ⁵⁰ Ekiriritjawe tjinakhala tjinapuwa makhoto ni makhoto wa yale Anomova. ⁵¹ Yena hothonyera owerwa moonwaawe, hamwarisa ale ari owikukhuliha n'mupuweleloni waya ni n'mirimani waya. ⁵² Hakwanyula aholeli wahitjeni ni hun'nuwiha athu owiyeviha. ⁵³ Harupaliha anatala ni homola athatjiri wohavaha ethu. ⁵⁴ Hon'khavihera Israel, nan'tekwawe, upuwelelaka Ekiriritjawe ⁵⁵ n'toko yena tjeraliyawe owakathi wan'napapehu n'latto wa Abraao ni nikhottonawe mahuku otene!". ⁵⁶ Maria ahokhala ni Isabel mweri miraru nuhoolo tahokolelaliyawe owanyawe. ⁵⁷ Owakathi ophiyaliya wera Isabel an'yare mwana, yena ahon'yara mwan'lopwana. ⁵⁸ Amwathamananawe ni amutjiwe yahin'wa wera Apwiya yayintjenra Ekiriritjaya mwaha wawawe ni yahothapa ni yena. ⁵⁹ Vano, yakhumen'lale tjo, yettaka mahuku nane, ayenatja yahowa omuliha mwana. Ayenani yaphelatja omwihana Zacarias, n'toko apapawe. ⁶⁰ Masi anumwanawe yahuluma yiraka: "Mena, n'hala wihaniya Joao". ⁶¹ Yahireliya: "Khavo tjiritjihuva nihaneliya nen'no n'tjinan'no". ⁶² Ayenatja yahokoha apapa mowera atjuwela tjaphelelaya wera yena ihaniye. ⁶³ Apapawe yaholepela etharwa ni yahantikha: "N'tjinanawe Joao". Otene yahotikinihiya ni yeyo ethuwiyo. ⁶⁴ Yowakuviyatja, malakwawe yahotaphuwa, n'liminawe nahothukuwa, ni yena ahantja wulumatja, anttottopelaka Muluku. ⁶⁵ Vano wahowa wova wathu otene yamwathamanane wakhalawe, ni otene yakhumen'lale yahomwarela n'thethe wonphantti wo Judeia. ⁶⁶ Otene ale yinwale yeeyo, yahokhala otikinihiya wa n'mirimaniwaya, yiraka: "N'kokhala esiyani olamwanola?". Manaa n'tata na Pwiya niri ni yena. ⁶⁷ Apapawe, Zacarias, yari otjariya ni n'nepa n'thakattifu ni yahohimiya, yiraka: ⁶⁸ "Attottopeliye Apwiya, Muluku Owisrael, kontha ahottola ni ahataphula athwawe. ⁶⁹ Yena honivusera enyaka yowopola enupa ya Davi, nan'tekwawe, ⁷⁰ n'toko tjakhuluvelihaliyaya owakathi wokhalayi, mwaha wayale Arumeyawe athakathifu. ⁷¹ Yena nahala oniwanela wopoliya mwawananehu ni matata wayale otene aninttanyifu. ⁷² opankale iyo wera athonyere Ekikiritjawe nanapapehu ni nupuwelelaka Wataanawawe wethakathifu. ⁷³ N'no watanan'no ori olapha wawawe Onpankelalyawe Abraao, papehu, ⁷⁴ wira aniaphule n'matatani wawananihu niwera nivarele N'teko wohoova, ⁷⁵ mwettakathifu ni esariya, Eriyaryaawe, mahukweehu otene. ⁷⁶ Khweeli, ni we, mwanhima, on'hala wihaniya n'rumeyi Owirimo, kontha we onhala orwa oholo wa Pwiya, wira wathenkatje athuwayo mwaha Owawawe,, ⁷⁷ ni opanka otjuweliya wopwa waathwawe mwaha woleveleliya tjothekatjaya. ⁷⁸ Nyo tjin'hala weranya mwaha wo kiriritjawe tjohimala wa Mulukweehu, mwaha wayoyo thiri n'thuko wowirimo onawa n'paka eriyarihu. ⁷⁹ wira arwee mwa yale ari n'piphini ni ari mwithutjini onokwa; Yena n'kopanka iyo mo wera aniholele n'mwettani yo phiro yon'rethele". ⁸⁰ Vano mwanoyo hun'nuwa ni holipa mwinepani. Yena hokhala muthakoni, n'paka ahokhumela wowonya wathu Owisrael.